MPL6 : CHAK MAMAWH PAHNIH INKHELAH DINTHAR CHUNGNUNG – Zoa

Mizoram Premier League season 6 nizana inkhelah Dinthar FC chuan Mizoram Police 3-2 in an hneh.

Game thum atanga point khat ve ve chauh la hmu team pahnihte inkhelh lai hian ruah nasa tak sur mahse an goal thunna a dal chuang lo. Tihian Dintharin game 4 ah point li hmu in Mizoram Police in game 4 ah point khat chauh la hmu in table-ah 8-na an ni.

INKHEL CHU

Inkhelh tan a nih atangin points mamawh ve ve team an nih angin goal thun an tum nghal a, an in nawr tawn zak zak hnuah MPFC in goal an thun hmasa a, Hruaia crossball tha tak chu Dinthar captain Malsawma Chhangte in a kut in a lo beng thla a, MPFC in penalty an hlawh chhuak. Minute 17 naah Mamawitea’n chiang takin penalty a pet lut.

Goal khat a luh hnuah ruah a sur nasa a, inkhelh a har mai bakah game a tang a, minute 24 chhungin yallow card vawi li phawrh a ni.

Minute 36 naah MPFC strkier Valpuia’n free ball tha tak a neih laiin ground a tui tlingin a ball kal lai a tih buai avangin MPFC an vanduai. Hemi hnu lawk hian Jackson’n MPFC defender te a tlan pelh vek hnuah David-a tan ball tha tak a siam sak a, goal ngei tur a ngaih hnuah David-a hian feet 6 vel a hnai atangin a pet goal lo. Minute 39 naah Jackson bawk rawn inlar lehin MPFC defender a tlan pel leh a, keeper chauh a hmachhawn hnuah a goal shot chu MPFC goalkeeper Laltanpuia’n thatakin a lo man.

First half a tawp tep tihin Dinthar FC in counter attack atangin Jackson’n ball thatak a tlan luhpui hnuah defender in an
tibuai a, ball per leh chu Lalbiakhlua’n mawitakin a rawn pet lut a, 1-1 niin first-half a tawp zui.

Second-half minute 52 naah MPFC ball pek sual chu Lalmama’n tlanpui nghalin Nigerian midfielder Jackson nen an in ‘one-two’ hnuah Jackson hian Lalmama’n tan ball a dahsak a, Khawlailung tlangval hian tlan tlangpuin mawitakin MPFC
goalkeeper Laltanpuia chu a pet khum a, Dinthar FC tan an goal hnihna a rawn thun.

Minute 59 naah Lalmama rawn lang lehin goalkeeper chauh a hmachhawn leh hnuah keeper zawnah a oet hlauh, DInthar FC in goal dang thun belh leh tumin an nawr reng a, khel tha tak Jackson’n goal ban a pet per hnuah minute 74 naah amah bawk hian penalty box chhung a buai nuaih nuiah karah DFC goal thumna a rawn thun.

Hun pangngai tawp nan minute 7 chauh a awm tawh tihah DFC defender Lalnunpuia chesualin ball-in a kut a fuh hlauh a,MPFC in penalty hlawh lehin Mamawitea bawk rawn penchhuakin a goal hnihna a rawn thun. Hun tawp thlengin goal dang a luh belh lo a, MPL6 ah a vawikhat nan DIntharin 3-2 in hnehna an chang.

THUNAWI

Ruahsurin game kal tluang lai a ti buai nek a, chutihrualin first half zawh hma a DFC in goal an thun hman khan an game a tih awlsam phah.

MPFC hian buaina liantak an nei a, player inhliam an ngah bakah defender rinrawl Ahmuntea inhliam hma kha MPFC tan channa lian tak a ni.Defender tha leh tlanchak a awm tawh loh hnuah DFC forward Jackson’n amah umpha thei an awm lo tih a hria a, hei hi ramchangah a hmang ngun hle.

DFC an phur thar a, chak ngei mamawh an nih bakah MPFC defender chak lohna an hriat atang khan game an thunun tan a, goal ropui tak tak an thun phah a ni. Inkhel pum thlirin DFC-in chak an phu zawk. MPFC lam insiam that an ngai a, match tin a ngai put put a khel lova an player dang tha an neih tlemte te hi hman thiam a ngai niin a lang.

ZoFooty Statistics : 
Dinthar FC 3-2 Mizoram Police FC
(Lalbiakhlua 45+2′ R Lalthantluanga 53′ Jackson Victor Ogheneochuko 74′) (Lalramtharmawia 17′ (p) 82′ (p)

49% Ball Possession 51%
24 Shots 13
8 On Target 5
2 Yellow card 2
0 Red Card 0
MOM : Victor Jackson (DFC)
Powered by : Rainbow Multibrand Mobile Showroom

(Pic : MFA)

Posted in MFA, MPL, Tualchhung.

Leave a Reply

Or