BVT aia vannei Police

September 8, 2018
 |  133 Comments

Mizoram Police-in hnehna nen Mizoram Premier League Season 7 bul an ṭan a, Bethlehem Vengthlang FC laka point thum an hlawhchhuah nghal avangin coach Lalbiaksanga Colney leh Police team an lawm hle.

September 6 zan Lammual inkhelah MPL6 top scorer Lalfakzuala’n goal awmchhun a khung a, Police chakna tura midfield thahrui V. Lalṭanpuia chu man of match atan thlan a ni.MPL7 bul ṭan nan champion lai Chhinga Vengin Chawnpui chu goal khatin an hneh a, Lalsangzuala Hmar naute hi tawnhriat ngah zawk ni mah se MPL kai thar hi khelmuala che ṭha zawk an ni. Amaherawhchu, football nunrawnnain Chawnpui chungah thla a zar a, an phu ang result an hlawh chhuak lo.

Zan inkhelah pawh team ṭha zawka ngaih Mizoram Police aiin BVT-in bul an ṭan ṭha zawk. Inkhel bul ṭantu zingah MPL-a mi thar tam mah se Bethlehem Vengthlangin Police tlarhnung an chhaih buai hle.

Bethlehem Vengthlang tlangval Lalzatluanga’n hnai tak aṭangin keeper Lalṭanpuia Ralte zawnah a pet a, second half-ah pawh Zatea hian Lalruatkima ball pek duhthusam chu goal-ah a chantir lo.

BVT zinga MPL-a tawnhriat nei ṭha ber Laldinliana Varte mual vei lamah a che ṭha a, Sihphir tlangval hian ball ṭha a vawrh lut bawk mah se a chance neih chu goal-ah a chantir thei bik lo. Chawnpui ang thoin BVT an vanduai a, tawnhriat an nei tlemna a lang tel bawk.

Police nge nge
BS-a Colney chuan tlarhma lamah a player neih ṭhat Fakzuala, F. Lalrinpuia, Lalbiakhlua leh Lalsangbera te a dah lut nghal a, heng player ṭha chawm tur hian V. Lalṭanpuia leh Lalramtharmawia te an awm bawk.

BVT player naupang che rang lakah Police taihmak tawk lohna a lang a, first half-ah an talbuai. Second half-ah erawh Police danglamna a lang, minute 50-naah defender Lallawmzuala ball vawrhluh fing tak chu Fakzuala’n cool takin goal-ah a khung a, hemi hnu hi chuan inkhel thununtu zawk an ni.

Police tan dinglam kil aṭangin Biaktea’n crossbar a pet per a, vei lama player hmuhnawm Sangbera backvolley chu crossbar thoin a dan sak. Second half-ah kum upa zawk Police danglamna a lang zel a, talbuai chang nei mah se 1-0 in hnehna an chang.

Lawm leh lawm lo
Mizoram Police coach Lalbiaksanga Colney chuan, “Inelna match hmasa ber chu a harsa zel a, chuvangin point thum kan hlawh chhuak hi kan lawm. Kan tih tur hmasa ber chu kan zo a, Electric Veng hmachhawn turin rilru kan pe leh nghal ang,” tiin Vanglaini a hrilh.

Bethlehem Vengthlang coach H. Lalhlimpuia chuan, “Goal khung theihna tur kan nei a, kan chance neih kan chhawr ṭangkai thei lo kha ka ui takzet. Kan player-te ka ring tawk a, intuai hriam erawh a ṭul ang,” tiin a sawi. Hlima hi MPL5 best defender kha niin tun ṭumah pawh hian squad-a ziah luh a ni a, a ke rek na dam hunah inlan a tum thu a sawi tel bawk.

Thlirna Tawi
Mizoram Police FC 1-0 Bethlehem Vengthlang FC
MPFC : Lalfakzuala 50′
MoM: V. Laltanpuia, Mizoram Police FC

Source : www. Vanglaini.org

Tags: , ,