BVT-in Zo United an pet chhuak – Rooney Opa

zo-unitedOctober 25, Zirtawpni zan goal nga luhna inkhelah Bethlehem Vengthlang FC-in 3-2 in Zo United an hneh a, Reitlang hming pu thin club hi Mizoram Premier League atangin an relegate.

Bethlehem Vengthlang tan Lalnunmawia, PC Zosangliana leh PC Laldinpuia ten goal an khung a, goal hnuhnung ber khungtu Dinpuia hi MPL5-a striker position-a a awm vawi khatnaah man of the match a thlan a n.

Zo United tan Malsawmdawnga leh H. Malsawmtluanga ten an thun ve bawk mah se Relegation Playoff khel tura an point mamawh zat point thum hmu phak turin point an hmuh belh lo.

Season liam ta khan BVT-in semifinal an luh chian hnuah MPL atangin Mizoram Police an hnawt chhuak tawh a, tun season-ah Zo United an pet chhuak leh bawk.

Inkhelh hma dinhmun
Zo United hi table mawngphahah awma a, an chunga awm Ramhlun North nen point thumin inthlau mah se MPL kaithar aia head to head-ah an san zawk avangin point thum an hmuh phawt chuan relegation playoff khel thei dinhmunah an ding.
Bethlehem VT hi semifinal lut chiang tawh sa niin an chak chuan hmahruaitu an ni dawn a, chak lo pawh ni se pahnihna aia hniamah an awm thei lo. Inrinni zana Chanmari FC leh Aizawl FC inkhel result a zirin chak pawh nise pahnihnaah an la tla thla thei bawk.

An innawr
Chak mamawh Zo United FC-in bul an tan tha a, goal thun ngei tumin an nawr nghal. Corner pawh an hmu zawn nghal mawlh mawlh a, mahse goal khung erawh an harsat. Minute 14-naah Chhanrinpianga (Valrina) freekick tha tak chu hnai tak atangin R. Lalthantluanga’n (Lalmama) a tauh over. A hnu lawkah H. Malsawmtluanga (Mala) long shot tha tak chu BVT defender B. Zothanmawia (Bena) chuan goal line atangin a lo dang per hman hram bawk.

Zo United hian an nawr zel a, Minute 21-ah Lalmama shot tha tak chu BVT goalkeeper Lalmuansanga’n tha takin a dang a, minute 23-naah BVT-in counter attack hmangin an vaw let – H. Lalhlimpuia (Lalhlima) ball vawrh luh chu Lalnunmawia’n um lutin goal-ah a chantirin 1-0 a ni. Goal hmahruai luhna kawngah Zo United goalkeeper Lalvenghima’n mawh a phurna chen a awm. Defender ten goal nawrpuiin an goal atanga hla takah an ding a, goalkeeper nen an inkarah hmunawl zau tak a awm a, goalkeeperin a hnawh khat tha tawk lova, BVT striker class Mawitea tan chuan duhthusam a ni.

Minute 34-naah goal thun mamawh zawk Zo United striker tha Lalnunsanga (Tale-a) a inhliam a, Isak Vanlalpeka’n a beisei aia hmain field chhung a rawn luh phah thung. Goal an chhuah hnuah Zo United an hnual lo a, an nawr chhunzawm zel – minute 37 naah Zo United corner pet chu BVT defender ten an petchhuak tha tawk lova, Malsawmdawnga’n goal-ah shot nghal a, BVT defender ten an lo dang per hman.

BVT hi a bet zawkah an tang nachungin counter attack hmangin goal hlauhawm an nei ve reng a, Mawitea’n goal hnihna khung tum mah se Zo United defender Lalnunpuia’n a dang sak a, forward (defender?) Dinpuia’n hnai tak atangin goal-ah a pet ngam miau loh avangin goal dang a luh belh lo.

Goal li dang
Chawlhlawk zawhah BVT in bul an tan tha zawk a, goal chance tha tak tak an in hlah siak. Amaherawhchu Zo United midfielder Mala freekick tha tak chu MS-a’n minute 53-naah a tauh luh avangin 1-1 a ni der a, inkhel a nung sawt bawk.

BVT an rawn che leh a, minute 59-ah Dinpuia, PC Zosanga leh Laldinliana Varte (Dina Varte) te chuan Zo United offside trap an bum chiang hle. BVT player pathumin Zo United keeper an hmachhawn a, Dinpuia pass chu PC Zosanga’n chiang takin a pet goal.

BVT-in goal khung tumin an khel a, goal venhim an ngaihtuah telh loh avangin goal an chhuah ta nge nge bawk. Minute 64-naah Zo United winger MS-a cross ball tha tak chu Lalmama’n goal-ah a pet nghal a, BVT goal keeper in a beng chhuak tha tawk lova, hnai tak atangin Malan a tauh lut.

