Football fans zingah Michael Essien lo theihnghilh titih tawh kan awm a nih pawhin inthiamloh lutuk tur a ni awm lo e. Kum 2005 – 2008 chho a Chelsea midfield kulhpui Essien hi July, 2011 a a inhliam hnu khan a la inkhel leh miah lo a, mahse Thawhṭanni khan Chelsea reserve team tân minute 75 khelin, Chelsea first team-a kan hmuh theih hun tur a hla lutuk tawh lo maithei.
Kum 29 a upa Essien hian December thla vel aṭangin training awlsam deuh deuh chu a ti ṭan tawh a, February thlatir-a Manchester United an mikhual hunah a khel thei hman maithei niin Chelsea football club chuan an tarlang a ni. Season chanve kan pel hret chauh a ni a, Andre Villas Boas hian engtiang chiahin nge a chhawr dawn tih hriat loh mahse, season chawhnu lamah chuan Essien inkhel lai kan hmu zeuh zeuh dawn niin a lang. Chelsea fans te tân thu lawmawm tak a ni ngei ang.
Player pawimawh ‘ṭhin’ Essien
Ghana international Essien hian kum 2005 ah Lyon aṭangin Chelsea a zawm a, Chelsea player pawimawh a ni chho nghal. A taima a, tharum a ngah a, goal pawimawh tak tak a thun theih em avangin fans ten an ngaizawng nghal a. 2006 – 07 ah phei chuan Chelsea fans’ Player of the Year ah thlan a ni nghe nghe. Premier League, FA Cup leh League Cup te a châwi zui a, Jose Mourinho hnuaia Chelsea ropui vanglaiin player ṭangkai berte zing ami a ni. Kum 2005 leh 2006 ah African Player of the Year award hlan a ni bawk.
Anchhedawng khûp chu
Kum 2008 season a inṭan chauh a, Ghana tâna a khelh laiin a khup a tina ta hlauh a. Hei hi Essien career tlakhniam bulṭanna a ni a tih theih awm e. Thla 7 zet a inhliam a, a dam hnuah khelh ṭhat chang nei mahse a inhliam hma a tluk tak tak thei tawh lo.
2009-10 season chawhma lamah Chelsea player pawimawh a ni chhunzawm a, goal pawimawh tak tak a thun leh nual. Mahse African Cup of Nations 2010 khelh laiin a inhliam leh a, thla 6 zet a chawlh a ngai leh a. FIFA World Cup 2010 pawh khel chak em em chungin a khel ve thei ta lo a ni. 2010-11 season pawh inhliam leh form ṭhat loh nen a che ropui lo.
Kum 2011 pre-season laiin a khup bawk hi a tihliam leh a. Ṭha taka zai ni mahse tun season-ah a hmel kan la hmu lo tluang ta zel a ni. Mahse tunah chuan dam tawh a, Chelsea midfield-ah Essien ‘tak tak’ kha kan hmu leh thei angem le?
Good post!! A heading ka chhiar khan a inhliam kalo theihnghlh hman toh a, reserve team ah a tlathla tih na ah kalo ngai hman a 🙂 Hepa hi chu a tha khop mai…hmuh leh tepawh chakawm toh lom le lo let vat teh se..
Lo kir leh pawh nise Essien hian ngai a awh leh theih a ring tawh lo…
He pa hi chu atha bawk a, a tharum bawk a ni. Chuan ngatinge pathianni zana chelsea leh portsmouth inkhel kha tuman in rawn post ve miah lova, ka lo chang ve reng a chhiar a chak awm ve teh reng nen.
Essien hi chu a tha ve em ani. Ngai a awh leh thei tak ang maw
Essien lo lèt leh hunah tu nen nge hmun an inchuh ang? Player beiseiawm tak, Romeu nen nge, Essien ang bawka tlan chak leh goal thun thei Ramirez nen. Lampard leh Meireles hmun inchuh mek bawk nen, Chelsea midfield intihsiakna chu hmuhnawm dawn mup mup mang e. 😎
i tello chuan the blues ho hi ser a mu kan thur theilo ani. Lam ang Lo let leh vat rawh.
Goodpost lo let leh thuai teh se kan mamawh ani.