#ZoFooty

CHAMPION TURA RINKAI ENGLAND
England-in Zirtawpni zan khan Wembley Stadium-ah Albania 5-0 in an sawp a, Three Lions hian World Cup an hnaih ta hle. Gareth Southgate leh a hote hian Qatar zinna tur ticket an hauh lawk tawh a, a man an la pe lo chauh a ni tawh.

Germany chungchang thui tak tak chhiar tur a awm ṭhin a, Premier League en ṭhin tam zawk chuan Hansi Flick leh a naute chanchin aiin England chanchin an chhiar châk zawk. Die Mannschaft chanchin an ziak thei a nih chuan eng nge England chanchin kan ziah theih loh bik ang le, Wembley Stadium-ah Three Lions-in an tuk zal alawm tiin kan han ri ve nghal pawp pawp e.

CHAMPION TURA RINKAI
World Cup khel tura tlin hauh hmain champion rinkai han ti deuh thawr teh ang. Ṭan chhan tur a awm tlat. England hian qualifier-ah hian hneh loh an la tawng lo a, goal 29 tehmeuh khungin goal thum chauh an chhuah.

Euro 2020 kan thlir chuan final an lut a, Southgate-a hote hi an vannei lo, an ṭha tak tak a ni. Position tin hi thlir kual teh ang.

1. STRIKER : Harry Kane a awm a, khawvela ber ni pha a ni. Albania lama a hattrick siam kha PERFECT HATTRICK an ti. Chumi awmzia chu goal thum khung nan a lu, ke vei lam leh ke ding lam a hmang tihna a ni a, inkhel en chuan a goal thumna mawi zia an hre thei bawk ang.

England ṭantu tana chanchin lawmawm chu Tottenham Hotspur-in Antonio Conte an lalut a, Italian manager hian Spurs player-te fitness a ṭha tawk loah ngaiin an ei leh in thlengin a thlak. Romelu Lukaku-a’n Conte hnuaiah harhtharna a chang a, England striker ṭha sa Kane hi Conte hnuaiah a ṭhat belh ang.

Kane awm lo ta se, striker dang awm te chu Ollie Watkins, Dominic Calvert-Lewin, Tammy Abraham leh Patrick Bamford te an ni. Heng ho hi erawh hahipa fak an harsa, qualfier-ah pawh an vaia an khelh zat minute chu 284 minutes chauh a ni a, Kane a khelh zat chanve an pha ṭawk.

2. GOAL KHUNGTU DANG : Southgate hian formation hrang hrang a nei ve a; 4-3-3 hi a hman rim ber chu a ni a, 4-2-3-1 leh 3-4-3 te a hmang ve bawk. A tawi zawng chuan tlarhmaah forward pathum a hmang ṭhin a, Kane-a tluk thoin a bula awm te an ṭangkai ṭhin tihna ni.

Euro 2020 kan thlirlet chuan Raheem Sterling pawimawhzia kan hmu ang a, qualifier-ah pawh Sterling hi Kane aia a khel tam zawk. Man City player dang Jack Grealish leh Phil Foden te an awm bawk. Man City player-te leh Kane an dam chuan an ṭha tawk viau e.

Manchester United player Marcus Rashford leh Mason Greenwood te pawh an la awm a, anni erawh qualifier-ah minute khat pawh an la inlan lo. Chutihrualin March, April leh September thlaah kha chuan Jesse Lingard pawh a sira lung te pawimawh a ni ṭhin a, tunah erawh Man United tana a khelh phak miau loh avangin squad-ah a awm ta lo.

Jadon Sancho pawh a danglam lo, Andorra nen khan bul ṭanin ṭha takin khel mah se minute 72 a khelh bak kha tun qualifier-ah a khel bik lo. Man United-in talent nei ṭha an kawl ve nual si, Ole Gunnar Solskjaer hnuaia an chet chhiatna hi club bakah Three Lions-in an tuar a tih theih awm e.

3. GOAL VENGHIMTUTE : Euro ang deuh kha a ni a, England tlarhnunga rinrawlte chu Kyle Walker, John Stones, Harry Maguire leh Luke Shaw tihin a sawi theih. Match pawimawhah chuan heng player palite hi an lut ṭhin.

