Chelsea thluak bur Marina Granovskaia

Chelsea neitu Roman Abramovich hian kum hnih dawn chu a club te inkhel hi a hmunah a en tawh lo a, chuti chungin Chelsea hi club tha ber pawl an la nih mai bakah transfer bazarah pawh an che tha narawh e !
 
Hei zawng zawng phenah hian hmeichhe pakhat a awm a, chu chu an club director kum 44 a upa Marina Granovskaia hi a ni.
 
Granovskaia leh a hnathawh
 
‘Chelsea Iron Lady’ ti hiala sawi thin Granovskaia hi Moscow State University atanga graduate a ni a, Chelsea neitupa Roman Abramovich-a oil company ‘Sibneft” a thawk thin a ni. Abramovich nen hian kum 20 chuang an thawk dun tawh a, Russian pa hausa hian a ring hle a, kum 2013 atang khan Chelsea board – ah a tel tan.
 
Chelsea in player tha Fernando Torres, Eden Hazard leh Alvaro Morata te an lakluh theih nan leh man to tak a Oscar, David Luiz, Diego Costa leh Eden Hazard an hralh theih nan a ring a rawlh thuk hle niin an sawi. Hei bakah hian kum 2023 thleng daih tur a Nike leh Chelsea thawhdunna, khawvela a lian ber palina a tling pha leh Chelsea club record ni bawk kha Granovskaia thluak vek hi a ni awm e !
 
Amah hrechiangtute sawi danin “Lar a khel ngai lo a, TV interview pawh a pe ngai lo. Roman hian a ring hle a, a tawp tak taka thutlukna siamtu a ni fo. Stamford Bridge – a Jose Mourinho lokir leh theih nan khan tha a thawh nasa hle,” an ti bawk. Patling pahnih, kei ka ni inti ve ve Abramovic leh Mourinho te inkar tha lo siam that kha hna hautak a ni ngei ang.
 
Chelsea leh Dutch club Vitesse Arnhem te’n player naupang zawk te talent zawn chhuah kawnga inremna an siamah a meizang hlaptu a ni a, Chelsea training ground changkang tak Cobham an neih theih nan a sulsutu a ni bawk.
 
Player lei leh hralh chungchangah a hunlaia Chelsea manager te nen an ngaihdan a inhmu lo fo niin an sawi a, heng zingah hian Antonio Conte leh Maurizio Sarri te pawh an tel. Stamford Bridge atanga amah hralhchhuaktu pawh kha Granovskaia hi a nih thu goalkeeper Thibaut Courtois khan a sawi.
 
Kum 2009 Champions League semi-final a an chak loh tuma Chelsea striker Didier Drogba chet dan mawi lo kha mi tam tak chuan an dem a, Ivorian striker hi Abramovich pawhin hralh a tum hman hial niin an sawi. Mahse he Russian ‘nu fing’ hian hralh lo turin a ti a, 2012 Champions League nomawi an chawi nan Drogba chu player pawimawh a ni zui.
 
Kum 2014 – a Chelsea chief executive Ron Gourlay – a ban khan nghawng a neih len viau rin a ni a, chutah kum 2017 ah Chelsea director of football, tawnhriat ngah tak mai Michael Emenalo a han bang ve leh bawk nen, mi tam tak chuan Granovskaia hi a chet buai mai an ring a, mahse hei, a thu telh telh a, a che tha telh telh a ni ber mai !