BVT-in Chanmari West beiseina an titawp – Rooney Opa

bethlehem-vengthlangMizoram Premier League Season 5 a final lut hmasa ber chu Bethlehem Vengthlang FC an ni. Zanin inkhelah BVT forward Lalrammuanpuia’n (Apuia) goal awmchhun a khung a, first leg-ah 1-1 a an lo inhnehtawk tawh bawk avangin aggregate-ah Lalbiaksanga Colney hote 2-1 in an chak.

Armed Veng South tlangval Apuia hi man of the match-ah thlan a ni a, MPL5 best forward nominee-a telpha BVT forward hian semifinal match hnih khelhah goal a khung ve ve.

Tel lo langsar
Chanmari West hian inhliam vangin R. Laldanmawia an bul a tan lo a, chhawr theih turin substitute bench-ah a awm tho. BVT lamah inhliam damkawr captain Laldingnghetan hmun a chang lo chhunzawm zel a, tlarhmaaah PC Zosangliana aiin defender leh striker atana chhawr kawp theih PC Laldinpuia chhawr a ni zawk.

BVT tan Apuia
Inkhel tan atangin team pahnihte an innawr tawn nasa a, Chanmari West an hlauhawm deuh hret niin a lang. Amaherawhchu Danmawia aia lut Lengpui tlangval Lalmuanzuala leh Laldampuia te BVT tlarhung su ve bawk mah se an su chim zo lo.

Team pahnih danglamna erawh Lalrammuanpuia (Apuia) a ni a, Armed Veng South tlangval hian semifinal an thlen theih nan Aizawl FC, Dinthar FC, Chhinga Veng leh Ramhlun North an hneh \umin chakna goal a khung bakah semifinal first leg-ah West Warrior lamah goal a khung bawk. Zanin hian BVT tlarhnunga tichak turin lakluh thar Zothanpuia (Thangpuia) ball vawrh luh tha tak Lalnunmawia’n (Mawitea) tlarhma lama kawppui Apuia tan pe leh chhawngin BVT forward hian goal tha bik a khung.

Best forward nominee dawng pha zingah Apuia a langsar tawk lo a, zanina goal awmchhun a khung hnuah erawh Armed Veng South tlangval hi Chanmari forward Malsawmfela leh top scorer ni mek Laldampuia nen khaikhin tham a tling ta.

Thangpuia telna
BVT hian inkhel pumpui thlirin game an thunun a, tlar hmaah an hlauhawm bakah an tlarhnung a khawng hle. Semifinal an thlen theih nan Lalhlima leh Dinpuia te inkawp fuh em em a, chutichung chuan BVT hruaituten Santosh Trophy-a Mizoram champion puitu defender Zothanpuia (Thangpuia) loan hmangin an lalut ngam.

Thangpuia hmabak a awlsam lo a, amaherawhchu Bethlehem tlangval hian BS-a kaihhruai tlarhnung a tichak tih semifinal-ah a lang chiang. Chanmari defender hlui Thangpuia awm hnuah Lalhlima a la tha reng a, mual sir lama awm Lalmalsawma leh Hmingthanmawia te hming lam hmaih a thiang lo bawk.

BVT coach BS-a fakawm a, final thlen tumin player an inla khawm a, semifinal-ah team thar a din chungin game tha tak a khelhpui thei. Inkhel pawimawhah transfer tawp nia lakluh Samson Ramengmawia’n match pawimawhah a tawnhriat a pholang a, Shillong Lajong captain hlui Samson-a kawppui Zosangkima lah Royal Wahingdoh-a tal hrep tawh a nih bawk avangin midfielder pahnih tawnhriat hi BVT game belhchian a dawlna a ni.

West Warrior an vanduai
Chanmari West hi an vanduai a tih loh theih loh a, an winger pawimawh Danmawia chu a dam that tawk loh avangin an chhawr thei lo a, MPL1 best player Sialhawk tlangval tel loin West Warrior attack a na tawk lo. Danmawia bakah hian MPL hmasa pali final-a khel thei vek Reuben Zosangpuia chu inhliam vangin chhawr theih a ni lo bawk a, HC Zarzoliana hote squad chhah tawk lohna hun pawimawh a lang chhuak.

Second half-a Danmawia luh hnuah inkhel a dang a, amaherawhchu goal hmaah West Warrior an vannei tawk lo. Sialhawk tlangvalin goal a khung thei lo a, thal (groin) na chunga khel Dampuia’n Chanmari West tan damna a thlen thei lo bawk.

