Thawhlehni zanah Carling Cup quarter final lut pali kan hre tawh a, Nilainiah a dang pali kan hriatbelh leh dawn. A hmasain Quarter final lut tawh ho tarlang ila.

Manchester United

Arsenal

Cardiff City

Crystal Palace

Nilaini zanah hian Ten Action Plus chuan Wolves leh Manchester City te inkhel hi dar 12:10 am (Ningani zing) ah LIVE ngeiin a pechhuak ang.

Nilaini zan fixture:

Stoke City v Liverpool
Wolverhampton Wanderers v Manchester City
Blackburn Rovers v Newcastle United
Everton v Chelsea

Stoke City vs Liverpool

League Cup champion ngun ber Liverpool hi tun season-ah Britannia Stadium-ah an tlawm tawh a, Nilai zanah hian tlawm nawn an tum lo khawp ang. Chutihlaiin ‘Potters’ ho hi an home-ah ngat chuan Premier League club lian ten an hneh hleihtheih bik loh kha an ni a, EPL-a an hneh hnu hi League Cup-a hneh nawn an châk khawp ang le.

Stoke City lamah Pennant, Higginbotham leh Fuller te chu an khelh theih a beiseiawm loh. Manager Tony Pulis chuan League Cup a nih vangin player a thlak vak dawn lo tih a sawi a, quarter final luhpui ngei tura a rin te chauh a luhtir tur thu a sawi. Palacios, Shawcross, Jones leh Jerome te ho kan beisei thei ang a, winger ball cross thiam Etherington pawh a khelh ngei a rinawm. An khelh thiam dan ber chu kan hria a, midfield-a ball an chanin a sirah an pe phei vat a, winger te ball cross lo dawng turin striker ‘palian’ an hmang ṭhin. An fans te hi Premier League-a fans bengchheng ber an ni tih pawh kan hre awm e.

An game hnuhnung pahnihah Liverpool an vanduai thei hle a. Anfield-a an game hnuhnung pahnihah an chak zo lova, Manchester United leh Norwich City te chu hneh tak chungin an hneh zo lo. Liverpool manager Kenny Dalglish pawh a zam hauh lova, Liverpool player te chu eng game ah pawh rintlak vek an ni a, Britannia Stadium-ah tupawh khel se chak tura an ṭhat tawk tur thu a sawi. Striker manto Caroll, Welsh wizard Bellamy, Jay Spearing, defender thar Coates leh Lucas te ho kan hmuh ngei a rinawm.

Team pahnihte hi Cup game-ah vawi 10 an intum tawh a, Stoke City hi an la chak ngai lo. Liverpool game ṭhat lai a ni a, an player pawimawh ṭhenkhatte khel lo pawh nise ‘The Reds’ ho nekchhuah hi thil huphurhawm tak a ni ang. Britannia Stadium-ah League Cup match hmuhnawm tak kan beisei thei awm e.

Wolverhampton Wanderers vs Manchester City

Wolves leh Manchester City inkhel tur hi Nilai zan League Cup match zinga inhnehtawk lo ber an ni maithei. Paper ah chuan player an inneihṭhat khawp mai a, mahse field chhungah patling 11 leh 11 an inkhel dawn a, en maia ṭha zawk nia lang hi an chak lo ve nawlh thei tho.

Wolves tân star striker Fletcher a khel thei dawn lo. An mikhual tur te en in player ‘ṭha’ te an chawlhtir a rinawm loh a, Mick Mc Carthy hian a team neihṭhat ber a luhtir ang. Molineux stadium-ah hian an intum hnuhnung 3 ah Wolves vawi 2 an chak tawh a, hei hian manager, players leh fans te beiseina sâng tak a pe ngei ang.

Manchester City hi tun dinhmunah na na na chuan England rama team zawng zawngte hlauhrawn ber an ni. Carling Cup-ah team lian ten an player ṭha te an hahchawlhtir ṭhin ti bawk mah ila, Manchester City hian chawlhtir sên loh ‘player ṭha’ an nei tlat. Owen Hargreaves chu a chawnpuar a tihnat vangin a khel thei dawn lo a, a ni bak hi chu inhliam vanga khel thei lo an awm lo lehnghal a, Old Trafford-a start lo Nasri, de Jong, Johnson leh Dzeko te ho hi lût tak ang maw?

