Champion lai Chhinga Veng an vannei

Posted on September 8, 2018September 8, 2018 by ZoFooty

2 min read

McDowell’s No 1 Soda Mizoram Premier League Season 7 match hmasa berah Chhinga Veng FC chuan kai thar Chawnpui FC chu minute 83-naa Lalromawia goal hmangin 1-0 in an hneh a, September 6 khan Lammual inkhelah hian goal awmchhun khungtu Samlukhai tlangval hi man of the match a thlan a ni.

Chawnpui vanduai
Chawnpui FC-in I Day Football-ah goal khatin Chhinga Veng FC an hneh lo a, hemi ṭuma goal awmchhun khungtu MS Dawngliana chu khup hliam vangin bench-ah dah a ni.

Chhingcows tlarhma an hriam tawk lo a, first half-ah Lalrammawia, Romawia, F. Lalnuntluanga leh Lalremruata ten goal khungna chance nei bawk mah se Chawnpui keeper Lalmalsawma Hmar tan buaina tur a awm lo.

Chawnpui tan Vanlalthanga a khel ṭha a, Hualnghohmun tlangval hi mual sir lamah a nung ṭha hle. Ani bakah Ramhlun North tana khel tawh Jerry F. Zonunsanga chu Chhinga Veng tan buaina tham a tling.

MPL an khelh theihna tura Chawnpui tana goal khungtu David Laltlansanga’n first half-ah crossbar chung chiahah a pet a, second half-ah keeper chiah hmachhawn hnuah goal sirah chiah a pet bawk.

Second half-ah Chhinga Veng aiin Chawnpuiin chance ṭha an nei a, amaherawhchu minute 83-naah substitute Jacob Lalrawngbawla ball pek chu Romawia’n box pawn aṭangin goal kil tak a pet lut a, he goal hi team pahnih danglamna a ni.

Coach ngaihdan

Chhinga Veng coach Lalsangzuala Hmar chuan, “Kan vannei hle a ni. Chutihrualin kan duh ber point thum kan hlawh chhuak a, kan beisei angin khel chhuak lo mah ila kan result erawh a lawmawm,” tiin point thum an hmuh avanga an lungawi thu a sawi.

Chawnpui coach Laldinthara chuan, “Chak thei tur kan ni a, chance pawh kan nei ṭha. Amaherawhchu, point thum chu sawi loh point kan hmu lo hi kan vanduai a ni,” tiin Vanglaini a hrilh.

Source : www. Vanglaini.org

Thlirna Tawi
Chhinga Veng FC 1-0 Chawnpui FC
CVFC : Lalromawia 83′
MoM: Lalromawia, Chhinga Veng FC