Premier League tawp zan a ni a, Chelsea hian top 4 beiseina an nei tawhlo a, EPL ah na na na chuan an dinhmun hi engti kawng zawng mahin an sawhsawn thei lo a, season hman zawhna match hrim hrim ani tawh a. Chutiang bawkin Blackburn hi tla sa tawh an ni a, an tan chuan tun season a EPL match satliah, pawimawhna neilo ani tawh a, Mahse game pangngai tak min hmuhtir.

Chelsea hian karleh a UCL final rilruah nei ranin UCL-a khel lo tur Terry, Meireles, Ivanovic leh Ramires te a khelh tir a. He inkhel ah hian chelsea chu 2-1 in an chak a, EPL-ah 6 na an ni ta a, 2001-02 season a 6 na an nih hnu a an nih hniam leh ber tum a ni.

Inkhel tan atangin a thlengtu lam an chungnung zawk a, goal attemp an nei nual a, mahse an thun hlei thei lo a. Chutih laiin Mikhual lam pawhin an nawr let ve reng bawk a. Goal teuh a awm nual hnuah 31′ ah Lukaku cross chu Terry chuan alo head goal a, Blackburn Keeper che tha tak Jake Kean chuan a dang lo dang hnem tawh hle mahse hei hi chu a dang zo ta ngang lo a ni. A hnu minute thum ral hnu lekah chuan Michael Essien-a ball khalh phei chu balckburn defender ten an lo ti tlu a, ball per chu Meireles chuan lo pet in a goal leh nghal a. First half-ah goal dang a luhbelh thei ta lo.

Second half tan atangin Chelsea hian nawr leh nghal a, an ti goal thei chuanglo a, sturridge leh Lukaku te hmangin goal bul hnaiah ball an ti thlawk fua fua thei ringawt. 60′ ah Mikhual lam chuan Corner an hmuh chu Yakubu hmangin an goal khat an khung ve a. Drogba leh Torres te an rawn lut a, an ni pawh hian goal an khung hleithei bik lo a. 2-1 in hun a tawp zui ta a ni.

Di Matteo chuan “He game avang hian ka hun kal lehzel tur a chian phah chuang lo a, eng thuthar mah a awm phah lo a. Mahse tun kar 9 chhung khan hun hlimawm ka nei a, player te an chhuanawm tak zet a. Ka hma hun tur chu engpawh nise ka buai phah lo a, Inrinni a kan game pawimawh khelh tur chauh hi ka ngaihtuah hrih chu a ni” a ti.

“Tun game-ah kha chuan chance miss hnem hle mah ila, chak kha a pawimawh ber a. Inrinni game-ah pawh hian rilru thar nen phur takin kan kal dawn a, Trophy hi kan hawn thei ani tih kan chiang a, hawn pawh kan tum dawn a ni.” tiin a sawi zui bawk a ni.