CHAPOCOENSE TAN RONALDINHO LEH RIQUELME ?

Football khawvel a chhiatna rapthlak ber pawlin a tuam mek Brazilian club Chapocoense tan South American legend pahnih Ronaldinho leh Juan Roman Riquelme te chuan khelh an hnial lo niin khawthlang media te’n an tarlang.

Chapocoense hian Colombia – a chhiatna rapthlak takah khan player 19 zet an chan a, an squad an din thar leh hma in Serie A inkhel hnuhnung berah an khelmualah December ni 11 hian Atletico Mineiro mikhual an la bak.

Club President Ivan Tozzo a zam a,an squad pumpui deuh thaw an chan avangin player thar lakluh nan sum tam tak an sen a ngai dawn tih a chiang. Brazilian club engemaw zatin an player-te ‘loan’ a an hawh tir theih thu an sawi tawh a, ‘R’ pahnih an lo lang bawk.

Kum 36 a upa FIFA World Player of the Year hlui hian nikum a Fluminese a chhuahsan hnuah club a la nei leh lo. ” Chapocoense hian hun khirh tak an tawng mek a, a theih phawt chuan puih hi kan duh. Eng kawngin nge kan puih ang tih chu hriatthiam a har a, mahse an tan hian kan awm reng a, kan inring reng a ni ,” tiin Ronaldinho unaupa leh a agent ni bawk Roberto Assis chuan a sawi.

Argentina playmaker hlui Juan Roman Riquelme (38) hian kum 2014 khan football chawlhsan tawh mahse Brazilian club tan hian a thlawn a kum khat khelhsak pawh a hnial lo niin tarlan a ni bawk.