Stamford Bridge ah Chelsea chuan EPL 2011-12 season a an home game hmasa ber an khel a, Anelka leh Malouda te goal hmangin West Bromwich Albion 2-1 in an hneh. West Brom goal hi Shane Long thun a ni.

Tute nge khel

Chelsea chuan dan pangngaiin 4-3-3 an rawn hmang leh a, First XI ah Drogba, Malouda leh inhliam Cech te an awm lo. West Brom lamin huaisen takin striker pahnih an rawn thawhchhuahpui a, 4-4-2 in an rawn inrem. Stamford Brigde-a mikhual lenglut zingah striker pahnih hmang ngam tlemte zinga mi an ni.

Chelsea (4-3-3): Hilario; Bosingwa, Alex (Ivanovic 65), Terry (c), Cole; Ramires, Mikel, Lampard; Anelka, Torres (Drogba 59), Kalou (Malouda 34).

(4-4-2):Foster; Reid, Tamas, Olsson, Shorey; Brunt (c), Scharner, Mulumbu (Dorrans 86), Morrison; Tchoyi (Odemwingie 74), Long

A goal nghal e

Inkhel an ṭan chiah a, fans te pawh an la inrin hmain a goal nghal. Minute 4 a ni a, centre bula Ramires ball pass chhe zet chu West Brom striker thar Shane Long chuan Alex lâk sak in a tlanpui nghal a, Hilario dan hman loh turin kil takah a thun. Shane Long hi kar hmasaa Manchester United lama pet goal tu tho kha a ni. Lo chhinchhiah rawh.

Hemi hnu hian Chelsea in an nawr lêt vak hleithei bik lo a, West Brom midfielder te an thawkrim a, Chelsea player ‘ṭha’ ten space an nei hleithei lo. Minute 25 ah West Brom zâwkin chance ṭha lutuk an nei a, counter attack ah Chelsea defender te an tlanpelh tawh hnuin Long-a ball cross chu a strike partner Tyochi tan a na hret. Long khan han cross uluk deuh se chu 2-0 a ni ngei ang le.

Chelsea chu Chelsea an ni a, ball an chang tam tial tial a, midfield ah mikhualin ball an chang ve thei meuh lo. Minute 35 ah Kalou aiah Malouda rawn lutin veilam sir aṭangin ball awmze nei a tam phah a, Chelsea an hlauhawm sawt bawk. Ashley Cole long shot leh Alex-a freekick te West Brom keeper in a lo dang zel si a, first half ah Chelsea in goal an thun ve lo.

Second half ah Chelsea

Halftime ah Chelsea manager in thu awmze nei a sawi tih a hriat a, second half-a Chelsea game a dang. Bosingwa leh Cole te an tawlhhma hret a, Mikel a tawlhhnung thung. Hei hian West Brom midfield leh forward te inkar a dangchat tawk chiah a, midifeld ah Chelsea an chungnung.

Minute 53 ah Nicolas Anelka chuan Chelsea tan a thun a, hemi hnu hian Chelsea an hlauhawm zui hle. Minute 56 ah Anelka shot chu ropui takin Ben Foster chuan a lo dang a, ball per let lo changtu Malouda chuan a thun teuh ngei mai. West Brom player te an chau deuh tawh a, second half ah Hilario hmuh tur a awm meuh lo.

An inhnehtawk tawh mai dawn emaw tih laiin minute 83 ah Chelsea in goal ‘ropui’ an thun. Dinglam sirah Jose Bosingwa chu West Brom defender pahnih inkarah tlan tlangin  penalty box chhungah a a lir in a cross a, he a cross hi French winger khel ṭha tak Florent Malouda chuan hnai set sawt aṭangin a lo thun a, hei hi Chelsea chakna goal a ni ta a ni. Huntawp dawn ṭepa Peter Odemwinge thun loh kha West Brom lamin an ui viau ang.

Inkhel bihchianna

First half ah Chelsea in ball chang tam zawkin game thunun zawk mahse counter attack ah mikhual lamin goal hlauhawm an nei leh zeuh ṭhin. Chelsea hmatâwng leh midfielder te a laiah an inhnawhkhawm a, a sir aṭanga nawr turin wing back pahnih Ashley Cole leh Bosingwa te an ring deuh tawp a ni ber. Hei vang hian Chelsea defence sir a ruak deuh ṭhin a, hei tak hi West Brom in an hmang ṭangkai ngei mai. Inkhel kha ngun taka i en chuan West Brom goal hlauhawm kha chu a sir aṭanga rawn chhuak deuh vek a ni.

A laiah erawh an ṭha. Torres hian beisei la pha chiah lo mahse a teammate te nen an inman tawh a, Lampard pawh goal ah a la hlauhawm reng. Kalou leh Anelka te hi a sir aṭanga ball cross aia a laia lakluh nuam ti zawk an ni a, Malouda rawn luh hma kha chuan an game a ‘narrow’ khawp mai. Right wing-a khel tur, ball cross thei leh tlanchak pakhat neihbelh leh se chuan hei aiin an game a hmuhnawm lehzual ang.

Second half ah khan an khel ṭha sawt a, substitute pathum Malouda, Ivanovic leh Drogba ten game an tidanglam. Hei hian Villas Boas hi ‘naupang’ mai mai a nih lohzia a tilang awm e. Sir Alex-a’n elpui tur thar a neihbelh leh ta e.

West Brom game a chhe lo a, season tirah Manchester United leh Chelsea an tum nghal a, an khel thei viau ve ve. A bik takin an forward te hi an chhe lo a, midfield aṭanga Scharner rawn dawk chhuak ṭhin pawh a hlauhawm thei khawp mai. Tunah hian point la hmu lo game 36 khelh tur a la awm a, tuna an khelh ang hian an khel tluan thei a nih chuan table laihawl velah an awm phak a rinawm. Manager Roy Hodgson hi a pawimawh hle awm e.

ZoFooty Man of the match – Florent Malouda

Chakna goal thuntu Malouda lo luh hnua Chelsea game improve zia kha kan hmu ṭheuh awm e. Field veilam sîr aṭangin ball hlauhawm tak tak vawi duai lo a siamchhuak a, defender pakhat tal a pawt kâk reng a, kha khan a laiah midang tan space a siam a ni. A rawn luh hnua Lampard khel ṭha ta sawt te pawh kha kan hmu awm e.

Inkhel inhnehtawk tak kan hmu a, a tawpah chuan club lian leh player nei ṭha zawk an dingchang ta a ni. He Chelsea team hi player malkhai ah remier League-a ṭha ber an ni hial maithei a, season tawpah team ṭha ber an ni thei angem? Game 36 hnuah kan hre thei dawn e.