Wolves hi mahni vengah chuan an huai ve khawp mai a. League Cup home game an khelh hnuhnung 10 ah vawi 1 chiah an la chak lo a, mahse Manchester City player te leh an form han en in 4th round-a tla mai tur chuan rin an har. Premier League hmahruaitute hi quarter final-ah kan hmuh leh a rinawm.

Blackburn Rovers v Newcastle United

Edwood Park-a Premier League team pahnih intum tur te hi an dinhmun a inang lo angreng khawp mai. A thlengtu tur Blackburn Rovers hi tunhnaiah an che chhe hle a, Premier League ah a hniam ber an ni a, mahse Newcastle United hneha quarter final an luh theih chuan fans te rilru nâ pawh a dam deuh ang.

Tlarhnunga player pawimawh tak Ryan Nelsen leh midfielder David Dunn te chu an khelh theih a beiseiawm loh a, a khel thei tur zingah manager Steve Kean hian a team neihṭhat ber a thawhchhuahpui a rinawm.

Newcastle United in tun season-a an ‘dream start’ an chhunzawm zel a. Premier League-ah 4 na niin 2011/12 season-ah hneh loh an la tawng lo. Tunhnaia che ṭha tak Hatem Ben Arfa hi start tura beisei a ni a. Santon, Marveaux leh Shane Ferguson te ho pawh lût tura rin an ni. Tun season EPL-a an intum ṭumin St. James Park-ah Newcastle United an lo chak tawh a nih kha.

Player malkhaiah chuan an intluk tawk viau mai a, an ‘form’ erawh inthlau tak a ni. Tunhnaia che chhe zawk Blackburn Rovers hi home-a khel tur an nih vang ngawta dah sân zawk an har viau a, mahse Cup game-ah hi chuan ‘form’ in awmzia a nei vak lova, Edwood Park-ah tun season-a a vawikhatna atan ‘Toons’ ho hi an tlawm ve khut thei tho. Chumi tur erawh chuan Steve Kean a nau te (Blackburn) hi thih thaa an ṭan a ngai thung ang.

Everton vs Chelsea

He match hi fourth round-a hmuh chakawm ber a ni hial awm e. Everton hi Premier League-a an game hnuhnung berah an chak a, Chelsea an chak lo thung.

Player nei tlem tak Everton hian round hmasa lamah an player pawimawhte chawlhtir an nei ve ngai lem lo. Kartawp EPL-a Fulham an hneh ṭum khan Tim Cahill leh Louis Saha te substitute-ah an awm a, Nilaini zanah chuan a tir aṭanga lut tura ngaih an ni. Anni bakah hian inhliam damkawr James McFadden chu a khel thei maithei bawk.

Chelsea hi chuan League Cup ah player naupangte chance an pe ṭhin a, Goodison Park-ah pawh hian an kalphung pangngai an chhawm nun a rinawm. Romelu Lukaku, Josh McEachran, Oriol Romeu, Ryan Bertrand te tân first team experience ṭangkai tak a ni ang. Chutihrualin tunhnaia khel khât tak Salomon Kalou, Florent Malouda, Alex leh Paulo Ferreira te ho pawh kan beisei thei awm e. Drogba, Ashley Cole leh Bosingwa te hrem an ni a, Meireless pawh ‘cup-tied’ vangin a khel thei lo ang.

Tunhnaiah hemite pahnih hi an intum thei riau mai a, Everton hi an che ṭha thei phian zel. Mahse an intum hnuhnun ber, tun season EPL match ah Chelsea 3-1 in an chak a nih kha.

Everton manager David Moyes chuan chak ngei tum chungin Chelsea an lo dawnsawn tur thu a sawi a, Carling Cup chu intihsiakna lian tak a ni a ti. Team ṭha zawk leh player nei ṭha zawk chu Chelsea hi an ni ngei mai a, mahse Villas- Boas in player naupang leh khel khât deuh te a luhtir a, Everton lamah a ṭha ṭha an luh bawk chuan an innuaitawk viau ang. Rinkâi zawk han tih mai tur pawh sawithiam a harsa a, manager pahnihten first XI an thlan danin League Cup-a club pahnihte dinhmun a hril thui viau ang le.