Goal hnih ve ve an khung avangin Zo United-in beiseina thar an nei a, khel ve miah lo Ramhlun North tantute tan awm ti nuam lo tham a tling thung. Zo United-in hmahruaina hun tha an hlah a, MS-a pet chu BVT keeper Lalmuansanga’n a dan sak bakah Hmangaiha cross ball tha tak chu changtu nei lo substitute Isaka’n hnai tak atang a tauh lut lo.

BVt lam pawhin chance tha an hlah tho a, minute 79-naa Zosangkima free kick pet chu Zo United goal keeper Venghima’n ti per mah se hnai tak atangin PC Zosanga’n a pet lut lo. Minute 87-naah BVT-in hma an hruai leh a, Zo United defender an chesual lai Dina Varte in nang ching hmanin changtu nei lo Dinpuia’n awlsam takin a khung.

Engtin zel?
BVT-in round hnuhnung berah an that theih dan ber an la hre lo. Chanmari captain hlui Zothanpuia chu defence laiah Lalhlimpuia nen an inkawp a, hming enin chhuan tham ni mah se Zo United lakah goal hnih a chhuah a, goal tam zawk an khung lo an vannei.

Lalbiaksanga Colney hote tana thu lawmawm erawh captain Laldingngheta a dam tawh a, semifinal-ah eng team pawh hmachhawn se an goal nawr a na sawt ang.

Zo United-in hun tha an bawhpelh a, chutihrualin point thum chiah mamawh angin lang mah se an mamawh zat point hi ban phakah a awm tawh loah a ngaih theih thung. BVT an hmachhawn tum hian player pawimawh Malsawma Chhangte, Jesse Laldinpuia leh C. Laldinmawia te an chhawr thei lo a, an goal nawr nat tur angin a na lo. Harsatna belhchhah turin striker Tale-a chu hma takah lakchhuah a tul bawk.

Reitlang hming pu thin Zo United-in transfer laia player tha an lalut lo an tuar a, harsatna belchhah turin an player pawimawh Laldinliana Varte chu BvT lamah an chhuahtir bawk. Chanmari FC-in West Warrior lakah Reuben Zosangpuia chhuahtir mah se an club hmachhawn let an phal lo a, contract-ah an ziak thlap. Zo United erawh an fimkhur tawk lo a, an player hlui Dina Varte-in rum a thaih ngun hle.

Team Dinhmun

# Team Pld W D L GF GA GD Pts
1 Chanmari FC 13 7 5 1 23 11 12 26
2 Bethlehem VT 14 8 3 3 15 12 3 27
3 Chanmari West 14 6 3 5 20 15 5 21
4 Aizawl FC 13 6 3 4 13 9 4 21
5 Chhinga Veng 14 4 4 6 18 19 -1 16
6 Dinthar FC 14 3 7 4 16 20 -4 16
7 Ramhlun North 14 3 3 8 12 21 -9 12
8 Zo United 14 1 6 7 13 23 -10 9

 

ZoFooty Statistics:
Bethlehem VT 3-2 Zo United
BVT : Lalnunmawia 23′; PC Zosangliana 59′; PC Laldinpuia 87′
ZUFC : Malsawmdawnga 53′; H. Malsawmtluanga 64′
MoM: PC Laldinpuia, BVT FC
51% Ball Possession 49%
9 Shots 15
5 On Target 9
1 Yellow Cards 1
0 Red Cards 0
Powered by Rainbow Multibrand Mobile Showroom.

Tute nge khel?
Bethlehem VT: Lalmuansanga, Lalhruaitluanga, H. Lalhlimpuia, B. Zothanmawia, Laldinliana Varte, Zosangkima, Lalrintluanga, PC Zosangliana, PC Laldinpuia, Lalnunmawia, Zothanpuia.
Subs: Malsawmdawngzela, R. Lalrinsanga, K. Lalmalsawma, Laldingngheta, Lalrammuanpuia, Hmingthanmawia, Samson Ramengmawia, Lalvenkima, Lalzatluanga.

Zo United : Lalvenghima, Rosangzuala, Lalnunpuia Pachuau, Vanlalhmangaiha, Lalthazuala, H. Malsawmtluanga, Vanlalruata, Lalnunsanga, Chhanrinpianga, Malsawmdawnga, R. Lalthantluanga.
Subs: LK Lalhmangaihzuala, Dominic Lalruatfela, Isak Vanlalpeka, Alan Lalruatfela, Vanlalremsanga, Malsawmdawngliana, Lalbiakkima, Lalhlimpuia, Vanlalhmangaiha.