Chanmari FC-in final an lut?

Estimated read time 5 min read

chanmari-fc-aizawl-fc
Aizawl FC-in a zawna Mizoram Premier League vawi thum champion an tumna chu Chanmari FC lakah an thamral dawn niin a lang. Zanin khan Lammualah Lalsangzuala Hmar hoten K. Malsawmkima enkawl I League club chu 4-1 an ngaisa a, minute 90 khelh tur la awm mah se MPL champion lai hi an thochhuah theih a beiseiawm loh.

Goal nga luhna
Zirtawpni zan MPL5 semifinal-ah Chanmari an chungnung a, goal li lai an khung chungin goal tam zawk an khung loh avangin result-ah an lawm a kim lo ang.

Chanmari tan hian Vanlalbiaa Chhangte-in minute thumna lekah goal a khung a, Lalruatfela Zote-in minute 11-naah goal hnihna khungin Aizawl FC-in Lalawmpuia Hnamte hmangin minute 21-naah chhanglet mah se Sanga hote an talbuai lo. Minute 22-naah AFC captain Rohmingthanga’n an lamah a tilut a, Electric Veng tlangval Lalrinchhana’n minute 49-naah goal lina khung goal dang a luh belh tawh lo.

Aizawl FC defender Ricky Lallawmawma chu minute 78-naah hnawhchhuah a ni a, Chanmari lamin an tam zawkna an hmang tangkai thei lo. Man of the match-ah Chanmari goal thumna khungtu Lalrinchhana chu thlan a ni a, Electric Veng tlangval hian goal a khung bakah midfield-ah ball a chhuhsak hnem hle.

Chullova tel lohna
Aizawl FC tlarhnung a buai tluan chhuak a, MPL3 best player Lalramchullova awm loh a langsar hle. Armed Veng tlangval Chullova bakah hian inhliam vangin Lalrinzuala Khiangte chu inkhel bul tantir a ni lo a, AFC midfielder zinga tlarhnung pui thiam ber H. Lalbiakthanga awm loh a langsar bawk.

AFC-in league match hnuhnung berah Chanmari FC 2-1 in an hneh a, he inkhel hian nghawng lian tak a nei. Mala’n a tlarhnung defender Hmingthanmawia (Valpuia) leh Jonathan Lalhriatkima te chunghah rinna a nghat chhunzawm a, amahaerawhchu boruak sangah an naupanna a lang. Chanmari FC an khelh that bawk avangin tlarhnung zinga tawnhriat nghah ber Lallawmzuala pawh a talbuai a, minute 27-na lekah Shillong Lajong leh Royal Wahingdoh defender hlui hi Rinzuala’n a thlak.

I League club an vanduai ve bawk a, goal khat an khung hnua ang goal khung theihna an ngei nghal. Brandon VL Remdika ball tauh chu goal zawnah kal mah se goalline atangin Chanmari defender Lalrosanga’n a tauh chhuak a, an siphurh sut an tum luatah goal hnihna an chhuah hma lutuk bawk.

Minute 21-naah AFC hian Opitea hmangin goal khung mah se minute khat hnu lekah goal an chhuah lehnghal. Aizawl FC player zinga tawnhriat midfielder Rohmingthanga’n a tauh lut a, hei hian an vanduai tih a nemnghet.

Second half-ah substitute B. Zoramthara’n a penalty hlawhchhuah goal-ah a chantir thei lo a, goal ngat se chuan Chanmari an buai phah ngei a rinawm. Amaherawhchu AFC player-te an talbuai zawk a, Chanmari FC laka an mualpho avangin ngai an awh tawh lo. Minute 78-naah Ricky-a’n yellow card vawi hnih a hmu a, hnawhchhuah a ni. Kumin I Day Footballl best player Ricky awm lo hi second leg-ah I League club-in an tuar khawp ang.

