Buaina chhumin a kiansan loh East Bengal

Estimated read time 4 min read

Kolkata club lian leh tantu ngah East Bengal leh Shree Cement inkar a buaina chuan tiau chhum awm chhung chauh a daih dawn emaw tih laiin kian lam a la pan thei lo a, season thar a East Bengal hawi lam tur a la hriat theih loh.

Buaina bul

Nikum July thla khan East Bengal hi anmahni sponsor tu Quess Corp an inhnuhdawh avangin an buai hman viau a, a tawpah Shree Cement nen hian ‘inrem lailawkna’ neiin he club a neitu nihna 76% zet chu Shree Cement hian an chang zui a, an sum thehchhuah zarah East Bengal in ISL an khel thei thung. An inremna hi inremna tluantling a la nih loh avangin inremna tluantling leh mumal zawk ziah a ngai a, an buai ta.

East Bengal club official te sawi danin an ‘inrem lailawkna’ an lo ziah tawh leh tun a ‘final agreement’ an ziah tur hi a danglam hle niin an sawi a, an pawm thei lo a ni. Hei bakah hian Shree Cement hotupa Hari Mohan Bangur chu hemi chungchang sawipui an tumin an hmu thei lo zel niin an sawi bawk.

Shree Cement lam erawhin hei hi an pha ve thung a, danglamna a awm loh bakah danglamna awm te chu club hruaitute hi sawi turin an ti fo a, chiang takin an sawi thei lo niin an sawi ve thung a, Hari Mohan Bangur hian East Bengal – in an inremna an pawm hunah chauh an club official te hi a hmu dawn niin an sawi.

East Bengal an buai

Zirtawpni khan East Bengal club official executive member 24 zet an inhmukhawm a, Shree Cement nen an inrem theih loh thu hi thuchhuah an siam.

“Kan club president Dr. Pranob Dasgupta kaihhruaina hnuaiah executive committee chuan neitu nihna, club ground, club tent, logo leh club hming te transfer theihna tur inremna hi kan pawm thei lo a, he inremna an tawktarh hi club member te zahlohna lian tak a ni. Kan fans zawng zawng te thlawpna kan mamawh a, tun dinhmunah chuan kan player hlui te nen kan inrawnkhawm leh phawt ang,” an ti. An inrem theihlohna lai hi ‘sporting rights’ ah a ni.

Hetihlai hian Shree Cement lam chuan East Bengal atanga hriattirna lehkha mumal tak an dawn hma chu engmah an sawi dawn lo tih an puang ve thung.

An hmabak

Indian football transfer hawn lai a ni a, club tam tak an bazar ruih ruih a, East Bengal erawhin an player tha te an chan mek niin a lang. Thla thar maiah hian Calcutta Football League (CFL) khelh tan a ni dawn a, he inelna buatsaihtu Indian Football Association chuan East Bengal hi an dinhmun tichiang turin ni 7 hun a lo pe tawh a, chu chu naktuk hian a tawp dawn. Red & Gold Brigade hi CFL – ah hian an inlan lo a nih chuan relegate thlengin sawi rik a ni.

ISL enkawltu Football Sports Development Limited (FSDL) pawhin thla hmasa khan East Bengal hi an buaina ching fel turin a lo vaukhan tawh bawk a, an inrem thei lo a nih chuan tun thla tawp hian an chungchang hi an ngaihtuah dawn niin an sawi bawk.

Didi an au

Nikum khan East Bengal in ISL khelh an duh a, sponsor tu an nei lawk si lo. A tawpah West Bengal Chief Minister Mamata Banerjee a inrawlh a, Shree Cement nen an inremna pawh hi ‘Didi’ vang hi a ni a tih theih. Tunah an buai a, East Bengal fans te’n Didi an au leh ta.

Zirtawpni a East Bengal executive committee thutkhawm lai khan fans engemawzat chu pungkhawmin Didi hi an buainaa inrawlh tur leh chin fel sak leh turin an ngen a ni.

ZoFooty in Kolkata football hrechiang mi thenkhat a biak chuan August ni 1 a kum 101 tling mai tur East Bengal hi ISL – ah kan hmu lo mai ang em tih a rin theih a, chutih rualin nikuma an buaina ching fel vektu Mamata hi a inrawlh leh duh a nih chuan an fans nuaih tam tak te tan chu aia lawmawm chu a awm lo ang.

C Tlanthianghlima

Football tui ve tak

You May Also Like

More From Author