CHELSEA AN CHAK VE TA

Chelsea rawlthar striker Tammy Abraham chuan goal hnihin an manager Frank Lampard-a’n a laka rinna nghah chu a chhang let a, 3-2 a Norwich City hnehin in tun season Premier League-ah a vawikhat na’n hnehna an chang.

Chelsea starting XI te kum chawhrual chu kum 24 leh ni 208 chauh niin February 1994 hnu lama bul ţantu an neih naupan ber ţum a ni.

Inkhel nung takah Abraham chuan minute thumna lekah The Blues hmahruaina goal a thun a, mahse, Norwich an hawihil rei lo. Goal an chhuah aţanga second 156 hnu lekah Norwich tan Todd Cantwell chuan Teemu Pukki siamsak aţangin an si phurh a sut.

Season liam taa Championship Club Derby County-a Lampard-a hnuaia player pawimawh lo ni tawh Mason Mount rawn inlarin tun season-a a goal hnihna thunin Chelsea-in hma an hruai chhunzawm leh thuai a.

Mahse, chawlhlawk hmain Canaries tan Teemu Pukki rawn che ve leh thungin zim tak atangin an si phurh a sut.

Finland striker kum 29 mi hian tun season Premier League-ah goal 5 a thun ta der mai!

Chelsea hian second tir lamah inkhel thununin Olivier Giroud aia ralhma tawnga an dah Abraham chuan Tim Krul paltlanga goal changkang thunin he goal hi tun season a Chelsea chak hmasak berna goal a ni zui ta a ni.

London club tan Kurt Zouma chuan goal thun mahse video assistant referee hmanga endik a nih hnuah substitute Olivier Giroud chu Norwich keeper lakah a lo foul avangin hnawl a ni.

Heti hian inelna hrang hranga an inhmachhawn hnuhnung vawi 16 Chelsea hian Norwich lakah tlawm an la nei lo tluang zel a ni.

Lampard chuan tun ţumah hian Leicester nena an inhnehtawk ţuma player pahnih chiah a siksawi; Giroud leh inhliam N’Golo Kante te aiah Abraham leh Mateo Kovacic a luhtir a, warm-up naa inhliam Pedro aiah Ross Barkley a lut bawk.

Carrow Road a goal hnih thuntu Abraham hi kum 1998 hnu lama Chelsea tana Premier League match khata goal hnih thuntu zinga naupang ber a ni ta bawk.

Norwich City 2-3 Chelsea 
Cantwell 6′ Pukki 31′ –
Abraham 3′ 69′ Mount 17′