Chhinga Veng harhtharna a intan?

MPL kaithar Chhinga Veng FC chuan season tan nia an chak hnuah vawiin (October 27, Ningani) tlai khan Zo United 3-0 in an hneh a, match sarih (D2,L5) chhung chak hmel an hmuh loh hnuah point thum an hlawh chhuak. Hetih lai hian Zo United erawhin coach thar thar Remlalthlamuanpuia (Sabito) hnuaiah match zawnin an chak lo a, point sarih hmuin tla thei dinhmunah an ding.

Chhinga Veng tan hian Vanlallawma’n goal hnih a khung bakah H. Lalmuankima’n goal khat a khung bawk a, hrem vanga technical area-a awm thei lo coach Chawngthansanga’n mipui thutna lam atangin a naute a fuih tha hle.

Goal thum
Tan phat atangin Chhinga Veng chu team hlauhawm zawk an ni a, minute 11-naah MK-a chuan shot hlauhawm tak neiin Zo United goalkeeper LK Lalhmangaihzuala’n a lo dang hman hram. Hemi hnu lawk hian Vanlallawma chuan goal ban a pet per a, Chhinga Veng hian goal thun ngei an tum tih an khelh danin an lantir.

Hun a kal zel a, MK-a bawkin freekick hlauhawm taka petin Zo United tantute thin phu ti rang tawk velin ball akal a, Zo United vanneih kaltluang zelin Vanlalthanga cross tha tak chu Vanlalalawma’n ho takin a lo chhuah bawk. Inkhel thununtu na na chuan goal an thun ta nge nge a, Zo United goalkeeper Mama ball pet chhuah chu MK-a zawnah kalin Bawngkawn tlangval hian goal-ah pet lehnghalin keeper-in a man ngheh zawh loh avangin Lawma’n harsatna nei loin a khung.

Goal an thun hnuah Chhinga Veng an khel tha sawt a, goal khungtu Lawma chuan mual vei lam atangin tha takin a vawrh lut a, changtu nei lo MK-a’n a tauh lut. Chhhinga Veng winger finishing a that rualin Zo United defending a tha tawk lo.

Chawlhlawk zawhah pawh Zo United hi eng an ang thei chuang lo a, an formation 3-4-3 an la hmang thiam lo deuh niin a lang. Mual laiah ball an keng thei lo a, goal hlauhawm sawi tur an nei lo bawk. Chhinga Vengin minute 20-na leka inhliam vanga lakchhuah Lalkhawpuimawia (Mapuia) inhliam an tuar lo a, MS Dawngliana khelh that vang a ni pakhat. Chutihrualin team dang an hmachhawn hunah erawh Kelkang tlangval awm lo hi a pawi thei ang. .

Inkhel inhnehtawk lo taka Chhinga Veng chungnun zia tichiang turin minute 78-naah goalkeeper Mama chesual vangin Lawma’n a goal hnihna ak hung a, MPL kaithar 3-0 in an chak.
ZoFooty Statistics
Chhinga Veng FC 3-0 Zo United FC
CVFC : Vanlallawma 33’, 78’; H. Lalmuankima 36’
MoM : H. Lalmuankima, CVFC
48% Ball Possession 52%
21 Shots 7
12 On Target 1
2 Yellow Cards 1
0 Red Cards 0
Powered by Rainbow Multibrand Mobile Showroom.

Tute nge khel?
Chhinga Veng FC: R. Lalhmangaihzuala, K. Lalthlahlova, Emmanuel Chigozie, R. Laldinliana, Joy Mrona Khar Raswai, Vanlallawma (Lalthlamuana 90’), H. Lalmuankima, Vanlalthanga, Lalkhawpuimawia (PC Vanlalhmangaihzuala 20’), MS Dawngliana (Isaac Lalremruata 80’), Dinthangpuia.
Subs: Kross Biekhai, C. Lalbiaksanga, Ronald Zothanzama, Lalramliana Varte, Paul Ramfangzauva, Lalchhanchhuaha, Lalthlamuana, Isaac Lalremruata, PC Vanlalhmangaihzuala.

Zo United FC: LK Lalhmangaihzuala (Mama), Hmingthanzauva, Lalnunpuia Pachuau, Malsawma Chhangte, Vanlalhmangaiha, Isak Vanlalpeka, Laldinliana Varte, Vanlalremsanga, Vanlalruata, C. Laldinmawia, Lalnunsanga.
Subs: Lalvenghima, Dominic Lalruatfela, Rohlupuia, Lalthazuala, R. Lalthantluanga, H. Malsawmtluanga, Jesse Laldinpuia, Chhanrinpianga, Lalhlimpuia.