Zanin inkhel ah Chelsea chuan QPR lak ah goal 6 ngawt thun in, QPR lam hian ‘zahzel’ ah goal khat an thun ve hram a, hawihai takin Stamford Bridge an chhuahsan. Player nei tha zawk, mahni mual a khelh zawk bawk chuan Chelsea hi chak tura beisei an ni ngei a, mahse tlak hlau tawh QPR ‘sapatal’ tum lakah hian goal 6 an thun chu an in ring bik kher dawn em ni? QPR hian kawng engkim ah an khan lo a, chak phu zawk Chelsea an chak chiang hle.

Tute nge khel?

Chelsea: Cech, Ferreira, Bosingwa (Sam Hutchinson 81’), Terry, Cole, Mata (Malouda 67’), Essien, Lampard, Sturridge, Torres, Kalou (Ramires 73’).

QPR: Kenny, Onuoha, Ferdinand, Hill, Taiwo, Mackie, Barton, Derry, Buzsaky (Traoré 65’), Cisse, Zamora (Shaun Wright-Phillips 78’).

Referee: Howard Webb

1^st half- A goal nghal e!

Chelsea hian tan atangin an dim lo nghal hle a, min 1 pawh a tlin hma in Daniel Sturridge hmang in goal an thun nghal. A goal hi a kual lut nalh in QPR keeper Paddy Kenny tan dan ngaihna a awm lo.Chelsea hian game an thunun nghal a, an midfielder te’n a laiah QPR lam tan hmunawl an siam sak lo. Min 12-na ah Mata corner pet tha tak chu Mr.Chelsea (Terry) chuan amah vengtu Clint Hill chu zuan khalh in mawi lutuk in a lo tauh lut. A tih goal zawh hian a jersey-a Chelsea badge chu beng in, Champions League a tul lo taka hnawhchhuah anih avangin fans te lak ah ‘ngaihdam’ a dil. QPR lam hi han tan ve tum thin mahse, Chelsea goal hma ah Barton leh a naute hian hlauhawm an siam thei meuh lo.

Torres a rawn lang ta!

QPR lam in ball alai ah an chang rei hman lo a, Lampard leh Mata a laiah an tangkai hle mai. Min 19-na ah Torres chuan a ti goal ta. Kalou ball pass chu a vengtu defender tlan pel in, Barcelona lama a pet goal dan ang deuh chiah khan keeper a bum zet hnu ah a pet goal. Chelsea lam an khel tha tawlh tawlh a, chu mi rah chu an seng leh nghal. Mata chuan QPR box chhung ah ball vawrh lut in, full-back Nedum Onuoha chuan an  keeper Kenny a lu a a pass chu lo man pial in, Torres-a ke ah a tla a, ani hian chiang zet in a lo pet goal leh.  Min 25 chauh an la khel a, 4-0 ani ta der mai! QPR tan beiseina a chau tawh. An khelhna ground a huh a a nal avangin an tackle a hlauhawm thei khawp mai. Half chance Chelsea lam chuan nei zauh zauh mahse goal dang luh belh tawh lo in chawlhlawk an hmang.

QPR beiseina ti thamral tu 2^nd half

2^nd half tan hnu ah pawh Chelsea an khel tha chhunzawm zel a, tan atanga rei vak loah Cole pass fing tak chu Mata chuan a pet goal teuh kher mai. QPR lam hian Mackie long shot hmangin an thun ve thelh a, mahse Cech a paltlang zo lo. Midfield-ah Lampard a tangkai a, game a thunun, Torres bawk in min 59 na ah a thun leh thelh. Min 62-na ah Chelsea a zawm hnu a a hat-trick hmasa ber ni turin goal a thun ta nge nge.  Juan Mata through ball tha lutuk chu Torres chuan um in keeper veilam kil ah cool zet in a thun, QPR denfending an thiat nalh kher mai.  QPR lam hian Fulham atanga an lak Zamora leh Cisse hmang in chance an nei a, an hmang tangkai zo lo.

Juan Mata rawn thlaktu Florent Malouda chuan Chelsea goal 6-na tur in min 80 na ah hnai set sawt atangin a pet goal ve leh a, he goal hi dinglam sir atanga Ramires rawn siam sak a ni. Stamford Bridge chu a bengchheng kher mai, 6-0 ani tawh a, QPR lam tan beisei tur a awm tawh lo. Mahse QPR lam hian hun tawp dawn ah ‘inthlahrung  takin’ an goal neih chhun tur chu Djibril Cissé in a rawn thun a, a goal hi a nalh khawp mai. Hun tawp dawn hnaih lam ah Torres bawk chuan goal thun leh na remchang nei mahse Malouda tan siamsak in, ani hian alo pet out hlauh. Chelsea player ten ball kat kual mai mai in hun a tawp zui a, min 90 a zawh meuh chuan 6-1 lawih ani der mai!

He inkhel ah hian Torres hi a khel tha hle a, a vanneih ni chu nise goal 4 pawh thun thei tur a ni. A goal thun te a ‘class’ in hman a Torres-a ‘tak tak’ kha kan hmu leh tan dawn a ang khawp mai. Chutih rual in a laiah Mata leh Lampard an khel tha em em a, Chelsea game khaiding tu an ni ti ila a sual awm lo e. Malouda leh Ramires an rawn luh chhun ah an tangkai a, Chelsea defense a phui tha a, amaherawh chu a tawp a an goal khat chhuah hram erawh an chak chian tawh avangin an lo ‘muthlu’ hlek a ni, Cisse finishing ‘tawih’ tak erawh sawi hmaih phal chi ani lo. Engpawh nise Chelsea hian chak an phu a, engkim ah an chungnung a, a tawp lama match statistics kan dah hian a ti chiang mai awm e.

He chakna hian Chelsea hi 5-na ah a hlangkai a, mahse zanin a Tottenham an chak anih chuan 6-na ah bawk an tla thla leh ang. Chelsea hi an coach ni lailawk Di Matteo hnuai ah ‘harhtharna’ an chang a, game 16 a khelh pui tawh ah vawi 11 lai an chak tawh a ni. Ti hian Chelsea hi top 4 ah lo in hlangkai zo lo pawh nise, Champions League final-a Bayern Munich an hneh a an champion anih si chuan, season leh ah an title hum thei tur in Champions League an khel thei dawn a, beseina sang tak nen season tawp lam an hmang mek a ni. Hetih lai hian zanin a an tumpui QPR lam hi relegation zone chungah chiah an awm a. Tan la in kumin kum tir ah Mark Huges an ruai a, player te lei mahse tla thei dinhmun ah anla ding reng a, an hnuai ah hian Bolton, Blackburn leh tla tawh Wolves an awm a ni. An home game hnuhnung pali ah Tottenham, Swansea, Arsenal leh Liverpool te hneh mahse, away lam ah an che chhe hle a, tun season-ah away ah point 11 chiah anla hlawhchhuak thei a ni.

Season tawp ah tunge tla anga, tunge top 4 ah in hlangkai ang tih engmah ala chiang lo a. La liga anglo takin season tawp ah champion nih in chuh in Manchester khaw pahnih an la in tum dawn bawk a, season tawp lamah EPL ah hian ‘thriller’ kan hmu dawn ngei mai.