Amaherawhchu Premier League lamah Chelsea an che ṭha a, Albania lakah chuan defence panga awmin Blues wing back pahnih Reece James leh Ben Chilwell ten bul an ṭan at mai. Wing back inchuh boruak pawh a sang thei.

Chutihrualin tarlan tawh angin rinrawl anga sawi zinga pathum Kyle Walker, John Stones leh Harry Maguire te chuan bul an la ṭan tih hriat a ṭha. England hian Maguire leh Stones te thachhang dawl turin Conor Coady, Tyrone Mings leh Fikayo Tomori te an hmang ṭhin bawk.

Premier League en ṭhin chuan Man United captain hi Mangura tiin hlimawm taka inkhel en nan an hmang ṭhin a, amaherawhchu England-a Maguire hi Man United-a Maguire aiin a ṭha zawk. Albania lakah goal hmahruai a khung a, tlarhnungah pawh a nghet ṭha viau.

4. MIDFIELD HI : England midfield-ah Declan Rice leh Kalvin Phillips ten hmun pawimawh an chang a, mak ang reng tak erawh player pahnih hi Big 6 tiha chhiar zingah an tel lo. Phillips ngat phei chu tun qualifier-ah hian a khel tam a, England player zingah amah aia khel tam panga chiah an awm.

Chutihrualin Jordan Henderson hming lam hmaih a thiang lo a, Liverpool captain hi a dam ṭha a nih chuan rinrawl ni tlak a ni. Hendo hian Albania lakah goal a khung a, starting eleven-a tel tam tumin ṭan hmun a rem ṭha sauh sauh.

Chelsea midfielder Mason Mount hi chu goal khungtu zingah a tel theih mah zawk a, a nawrtu lam deuh a ni. Southgate hian Mount hi a dah pawimawh a, Blues midfielder aia khel tam chu Man City player pathum John Stones, Raheem Sterling leh Kyle Walker te chauh an awm. Tun ṭum qualifier-ah erawh Mount hi squad-ah a awm lo.

Arsenal chhuanvawr Emile-Smith Rowe pawh England senior team tan a khel ta a, kum khat chhunga hmasawn dan a zirin Qatar zin thei tur zingah a tel thei ang. Albania nena an inkhel ni loin tun season-a Arsenal tana a khelh dan thlirin EMS hi chu a ṭha ve thlawt. Club tana khelhpui Bukayo Saka erawhin hmun pawimawh a chang tawh tih Euro aṭangin a hriat theih a, qualifier chauh thlir erawh chuan match li a khelhah ṭum hnih chiah bul a ṭan avangin squad tichhahtu ang chauh a ni.

5. GOAL VENG : Qualfier-ah hian Southgate-a’n keeper pathum a hmang tawh a, mi ṭhenkhatin Qatar-a rinrawl tura an duh ber Aaron Ramsdale a la inlan lo. Keeper chhawr tawhte chu Jordan Pickford, Nick Pope leh Sam Johnstone te an ni.

Pope hi Burnley tan a khel mek a, Sam Johnstone hi West Brom tana khelh a nih avangin Championship-ah a awm mek. Hei vang hian Ramsdale tan second keeper nih chhoh hi thil har tur niin a lang lo a, chutihrualin first keeper nih erawh a har ang.

England hian match hnuhnung berah November 15, Thawhṭanni zan hian San Marino an tlawh dawn a, Southgate-a’n a tih ṭhin dan ang deuhin a team ngam zawngah player a thlak leh hlawk ang. Three Lions tana bul ṭantu zingah Ramsdale bakah Emile Smith-Rowe te pawh awm thei tura ngaih a ni.

Gareth Southgate-a’n tun ṭum qualifier-ah hian player 32 a hmang a, an khelh dan leh inrem dan ziah zel la châkawm mah se a thui lutuk chuan ninawm lamah a kal ṭhin. Hemi chinah hian duh tawk phawt ang. Comment lamah kan hmun dante sawi chhunzawm ila.