CARABAO CUP FINAL THLIRLAWKNA – Ema Ralte

EFL Cup, kumina energy drink company Carabao in an sponsor avanga Carabao Cup ni ta final chu naktuk zanah hian khelh a ni dawn ta a, 2017/18 season a nomawi chawi theihna hun inhawng hmasaber hi Arsenal leh Manchester City ten hawn an inchuh dawn a ni.

EFL Cup final vawi 60-na khel tur Arsenal leh Manchester City te hi League Cup ah hian vawi 7 an lo in hmachhawn tawh a. Chungah chuan Arsenal hi vawi 5 chakin Manchester City chu vawi 2 an chak a, League Cup a an hmachhawn hnuhnung pahnih – 2009/10 leh 2011/12 season ah te City hian hnehna an chang ve ve a ni.

Arsenal hian EFL Cup final hi vawi 7 thleng tawhin vawi 2 an champion tawh a, chutihrual chuan tuna an manager Arsene Wenger-a’n kum 1996 a Arsenal a enkawl atang khan EFL Cup hi an la chawi lo thung. Manchester City hian final vawi 5 thleng tawhin vawi 4 an champion tawh thung a ni.

Pep Guardiola-a’n Manchester City a enkawl hnuah City leh Arsenal hi vawi 4 an in hmachhawn tawh a, heng inkhelah hian City chu vawi 2 chakin vawi khat an in draw a, Arsenal in hnehna vawi khat an chang ve bawk.

Season hmasa EFL Cup ah khan Arsenal hian quarter-final lutin Southampton an hneh lo a, Manchester City hian Round of 16 ah an hmelma club Manchester United hneh lovin an tla a, United hi an champion zui nghe nghe a ni.

Team 92 in chawi tuma an khelh EFL Cup final lut tur hian Arsenal chuan Doncaster Rovers, Norwich City, West Ham United leh Chelsea te an hneh a. Manchester City hian West Bromwich Albion, Wolverhampton Wanderers, Leicester City leh champion lai Manchester United hnehtu Bristol City te an hneh a ni.

Carabao Cup final khelh hma hian Arsenal leh Manchester City te hian result an nei tha lo ve ve a. Arsenal hian an khelmual Emirates Stadium-ah Swedish club Ostersunds chu 1-2 in an hneh lo a, City pawh Wigan Athletic in F.A. Cup Fourth Round atangin an pet tla ve bawk.

Arsenal hian Manchester United atanga an lakluh Henrikh Mkhitaryan chu EFL Cup a United tana a lo inlan tawh avangin an chhawr thei dawn lo a, ani bakah hian inhliam Alexandre Lacazette chu Gunners hian an chhawr thei lo bawk ang. Chutihrual chuan hliam damkawr Mesut Özil leh Aaron Ramsey te an chhawr theih an in beisei thung.

Manchester City hian F.A. Cup a Wigan laka red card hmutu Fabian Delph chu an chhawr thei dawn lo a, ani bakah inhliam Benjamin Mendy chu an chhawr thei dawn lo bawk a. Inhliam Gabriel Jesus bakah hliam tenau nei Raheem Sterling te erawh final khel tur hian an fit hman an beisei a ni.

Arsenal leh Manchester City te hian an second goalkeeper ve ve – David Ospina leh Claudio Bravo te chuan final-ah hian goal an ven tur thu an sawi bawk.

Pathianni zan dar 10:00 ah Caraboa Cup nomawi inchuhna inkhel kan en dawn a, hetah hian Arsene Wenger chuan kum 21 chuang Arsenal a enkawl chhunga a vawikhat nan EFL Cup hi a chawi ang nge tun season a nomawi pathum chawi tur la nei, treble tum Pep Guardiola hian Manchester City a enkawl hnua a nomawi hmasaber tur a chawi ang? Hun tlemte chauhin min dang ta e.

Post hmasa lama tarlan tawh angin naktuk zana Carabao Cup final hi MTV India leh VH1 te chuan an live dawn a ni.

Posted in Arsenal FC, Previews, Rampawn.

Leave a Reply

Or