Champions League final inkhel boruak tang takah Chelsea chuan Kai Havertz a goal thun hmangin Manchester City an hneh a, an club chanchina a vawi hnih nan Champions League nomawi an chawi.
He inkhelah hian Manchester City in bul tan tha zawk mahse an hun neih an hmang tangkai zo lo a, minute 7-na leka Ederson – a ball pek Raheem Sterling – a thun loh chu uiawm tak a ni. Hemi hnu hian Phil Foden leh Ilkay Gundogan te’n hun tha nei ve leh mahse an hmang tangkai zo lo a, Chelsea lamah striker tlanchak Timo Werner langsar viau mahse a finishing a tha tawk lo.
First-half tawp dawn minute 42-naah halfway line bul atanga Mason Mount a ball pek tha zet chu Kai Havert a’n umlutin City defender Zinchenko leh keeper Ederson te tlanpelin goal – a thun. Havertz – a goal thun theih nana Werner a’n City defender a lo pawhpen dan kha hmuh hmaih chi a ni lo.
Second half – ah Pep Guardiola’n Fernandinho luhtirin midfield – ah insawh ngheh lehzual a tum a, Sergio Aguero chu City tana a game hnuhnung ber khelh tir a ni bawk. Team pahnih te’n half-chance insiam zeuh zeuh mahse goal a luh belh lo a, injury time – a Riyad Mahrez a volley goal kham chunga thlawk kha City fans te’n an ui vawng vawg ngei ang. Chelsea tlarhnunga ding khawng tlat captain César Azpilicueta leh a hote an fakawm takzet.
Inkhel pumpui thlirin Thomas Tuchel – a’n a player te a remkhawm fuh zawk niin a lang a, defensive midfielder leh striker pangngai tel loa khel City game – ah ‘kim lo’ a awm tih a lang. Manager pahnihte’n inhliam vangin an player tha lakchhuah an ngai ve ve a, first-half ah Chelsea in an defender pawimawh Thiago Silva an chan a, amah thlaktu Andreas Christensen a khel chhe lo. City lamah an captain Kevin De Bruyne inhliam vangin lakchhuah a ni bawk.
Chelsea tlarhnung an fakawm a, minute 90 chhungin an keeper Edouard Mendy tan hna harsa an siam lo. Full-back pahnih Reece James leh Ben Chilwell te’n City tlarhma player tha ho an dang chat tha a, khelmual laia N’Golo Kante hnathawh sawi hmaih a thiang lo bawk.
Nikum final – a chak lo zawk Thomas Tuchel a’n thla 4 chauh a enkawl hman tihin UCL nomawi a chawi pui a, manager a nih hnua UCL nomawi vawi 2 chawi tawh Pep Guardiola erawhin a la nghah leh rih a ngai dawn ta a ni.
Manchester City 0-1 Chelsea (FT)
Havertz 42′
