CHAMPIONS LEAGUE FINAL CHHINCHHIAH TLAK ZUAL THENKHAT

Final ropui tak tak a awm a, dangdai tak tak a awm bawk. Champions League Final ropui / dangdai / eng emaw vanga sawi zui leh hriatreng hlawh te zinga mi tlema zawng:

THE KARIUS/BALE FINAL

Kum 2018 a ni a, Final-ah Real Madrid leh Liverpool an intum a nih kha. He Final-a sawi zui hlawh player leh he match-in sawi zui a hlawhna chhan lian tak chu Karius leh Bale an ni.

Liverpool goal vengtu Karius a che nawi hle a. A mit a del thut emaw tih mai turin a ball man chuan a hma lawka ding Benzema ke ah a va vawm a, awlsam takin Benzema’n goal-ah a chan tir. Si an phurh atanga Minute 4-na lekah Mane chuan Liverpool si phurh sut mah se, minute 64 naa Bale-a Bycycle kick ropui hmangin Real-in hma an hruai lehnghal. He goal hi he match sawina tawngkam pakhat atana ‘Bale Final’ an tih chhan pakhat a ni. Bale vek hian minute 83 naah meter 37 a hla atangin shot a nei a, Ball zawna lo ding Karius chuan an goal-ah a nam lut – Real Madrid chak nemnghehna a ni zui bawk. He goal hian a tha zawngin Bale a tarlang a, a chhe zawngin Karius a tarlang thung.

Inkhelh zawhah Karius a tap a, amah vangin an champion lo tih pawmin ngaihdam a dil nasa hle. Mahse, a ngaihdam dilna hian fans tam tak a hmin zo lova, social media kal tlangin ‘thaha vauna’ a dawng hnem hle!
A hnuah Video an en let atangin, Karius-an a tihsual hmasak hma lawka Ramos-an Karius a nghawk chu en zui tham niin an hria a, Karius hi damdawiinah endik nghal a ni. An endik hnuah physiatrist Ross Zafonte chuan Karius-an a lu-a na a tawrh ang chu inkhelh laia player perfomance-ah nghawng nei ngei tura ngaih a nih thu a sawi.

DERBY FINAL-A VANPUI CHIM

Minute 36 naah Godin chuan Atletico Madrid tan goal a khung a. Minute 90+2 thlengin goal awm chhun a ni. Atletico Bench lam pawh a ruk tak chuan hamrik hnuhnung rik ruala mual chhunga tlan luh an inring tawh viau ang!
Mahse, football-ah chuan thil hi a chiang lawk lo thin. Minute 90+3 a Ramos-a Head goal vangin tun thlengin Atletico no mawi bawmah Champions League Trophy a la awm loh phah !

Extra time an khel a, Bale, Marcelo leh Ronaldo (Pen) ten goal khat theuh an khung belh a, kum 2014 UCL Final hun a tawp meuh chuan 4-1 in Real Madrid in an City Rival an hneh daih! Atletico tan vanpui a chim a ni.

DROGBA FINAL

Kum 2012 a ni a, Bayern Munich khelmualah Bayern Munich leh Chelsea ten Final an khel. Minute 83 naah Muller chuan goal a khung. Chakna goal ni mai tura ngaih mai awl tak a ni. Mahse, minute 88 naah Drogba a rawn lang heu mai! Hun tawp dawn hnaiha an si phurh chu hun tawp dawn tak takah a sut – Khami zan khan Blues ho mitah Drogba aia hmeltha an awm awm lo e !

Extra time an khel a, goal a luh belh lo. Penalty shootout hmangin chak zawk an zawng. 3-3 a ni a, Drogba a la awm. A rawn pen chhuak, a pet goal – an club History-a a vawi khat nan Chelsea an champion!

MAN UTD PLAYER TEN MESSI TE INKHEL AN EN

Kum 2011 Final-a Sir Alex-a nau ten Messi leh a thiante inkhel hnai tak atanga an en kha Sir Alex-a meuh pawn, “Hetiang em em hian eng team mahin min la thukru hneh ngai lo,” a ti hial a nih kha. UCL Final-ah game-a insawpna nasa ber pawl anga hriat zui a ni. 3-1 in Barcelona an chak.

MIRACLE OF ISTANBUL

Kum 2005 Champions League Final tih ai mahin, Miracle of Istanbul tia mi tam takin an hriat lar zui zawk inkhelah hian 1st half ah AC Milan-in 3-0 in hma an hruai a, rilrua trophy suangtuah chungin chawlh lawk an hman a rinawm! Mahse, chawlh lawk hmang tangkai Liverpool-in 2nd half minute 15 chhungin an si phurh an sut zo vek a, Penalty shootout hmanga chak zawk zawn niin 3-2 in Liverpool an chak a, an champion zui. Istanbul-a Liverpool comeback ropui tak hi Comeback ropui chungchang sawi a nih chuan hmaih thiang a ni ngai lo ang.

A HUNTE-A RAH THIN

Minute 90 a nih pawha si la phurh chuan, pressure sang tak karah chak tura beiseina a chau tawh hle ang a, Extra Time khel tura si phurh sut chauh pawh suangtuah phak aia sanga vanneihna a ni ang. Chu vanneihna dawng tur chuan huaisen a ngai khawp bawk ang.

1999 Final a ni a, Basler-an minute 6 na leka a goal khung chu Bayern Munich-in an champion pui teuh hle. Mahse, minute 90+1 ah ‘mi bik’ Alex Fergusion-a naute an ni tih Man Utd-in an rawn show a, hemi Tournament-a a goal hmasa ber leh awm chhun ni turin Sheringham chuan Ryan Giggs-a pet (shot) sual chu goal-ah a lo chan tir a, a hunte-a rahin Man Utd si phurh a sut. Hun tawp tepa goal an chhuah vanga Bayern thinphu a reh hmain, minute 81 naa Andy Cole thlaktu, tuna Man Utd manager Ole Gunnar Solskjaer hian Man Utd History-a goal pawimawh bik zinga chhiar tel loh theih loh tur goal chu minute 90+3 ah a rawn khung ve leh a, Man Utd an champion ta!
He match hi Man Utd captain Schmeichel-an Man Utd tana a game hnuhnung ber a ni zui bawk.

Heta tarlan aia ropui emaw, chhinchhiah tlak dang a awm thei bawk a. Mi mal ngaihdanah a innghat ang. Chutihrualin, tarlan vek sen a ni lo bawk a…