Chanmari FC-in Aizawl FC an hlau – Rooney Opa

aizawl-fc

Mizoram Premier League Season 2-ah Chanmari FC an champion a, hemi hnu chi chuan K. Malsawkima kaihhruai Aizawl FC an ngam lo char charah a ngaih theih. AFC-in Mizoram history siamin I League khel hmasa ber an nih bakah MPL a zawna champion hmasa ber an ni a, Chanmari FC-in hun pawimawh I League club an ngam thin lo.
October 26, Inrinni zanah Aizawl FC chuan 2-1 in Chanmari FC an hneh. I League club tan Bright Middleton Mends leh F. Lalremsanga ten first half-ah goal an khung a, Chanmari FC-in Malsawmfela penalty hmangin second half-ah chhang let mah se man of the match-a thlan Aizawl FC defender Jonathan Lalhriatkima a khelh that avangin goal dang an khung belh tawh lo.

MPL5 Round hnuhnung ber chu khelh zawh a ni ta, Chanmari FC leh Aizawl FC te hian December 2, Zirtawpni zanah semifinal 1st leg an khel ang. December 1-ah league round hmahruaitu Bethlehem Vengthlang leh Chanmari West Fc ten semifinal hmasa zawk an khel dawn a, MPL history-ah league hmahruaitu an la champion ziah.

Inkhelh hma dinhmun
Team pahnihte hi semifinal inhlangkai tawh ve ve niin Aizawl FC hi palina ni mek an ni a, Chanmari FC hi pahnihnaah an awm thung. Zanin hian Aizawl FC an chak zawk a nih chuan pathumna niin Chanmari FC hi pahnihna an ni ang a, semifinal-ah an inhmachhawn ang. Chanmari FC an chak a nih pawhin pakhatna an ni ang a, Aizawl FC hi palina niin semifinal-ah an inhmachhawn tho ang.

An inhnehtawk erawh chuan Chanmari FC hi pakhatna niin Aizawl FC hi pathumna an ni ang a, semifinal-ah Chanmari FC leh Chanmari West FC inhmachhawnin BVT leh Aizawl FC an inhmachhawn thung ang. Inkhelh hma hauhin semifinal-ah MPL final rematch chu a beisei lawk theih.

AFC an mawi
Lammual khawvawt hnuaia inkhelah hian team pahnihte an ti mai mai lo tih a hriat a, Aizawl FC in an team siksawi nualin tlarhnungah Jonathan Lalhriatkima (Jona-a) leh Under 18 player Hmingthanmawia (Valpuia) te din dun tirin an khel chhe lo hle.

Tlarhmaah Brandon Vanlalremdika leh F. Lalremsanga te an hlauhawm a, minute rukna lekah Brandon VL Remdika cross chu Bright-a’n leia a sawh hmain a volley nghal a, goal mawi tak a ni.

Hemi hnu hian Brandon bawk hian ball tha taka petin Chanmari goalkeeper F. Lalmuanawma’n tha zetin a lo dang a, heta tanga corner an hmuh hi B. Zoramthara (B. Thara) chuan petin AFC defender Jona-a’n a tauh lut teuh hle bawk.

Aizawl FC tlarhma lama William Lalnunfela, Bright Mends leh Remsanga te ball inpe kual a hmuhnawm a, goal pawh an thun teuh thei thin hle. Chanmari FC keeper Lalmuanawma zarah Lalsangzuala Hmar hote an mualpho a, chutichung chuan
goal erawh an chhuah belh tho. Chawlhlawk hma chiahin Remsanga chuan B. Zoramthara pass tha hmuin box pawn hret atangin mawi zetin a pet lut a, 2-0 in first half a tawp.

Dodoz a hmuhnawm
Chanmari FC-in an match hnuhnung bera Ramhnlun North an hnh tum an pha lo a, AFC an hmachhawn vanga buai an nih leh nih loh erawh zawhna chhan mai theih loh a ni.

Chanmari khelh chhiat niah Ivorian forward Dodoz a hmuhnawm thung a, Aizawl FC tlarhnung tan mang chhia thlentu a ni. Kolkata club Mohammedan SC atanga an hawh Dodoz hian vawi tam Chamari wing back te a tlan pel a, amaherawhchu Ivorian forward hian a hmawr a bawk thei bik lo a, a teammate an thlawp tha tawk lo – goal kaw khung tawh Sawmfela meuh pawh a bang lo.

Chanmari hian midfield-ah Malsawmtluanga (Msa), Rochhingpuia (Chhinga) leh Lalrinchhana te dahin mual laiah an tha zawk hret a, hei vang hian tlarhmaah Malsawmfela, Dodoz leh Vanlalbiaa Chhangte (Mabiaa) ten hunawl hmuin vawi tam tak AIzawl FC tlarhnung a nghing mah se AFC defence laia inkawp Jona leh Valpuia te tawnhriat tlemna an hai lang thei lo.

