Cameroon captain Samuel Eto’0 leh vice captain Eyong Enoh te chu, November thlaa Algeria nen friendly khel duh lo a an nawrh avang leh, an teammate te pawh nuar tura an fuihpawrh avangin thuneituten an hrem. Eto’o hi match 15 chhung zet khel thei lo turin an hrem a, kum 30 a upa Eto’o hian Cameroon tân khel leh tak ang maw.

Cameroon players te hian an pawisa dawn tur ang an dawn loh avangin Algeria khel tur hian an zin duh lova, an nawrh dan kimchang chu HETAH hian a en theih. Cameroon Football Federation chuan thuchhuah siamin, “Samuel Eto’o hian captain a nih angin, a teammate te Algeria khel tura zin lo turin a hmin a, hei vang hian Cameroon in match a khelh leh tur 15 ah hrem a ni ang.” tiin thuchhuah a siam.

Fans ten chhuang taka ‘Indomitable Lions’ tia an koh ṭhin, Cameroon football team hi tunhnaiah a buai angreng viau a. Kum 2012 a African Cup of Nations khel turin an inpettling zo lo tawh a, 2014 World Cup qualifiers an khelh hunah Eto’o tel lova an khelh a ngaih phah leh dawn ta a ni. African khawmualpui mai ni lo, khawvel huap pawha team hlauhawm ve tak ni ṭhin kha tunah chuan Africa khawmualpui pual inelna pawh khel pha lovin an awm rih a ni.

Eto’o leh Enoh te bakah hian Tottenham defender Benoit Assou-Ekotto pawh hrem a ni a, CFA francs (Cameroon pawisa) maktaduai khat chawi tura tih a ni. An pathum hian ni 10 chhungin appeal an thehlut thei ang.

source: soccernet.espn.go.com