CADENA SER: AN CLUB HOTUTE LAKAH MESSI A LUNGAWI LO, CHHUAH PAWI A TI TAWH LO !

Estimated read time 3 min read

FC Barcelona captain leh an innghahna ber Lionel Messi chu an club hotu, a bikin president Josep Bartomeu lakah a lung a awi lo hle a, nakkuma a contract a zawh hunah Barca hi chhuahsan mai pawi a ti lo niin Cadena SER chuan an tarlang.

Argentine forward kum 33 mi hi Barca chuan a contract pawhsei tumin an biakna a rei tawh a, mahse an club hotuten club an kalpui dânah a lung a awi zân loh avangin vawiin thlengin contract thar hi a la ziak duh lova. Club chhunga thil thleng leh an thu leh hla put ru te a awm leh zauh ṭhin avang leh ama tel miah lohnaah pawh mawhphurtu a an puh zel avangin Messi hi a bik takin an club president lakah a lungawi lo hle niin SER hian an tarlang a ni.

Nakkum June thla hian Barca president thar thlanna hi a awm dawn a, Messi hian nakkum June 30 thleng Camp Nou ah contract a la nei a. Chuta pawimawh ta êm êm chu tunge president inthlan tur hi chuh ang tih leh tu in nge Lionel Messi rilru hi hmin ang tih a ni a.

SER in an tarlan dan chuan tuna an club president hian Barca playerte hnenah thil tiam zung zungin mahse a thil tiamte chu engmah a ti leh ngai lo a, a sawi tûk lawkah a sawi loh dân angin thil a kalpui leh ṭhin a, hemi avang hian Messi chauh lo pawh Barca a player dangte pawh an president lakah hian an lungawi lo hle a ni.

Tuna Barca president ni mek Bartameu enkawlna hnuaiah hian Catalan club hi kum 6 chuang hret an awm ta a. Hemi chhung hian Barca hian La Liga nomawi vawi 4 leh Copa del Rey vawi 4 chawi mahse an ngaih pawimawhber UEFA Champions League ṭum khat chiah an chawi a. Tin Bartomeu-a hnuaiah hian sum an hman hnem ngaihtuahin an player lakluhte an che ṭha leh hlawm bawk si lo nen, tin an player ṭha leh ṭangkai ni a langte mak deuhten an hralh a, thil hi a ni deuh nuaiin a lang a.

Manager an lakluh dânte thlengin Bartomeu hian sawisel a hlawh hle a, tunah hetia an thiampuipa Messi ber a lung a awi lo ni a a lan tâk si ah chuan president inthlan lo awm turah chuh tum leh mahse Bartomeu hi a bûk a rit lutuk tawh lo maithei a, president nihna chuh tum Barca president hlui Joan Laporta leh Victor Font te tan kawng zau tak a inhawng tura rin a ni.

C Tlanthianghlima

Football tui ve tak

You May Also Like

More From Author