Mabiaa Show
Hriangtlang tlangval Mabiaa chu man of the match-ah thlan ni lo mah se a khel tha tih zep theih a ni lo. Chanmari West winger hlui hian goal hmahruai a khung hnuah Fela Zote khung tur a siam sak a, Rohminga’n an lama tih goal hi Mabiaa thawhrah a ni.

Hei chauh hi a ni lo, AFC defender Ricky chu Mabiaa vanga hnawhchhuah a ni a, substitute Rinzuala pawhin Hriangtlang tlangval vang hian yellow card a hmuhphah bawk.

Chanmari an tha
Inkhelh banah Aizawl FC coach K. Malsawmkima chuan, “Chanmari FC hi team tha an ni a, player pawh an nei tha. Hetiang player chu nei ila, I Day Football leh MFA Super Cup ah khan ka champion ang,” tiin a sawi.

AFC boss tawngkam hi Sanga tan hriat nuam a ni lo ang, Chanmari FC hian I Day Football final an thlen theih loh bakah MFA Super Cup final-ah Aizawl FC an hneh lo. Mala hian Chanmari FC-in player an neih that ngaihtuahin result tha an nei lo tih a sawina a ni a, semifinal-ah erawh an thatna ang takin an khel chhuak tih a zep lo thung.

Sanga a fimkhur
Chanmari FC coach Sanga chuan, “Goal khat tal kan khung belh leh loh kha ka ui a ni,” tiin a sawi a, inkhel thlirin a thusawi hi a dik a ni.

Chanmari hian goal dang khung belh theihna tur hun tha an nei a, minute 50 hnu lamah goal an khung tawh lo. Chanmari hian goal khung belh leh ngat se chuan final kalkawng hi dal a harsa lehzual ngei ang.

Goal an khung belh loh chung pawhin Chanmari dinhmun a tha a, Chanmari coach anmahni tantute chu minute 90 dang khelh tur a la awm avangin final lut chianga la inngai lo turin a hrilh.

Mak ang reng tak erawh Chanmari tana goal khung tam ber (goal 10) Malsawmfela’n goal li an khung tumin goal a khung lo a, hei vang hian MPL5-a goal khung tam ber chu goal 11 khung tawhtu Chanmari West captain Laldampuia a ni.
Tute nge khel?
Chanmari FC (4-4-2) : F. Lalmuanawma, Umunnakwe Ugochukwu Godswill, Lalrinchhana Tochhawng, Thomas Lalengkima, C. Lalrosanga, R. Malsawmtluanga, Lalrinchhana, Vanlalbiaa Chhangte, LalruatfelaZote, Malsawmfela, Dodoz.
Sub: MS Dawngliana, C. Vanlalhriatpuia, Ramfangzauva, MS Dawngzela, Rochhingpuia, Rosangliana, Lalrammawia, Lalmuanzova, Francis Rambeiseia.

Aizawl FC (4-3-3) : Zothanmawia, Jonathan Lalhriatkima, Ricky Lallawmawma, LalawmpuiaHnamte, Brandon Vanlalremdika, Rohmingthanga, Lalnuntluanga, William Lalnunfela, Bright Middleton Mends, Lallawmzuala, Hmingthanmawia.
Subs: Lalawmpuia, Lalhriatrenga, Lalramhmunmawia, Lalrinzuala Khiangte, Vanlalthazuala, Rochharzela, F. Lalremsanga, B. Zoramthara, Albert Zohmingmawia.

ZoFooty Statistics
Chanmari FC 4 – 1 Aizawl FC
CFC : Vanlalbiaa Chhangte 3′; Lalruatfela Zote 11′; Rohmingthanga 22′(OG); Lalrinchhana 49′
AFC : Lalawmpuia Hnamte 21′
MoM : Lalrinchhana, CFC
49% Ball Possession 51%
17 Shots 12
9 On Target 4
1 Yellow Cards 3
0 Red Cards 1
Powered by Rainbow Multibrand Mobile Showroom

You May Also Like

More From Author

3Comments

Add yours

+ Leave a Comment