Minute 30-naah Chanmari FC midfielder R. Malsawmtluanga’n freekick tha takin a pet a, Aizawl FC keeper Lalawmpuia’n dang mah se a tih per avangin a vawi hnih dannaah a inhliam a, keeper Zothanmawia an hahdamtir zanah a chawl rei lo.

College Veng tlangval T. Mawia’n AFC tlarhnung a rawn hnawh pui tha a, first half-ah hian a Sawmfela goal khung tur tha takin a dang nghal. Second half-ah erawh Chamari FC-in penalty an hmuh avangin T. Mawia’n goal chhuah loin hun a hmang tluan thei lo a, Sawmfela penalty a bum.
Sawmfela v Dampuia
Ramhlun South tlangval Sawmfela’n tun season-a goal 10-na a khung a, Chanmari West captain Laldampuia nen an goal khung zat a inang chiah.

West Warrior captain Dampuia’n match zawng zawng a inlan vek laiin Sawmfela’n match hmasa bera Dinthar FC an draw tuma a inlan ve loh avangin tunah hian season tawp se top scorer tur zawk a ni. Chanmari FC forward hian MPL3-ah Mizoram Police forward Lalbiakhlua goal khung zat a khung a, amaherawhchu a khelh tam zawk avangin top scorer chawimawina a hi a chan tawh.

Sawmfela khelhna Chanmari FC leh Dampuia awmna Chanmari West ten semfinal an khelh ve ve dawn avangin top scorer a la chiang lo a, MPL a ngaihnawm phah sawt bawk ang. Anni pahnih hnaih bertu Dinthar FC forward Michael Lalremruata’n goal riat khung tawh mah se semifinal an khelh tawh dawn loh avangin beisei tur a nei tawh lo.

Engtin zel?
An history thlir let chuan Chanmari FC hian Aizawl hi an hlau angin a sawi theih a, semifinal hmaa thutlukna siam thawt thawt a fuh lo.

MFA Super Cup final-ah Aizawl FC an chungnung tawh a, semifinal-a an chak nawn chuan ‘Chanmari FC-in AFC an hlau’ tih tawngkam hi a dikah a ngaih theih ang.

December 2, Zirtawpni zanah MPL final rematch khelh a ni dawn a, chumi zawh chuan ZoFooty review hi lo chhiar la, ‘an hlauh leh hlauh loh’ thutlukna erawh semifinal second leg December 9 zanah a hriat theih chauh ang.

ZoFooty Statistics
Aizawl FC FC 2-1 Chanmari FC
AFC : Bright Middleton Mends 6′; F. Lalremsanga 45’+1
CFC : Malsawmfela 56’ (P)
48% Ball Possession 52%
11 Shots 17
7 On Target 7
1 Yellow Cards 1
0 Red Cards 0
MOM: Jonathan Lalhriatkima (Aizawl FC)
Powered by Rainbow Multibrand Mobile Showroom.

Tute nge khel?
Aizawl FC: Lalawmpuia, Jonathan Lalhriatkima, Ricky Lallawmawma, Brandon Vanlalremdika, Lalnuntluanga, F. Lalremsanga, William Lalnunfela, B. Zoramthara, Bright Middleton Mends, Lallawmzuala, Hmingthanmawia.

Subs: Zothanmawia, Lalhriatrenga, Lalramhmunmawia, Lalthakima, Lalawmpuia Hnamte, Vanlalthazuala, Rochharzela, Jonathan Lalrawngbawla, Benjamin Eniwo Onome.
.
Chanmari FC: F. Lalmuanawma, Umunnakwe Ugochukwu Godswill, Ramfangzauva, MS Dawngzela, Lalmuanawma, R. Malsawmtluanga, Lalrinchhana, Vanlalbiaa Chhangte, Rochhingpuia, Malsawmfela, Dodoz.
.
Subs: Lalrinnunga Hnamte, C. Vanlalhriatpuia, Lalrinchhana Tochhawng, Thomas Lalengkima, Lalruatfela Zote, Rosangliana, Lalrammawia, Lalmuanzova, Isak Vanlalruatkima

Team Dinhmun

# Team Pld W D L GF GA GD Pts
1 Bethlehem VT 14 8 3 3 15 12 3 27
2 Chanmari FC 14 7 5 2 24 13 11 26
3 Aizawl FC 14 7 3 4 15 10 5 24
4 Chanmari West 14 6 3 5 20 15 5 21
5 Chhinga Veng 14 4 4 6 18 19 -1 16
6 Dinthar FC 14 3 7 4 16 20 -4 16
7 Ramhlun North 14 3 3 8 12 21 -9 12
8 Zo United 14 1 6 7 13 23 -10 9

Photo Credit : Aizawl FC Facebook Page