Fak phu Bsa
BVT-in final an luhna theihna chhan bulpui ber chu coach Lalbiaksanga (Bsa) a ni. Armed Veng pachal hian local football a tawnhriat ngah a, Armed Veng chu CYMA Football-ah vawi thum ngawt a champion pui tawh a, Pachhunga University College chu inter-college football tournament-ah vawi hnih champion puiin vawi khat pathumna a nih pui bawk. Hetianga record tha nei ni mah se MPL-ah team erawh a vawi khat enkawlna a ni a, league round tluanin pahnihna aiah hniam an awm ngai lo a, semifinal-ah pawh team hmuhnawm an ni chhunzawm zel.

MPL tan hmain BVT hi I Day Football group stage-ah an tla a, MFA Super Cup-ah penalty shootout hmangin Aizawl FC hneh lo mah se an khelh dan thlirin MPL semifinal lut tur niin a lang lo. Amaherawhchu inelna takah erawh pressure sang hnuaia vawi tam lo awm tawh BS-a danglamna a lang chhuak a, BVT player a remkhawm dan hian MPL chiktute a barakhaih fo paha result a neih tel si avangin Armed Veng pachal hi fak loh theih a ni lo.

Sawi belh ang
Inkhel tantirh atangin chak tum ve ve an ni bawk a, first leg atanga en chuan goal thun tam an tum tih a hriat theih. BVT in 4-4-1-1 hmangin goal nawr an tum nghal a , Chanmari West pawhin chak tumin first leg a khel thei lo Ramenga striker-ah an hmang nghal a, 4-1-4-1 game plan an rawn hmang ve bawk.

A tir atangin BVT game a dik zawk a, striker Laldinpuia a hnawk a, midfielder pahnih Sangkima leh Samsona te senior player an nihna game level sangah a lang chhuak a, a bik takin Ramhluan South tlangal Samson-a a hmuhnawm. Zo United midfielder hlui Samson-a hian pass tha bik vawi riat a nei a, Chanmari West player ball keng lai vawi sarih a laksak thei bawk a, man of the match phu khawpin a khel tha.

Chanmari West- in 4-1-4-1 game plan an chhiatpui a, hun awl duh tam Hlutea tan chet theihna tur hmun ruak a tam lo a, attacking a na thei lo. Midfielder thawkrim Muansanga a khel tha a, amaherawhchu goal nawr pui tur khawp chuan a khel tha bik lo. Defensive midfielder K. Lalnunzama (Valtea) a khel chhe hran lo a, Laldanmawia’n inkhel bul a tan loh avangin Dampuia’n inkhel hmuhnawm leh thil ropui engmah min hlui sak lo.

Second half-a Danmawia luh theih hnuah game a pangngai chho tan a, goal hlauhawm nei ve zeuh zeuh mah se an tum ber goal erawh an hlawh chhuak zo lo. Hlutea an la chhuak a pawi a, Lianzama pawh a khel tha thawkhat a, mahse West Warrior goal thun tum luatah tlarhma a tawt hriat a, Zobawk tlangval tan a tlan chakna hman theihna tur hmunruak a awm lo.

BVT-in game plan an siam fuh avangin player pawh an thlak duh lawk lo a, minute 83-naah Laldinliana Varte aia captain Laldingngheta an luhtir bak player thlak an nei lo. Semifinal inkhel hmuhnawm takah BVT-in chak an phu zawk a, final-ah Chanmari FC leh Aizawl FC chak zawk an hmachhawn ang.
ZoFooty Statistics
Chanmari West FC 0-1 Bethlehem Vengthlang FC
BVT : Lalrammuanpuia 44’
MoM : Lalrammuanpuia, BVT
Aggregate-ah BVT 2-1 in an chak
52% Ball Possession 48%
15 Shots 18
5 On Target 7
0 Yellow Cards 1
0 Red Cards 0
Powered by Rainbow Multibrand Mobile Showroom

Tute nge khel?
Chanmari West FC: Lalruatpuia, Toky Zomuanpuia, Racy K Lalremmawia, Vanlalzuia Hnamte, R. Lalawmpuia, Lalmuansanga, K. Lalnunzama, Lalbiakhlua, Lalmuanzuala, Laldampuia, Ramengmawia.
Subs: Lalmalsawma Hmar, Calvin Zosiamliana, Lalruattluanga, Reuben Zosangpuia, R. Laldanmawia, R. Lalremruata, H. Lallianzama, PC Lalawmpuia, Lalnunfela.

Bethlehem Vengthlang FC: Malsawmdawngzela, H. Lalhlimpuia, K. Lalmalsawma, Lalrammuanpuia, Hmingthanmawia, Laldinliana Varte, Zosangkima, Samson Ramengmawia, PC Laldinpuia, Lalnunmawia, Zothanpuia.
Subs: Lalmuansanga, R. Lalrinsanga, Lalhruaitluanga, B. Zothanmawia, Laldingngheta, Lalremtluanga, Lalmawizuala, PC Zosangliana, Lalzatluanga.