Chanmari FC-ah Dodoz

Mizoram Premier League Season 2 champion Chanmari FC chuan an official facebook page-ah ‘Drogba leh Yaya te ram atangin Leonce Dodoz ka lalut e’ tiin chhuang takin an ziak.

Chanmari FC hi MPL5 khelh mekah pahnihna an ni mek a, semifinal dinhmun hauh chiang turin point tam an mamawh tawh lo. Chumi awmzia chu Lalsangzuala Hmar hoten Ivorian forward Dodoz an lakluh chhan chu champion a duh vang a ni tih a ni tih a chiang hle.

Ivorian forward Dodoz hian CFL: Calcutta Football League khelh zawh takah Mohammedan chu pahnihna nih puiin goal li a a khung bakah assist vawi li a nei a, record thlirin foreigner vantlang chunglam niin a lang.

Dodoz hian November 5, Inrinni khan Aizawl a rawn thleng a, Chanmari FC training a zawm thuai tura ngaih a ni. CFC hian an match hnuhnung bera Bethlehem VT nena an inhnehtawk tumin an defender thar Ugochukwu Godswill (Ugo) chu minute 78-naah luhtirin Nigerian defender hian Lalmuanawma a thlak.

Inkhelh banah coach Lalsangzuala Hmar chuan Ugo hian an game plan a hriat chian hma loh chu starting eleven a chan loh tur a thu a sawi a, BVT coach hlui Sanga hi a thusawia a ding nghet a nih chuan Ugo leh Dodoz te hian inkhel bul tan turin training-naah theihtawp an chhuah a tul dawn a ni.

Chanmari hian November 10, Ningani zan hian Chhinga Veng an hmachhawn dawn a, foreigner pahnih khelh leh khelh loh chu hunin a hril ang.