Chelsea 3-5 Arsenal
14′ Frank Lampard Robin Van Persie 36′,85′, 90+2′
45′ John Terry Andre Santos 49′
81′ Juan Mata Theo Walcott 56′

Arsenal in Stamford Bridge ah Chelsea 5-3 a an hneh avangin 6na ah an kai chho va. Season tir lama sawisel kai tak Arsene Wenger tan chuan he result hi ava lawmawm dawn em. Arsenal fan rinawm tak tak an Pu Wenger a chunga rinna nghat ngam ho, tan chuan zanin hi zan hlimawm chu a ni. Chutih rualin Chelsea fan tan chuan zan hrehawm a ni ngei ang le, a zawnin vawi hnih an chak lo a ni zatliah lova, an hmelma Arsenal in an khelmual ah an sawp avangin kar hmasa lama Man Utd fan ho tawn ang chu an tawng ve ta a ni.

First Half ah Stamford Bridge a nghing lo!!!
Inkhel an tan a, minute li lekah Chelsea in chance tha zet an nei nghal a, Sturridge ball cross chu a that tawk loh avangin Szczesny in a lo man hlauh a, cross tha chu nise Torres in a lo thun ngei ang le. Mikhual zawk Arsenal an zam mai bik lo Theo Walcott cross tha zet chu player thar Gervinho chuan a lo pet out thei hram a, Derby match boruak a zo lo a ni thei angem???. Hemi hnulawk hian Walcott ball cross bawk chu Van Persie an a lo thelh leh hlauh bawk.

Arsenal ten an chance hmuh that an hman tangkai loh hnu lawk ah ball thiam Mata in Santos rawn bumin a ball cross tha zet chu Lampard in a lo head goal a. Chelsea hian chance tha tak nei leh bawk mahse Sturridge in a lo thelh leh hlauh bawk si.

Arsenal in game mawi an rawn lantir a, Ramsey ball pass tha tak chu Gervinho an rawn la in, tunlai striker form zet mai Robin Van Persie chu lo pe leh in, annin goal ah lo chantir a. Arsenal in rawn nih rual mahse first half tawp dawn ah Chelsea Captain Terry in a rawn head goal leh avangin Chelsea chuan a vawi hnih nan hma an hruai leh a. First half ah Stamford Bridge a nghing lo.

Second Half ah Stamford Bridge a chim!!!
Arsenal an la tlawm mai bik lo, inkhel tan atanga rei lo te ah chance an nei nghal a, Ramsey in thun lo mahse Brazilian Defender Santos chuan minute 49 na ah a rawn thun ve leh a. Santos a pet goal tura ball petu hi Alex Song a ni.

Second half tan atanga minute sawm velah first half ah pawh langsar em em Theo Walcott a rawn lang, defender chu rawn bumin an ti tlu a, Chelsea defender te chuan referee whistle ham rik an nghah laiin Walcott chu rawn tho lehin ball chu a la tlang a, goal ropui a thun der mai. Peter Cech in a tihtur a ti lo em?

Chelsea an mangang Lukaku leh Meireles an rawn luhtir a, hei Belgium rawlthar hian tih theih vak a nei lo mahse Meireles ball khalh tlang theih nan Santos a lo dang a. Meireles chuan la tlang in Juan Mata chu ava pe a. Mata penalty area pawn atanga shot in goal mawi lutuk a thun a. Chelsea leh Arsenal an in hnehtawk leh ta.

Minute sawm pawh a awm tling tawh lo, Derby match ropui tak ah draw game kan hmu dawn emaw tih hnuah Florent Malouda chuan John Terry chu a pass sual a, Robin Van Persie chuan lo nangchingin Terry um phak rual lovin a khalh phei a, Peter Cech chu bum leh Arsenal hmahruaina goal chu a thun leh ta. He goal hi an chak pui mai dawn emaw tih laiin Chelsea in attack na lutuk lamah an tisual a, Arsenal in counter attack atangin an rawn thun ve leh a. He Goal pawh Arsenal player thar Arteta ball pek Van Persie lo petgoal a ni.

Pride of London chu Arsenal hi anni mai em? Arsenal hi lo ni ta lo reng pawh ni se, London titi ber tur chu Van Persie ke veilam chu a ni ngei ang.

Chelsea:
First Eleven: Cech; Bosingwa, Ivanovic, Terry, Cole; Ramires, Mikel, Lampard; Mata, Sturridge, Torres.
Subs: Blackman, Luiz, Romeu, Malouda, Meireles, Lukaku, Bertrand.

Arsenal
First Eleven: Szczesny; Djourou, Mertesacker, Koscielny, Andre Santos; Ramsey, Song, Arteta; Walcott, van Persie, Gervinho.
Subs: Fabianski, Vermaelen, Rosicky, Park, Arshavin, Jenkinson, Frimpong.

Chawhchawrawi:
*Arsene Wenger hian Arsenal a zawm tirh in kum 17 leka upa Nicolas Anelka chu £500,000 lek in PSG atangin a lei lut a. Arsenal tan match 65 khelhah goal 23 lai a thun a, Arsenal tana goal hmasaber hi an hmelma Man Utd lamah a thun nghe nghe. Mahse tunah chuan an hmelma Chelsea ralthuam tha ber zing ami a ni.

*December 2003 a internet survey an neih ah, Arsenal fans te chuan Chelsea chu an hmelma lian pathumna ah an ngai a. Chelsea ai hian Man Utd leh Tottenham Hotspur te an haw zawk a ni. Chelsea fan erawh chuan Arsenal chu an hmelma lian ber ah an ngai thung. 2011 ah chuan a dang tawh ngei a rinawm.

*Arsene Wenger hian Master Degree Economics ah a nei a, Engineering ah degree a nei bawk. English, French leh German tawng a thiam bak ah Spanish, Italian leh Japanese te pawh a ti thei sawih sawih bawk. Hemi vang hian “The Professor” antih pawh hi a mak lo. Wenger hian 1988 khan Liberia atangin player lar lo tak George Weah chu Monaco atangin a la lut a. He Player lar lo tak hi 1995 ah chuan FIFA player of the Year a lo ni ta a ni.

*Villas-Boas hi chhungkaw awmthei tak atanga lo chawr chhuak a ni a. School naupang anih lai chuan Midfielder a ni thin a, a tha chhuak zo dawn lova a in hriat avangin jornalism lamah kal a tum a. Mahse vanneihthlak takin coaching career chu a pi thianpa Sir Bobby atangin a tan ta zawk a ni. Kum 21 lekin a nih in British Virgin Islands’ technical director of football a ni a. He club atanga a chhuah ni ah chiah a kum zat a sawi.

*Chelsea in QPR an hnehloh tum khan Chelsea player ten tlan thui zawng chu 95.161km anih laiin QPR player te tlan thui zawng chu 114.754km a ni thung. Arsenal in Stoke City 3-1 a an hneh tum khan an tlan thui zawng chu 115.273 km ania, an zinga tlan tam ber chu Ramsey niin 12.48km a tlan a ni.