Pathianni zana English Premier League game awmchhun a ni bawk a, ngaihven rawn a hlawh hle. Chelsea hi an game hnuhnung vawi thuma vawi hnih chak lo tawh an ni a, chak an mamawh a, an home-a inkhel an nih avangin chak tura rinkai zawk an ni. Liverpool hian englai pawhin ‘big match’ hi an ngam reng a, an chhiatna ber chu club tenau laka point an hloh reng fo hi a ni. An game hnuhnung berah an mikhual Swansea an hneh zo lo ringawt tawh a, Chelsea lakah hian chak an mamawh hle bawk a ni.

Liverpool hian season liamta khan Chelsea hi home leh away-ah an lo hneh ve ve tawh a, Stamford Bridge-a an chakna goal kha tuna Chelsea player ni ta Raul Meireles khung a nih nghe nghe kha.

Line ups:

Team news an rawn tarlang a, Chelsea staring XI ah Fernando Torres leh Raul Meireles te an lang lova. Tlar hmaah Drogba, Mata leh Malouda te an awm a, Chelsea hian 4-3-3 formation an rawn hmang. Lierpool chuan 4-4-2 rawn hmangin, beisei loh deuhvin Bellamy leh Maxi (Rodriquez) te’n an start tlat! Chelsea-in pound maktaduai 50-a an lei Torres an start tir lova, Liverpool-in maktaduai 35 man Andy Carroll bench-ah an dah ve tho!

Inkhel thlir ang

Inkhel an ṭan a, Liverpool-in bul an ṭan fuh deuh zawk. Tun season-a a vawikhat nana EPL game-a starting XI chang Maxi a langsar a, goal hlauhawm erawh an nei thei bik lo. Minute 10-naah Juan Mata chuan Chelsea tan a rawn khung ṭhelh thuak. Liverpool goal bawh a na a, Bellamy a hnawksak a, Glen Johnson-a’n a khalh thui thei hle! Goal-ah erawh an shot mang tlat lo! Drogba chuan free-kick a pet a, mi tam takin (commentator telin!) a goal emaw an ti hman!

Minute 33-naah a goal ta. John Obi Mikel chuan anmahni box bulah ball a la sual a, Adam-a’n laksakin, Bellamy a pe a, Suarez nen one-two mawi zeta Chelsea defence an ṭhiah hnuah Bellamy hian selfish lo zetin veilam sira ding Maxi a pe a, ani’n goal-ah a chantir a, tun season-a League goal a khungna hmasa ber a ni. Half-time hmain goal dang a luh belh lo

Second half-ah Chelsea boss AVB chuan Mikel lachhuakin Daniel Sturridge a luhtir a, a ti fuh. Malouda cross ṭha zet chu Sturridge hian goal-ah chantirin an si phurh a rawn sut a,minute 20 vel chhung chu Chelsea-in an nawr a, Liverpool an inveng a ni ber mai.

Liverpool chuan Bellamy an lachhuak a, Jordan Henderson a lut a. Torres leh Carroll pawh an intilum ṭan. Torres-a’n Liverpool fans-te hmaa warm-up a nei kher kha ama duh thu a ni lo maithei! Minute 6 chauh a awm tawh tihin Liverpool player hlui pahnih Torres leh Meireles te an rawn lut a, Drogba leh Ramires an chhuak ve thung. Liverpool-in Maxi lachhuakin Downing a lut ve bawk a, Liverpool substitute siam a fuh zawk a, Henderson leh Downing-te an langsar nghal.

Minute 86 a ni a, Adam-a long ball pek ṭha zet chu Chelsea player hlui Johnson chuan dinglam aṭangin a lalut a, Ashley Cole a bum hnuah khalh phei zelin, box chhung aṭangin veilam sirah a pet a, a goal! Hun pek belh minute 3 zawh hnu thlengin Chelsea-in goal an khung thei lova, Liverpool an chak ta. Chelsea hian tun season-ah ‘Big four’ an tih ṭhin ami – Manchester United, Arsenal leh Liverpool an khel tawh a, an la hneh lo fai vek a ni.

Stats neuh neuh:

** 2003 a Roman Abramovich-a lei hnuah Chelsea hian a zawnin Stamford Bridge-ah chak loh an la nei lova, Liverpool an hneh loh chiah khan chu record chu nuai bo a ni.

** Chelsea hi kum 11 chhungin Season khata game hmasa 12-ah vawi 4 an chak loh vawikhatna a ni a. Tun season-ah mahni home-a goal chhuah ziah club 4 zinga pakhat an ni mek. Tun season-ah goal chhuah lovin game 2 chiah an la khel tluan.

** Daniel Sturridge khan kumin (2011) ah (Bolton leh Chelsea tan) game 28-a goal 16 a khungna chiah a ni.

** Kenny Dalglish-a enkawlna hnuaiah Liverpool hian an game hnuhnung 12-ah Chelsea laka chak loh an la nei ngai lo. Liverpool hian ‘Big Four’ club an tum hnuhnun vawi 7 ah hnehtu an la tawng lo.

** 1972-73 hnuah Liverpool-in a zawna League match-a Chelsea vawi 3 an hneh leh vawikhatna (Season liamtaah vawi 2 an hneh) a ni.