CHAK TUM PAHNIH INKHEL TUR

Naktuk chawhnu dar 2:05 hian Rajiv Gandhi Stadium, Mualpuiah Aizawl FC in champion lai Bengaluru FC an mikhual dawn a, he inkhel hi TEN2 chuan ‘live’ in a pe ang.

BEISEI PHA LO ROCA ?

Bengaluru FC in I-League a an hlawhtlinpui Ashley Westwood thlak nan Barcelona assistant manager hlui Albert Roca an lalut a, Spanish pachal hian AFC Cup ah hming chher mahse tun season I-League ah an che tha tawk lo. Table ah pangana ni mekin khelh 7 ah point 11 an hmu a, an squad neih enin an dinhmun hi The Blues fans ruhkawlte tan lungawithlak a ni lo.

Game 7 a goal 7 chhuah tawh Roca team te hian season tan dawna an lakluh Spanish defender Juanan leh an defender tha John Johnson te an chhawr thei dawn lo a, Sena Ralte leh a thiante an rim lehzual maithei. Galatasaray a hun lo hmang tawh Roca chuan an team dinhmun enin tan lak an ngaih thu a sawi a, Aizawl FC hian home record nei tha mahse chak tuma an beih tur thu a sawi.

Roca hian Westwood a thlak hnuah Mizo player te a chhawr tam tawk lo a, Chhuantea leh Thuammawia an lo inhliam bawk nen, tun tum hian Mualcheng tlangval Sena Ralte leh Serchhip tlangval Daniel Lalhlimpuia te a rawn hruai. Roca hian Chaltlang tlangval Sawmtea chuan hmabak a nei eng hle nia a hriat thu vawiin khan Aizawl Press Club ah a sawi.

100 AH 100

Khalid Jamil a hnuaiah Aizawl FC in RG Stadium – ah an khingpuite an la hneh fai vek a, record tha tak nen club talbuai mek Bengaluru FC an mikhual dawn. Jamil hian a player te zingah chhawr theih loh tur a nei lo a, Churchill Brothers an hneh tuma suspend a tawk vanga inlan thei lo Lalruatthara chu a inlan maitheih thu a sawi a, game hmasa khel tha tak Chullova a la kawl bawk.

Aizawl FC chet that chhan ber pakhat Mahmoud Al Amna pawh kan hmuh ngei a rinawm a, Syrian international hlui hi inkhel hautak hmachhawn thang a nih avangin player tha kawl hnem BFC tuk zawl tur chuan a khelh that a tul ang.

He inkhel en man hi cheng 100 chauh a ni dawn a, he inkhel en te tan hian inkhelh zawhah hian February ni 20 a Aizawl FC leh Kingfisher East Bengal inkhel enna ticket chu ticket bung kengin a man chanve in a lei theih bawk ang.