Chhinga Veng leh Ramhlun North te chak zawk awm loin inthathen – Rooney Opa

chhinga-veng-1-1-ramhlun-north
Mizoram Premier League Round 9 chu khelh chhunzawm zel a ni a, Chhinga Veng FC leh Ramhlun North FC chu si khat ve ve inpein an inhnehtawk. Chhinga Veng defender Emmanuel Chigozie chu man of the match atan thlan a ni.

November 3, Ningani zan inkhelah Chhinga Veng FC-in MS Dawngliana hmangin hma hruai mah se Ramhlun North-in Zosangliana Sailo penalty hmangin hun tawp dawnah an sut.

Intluktawk inkhel
Chhinga Veng leh Ramhlun North te hi inkhelh hmain point hnih chiahin an inthlau a, kaithar ve ve ni bawkin a chan tha zawk nih tumin inkhelh hma atangin boruak a lian hle.

Chhinga Veng hian inhliam vangin Kelkang tlangval Lalkhawpuimawia (Mapuia) chhawr thei lo mah se MS Dawngliana an chhawr thei tawh a, a kawppui turin khawi hmun pawha khel thei Joseph Lalnunpuia an nei bawk. Ramhlun North lamah Nigerian forward Oneyama Francis chuan inkhel bul tanin B. Malsawmzuala leh leh David Lalrinchhana ten an thlawp a, an hnungah ball thiam Zosangliana (Chhaia) a awm bawk.

Ramhlun North lam hian bul an tha zawk mah emaw a tih theih a, chutih laiin Chhinga Veng tlarhnung a nghing chuang lo. Ramhlun North-in minute 25-na lekah winger tha Isaac Lalruatpuia chu inhliam vangin an chan a, a aiah Vanlalthlamuana luhtirin an game-in a tawrh phah lo.

Team pahnihte inhnehtawk taka an innawr laiin Chhinga Vengin H. Lalmuankima leh Vanlalthanga te hmangin Ramhlun North tlarhnung an thiat a, VL Thanga cross ball chu Ramhlun North defenderin dang perin Dawngtea zawnah ball a kal a, Bawngkawn tlangval hian mawi takin a ke vei lain a pet goal.
Goal khatna luh hma hian MK-a chuan Chhinga Veng hmahruaina goal a thun thelh a, a shot hlauhawm tak chu goal zawnah a kal lo hlauh. Inhnehtawk takin inbei chho mah se Chhinga Veng an khel tha mah emaw a tih theih a, chutih laiin Ramhlun North tan Chhaia chuan shot hlauhawm tak a nei leh zauh bawk.

Chhinga Veng tlarhnungah Emma a tangkai a, mual laiah Khasi tlangval Joy Mrona Khar Raswai te an khel tha bawk si a, Ramhlun North-in intithei taka ‘Chhinga Vengin min hneh ngai lo’ an tih thin chu an titawp dawn ta ni ngeiin a lang.

Amaherawhchu, minute 54-naah Emma chuan box chhungah Francis a titlu a, referee in penalty spot a kawk. Penalty sawisel theih tak a nih avangin Chhinga Veng lam pawh an lungawi lo a, amaherawhchu, TV replay atanga a lan danin referee tan club pahnih tih lawm a theih loh tih chiang a, lungawi lo zawkah Chhinga Veng an tang.

Kumin I Day Football best player Chhaia chuan penalty hi petin an siphurh a sut a, goal dang a luh belh loh avangin Ramhlun North-in an inchhuanna ‘Chhinga Vengin min hneh ngai lo’ tih chu au hlaah an hmang chhunzawm leh ta a ni.

Ti hian, Ramhlun North FC hian point 11 hmuin pangana dinhmun an hauh chhunzawm a, Chhinga Veng hian point kua hmu in pasarihna dinhmun an hauh mek bawk.

Enge hmabak?
Ramhlun North hian November 10 tlaiah BVT an hmachhawn dawn a, Chhinga Veng hian hemi zan hian Chanmari an hmachhawn ve bawk ang.
ZoFooty Statistics
Chhinga Veng FC 1-1 Ramhlun North FC
CVFC : MS Dawngliana 34′
RNFC : Zosangliana Sailo 88′ (P)
MoM : Emmanuel Chigozie, Chhinga Veng FC
55% Ball Possession 45%
13 Shots 7
3 On Target 2
2 Yellow Cards 2
0 Red Cards 0
Powered by Rainbow Multibrand Mobile Showroom.

Tute nge khel?
Chhinga Veng FC: Lalhmangaihzuala, K. Lalthazuala, Lalramfelpuia, Emmanuel Chigozie, R. Laldinliana, Joy Mrona Khar Raswai, Vanlallawma, H. Lalmuankima, Vanlalthanga, MS Dawngliana, Joseph Lalnunpuia.
Subs: Lalfaktlinga, Ronald Zothanzama, Dinthangpuia, Joseph Biakthianghlima, Paul Ramfangzauva, Lalchhanchhuaha, Isaac Lalremruata, PC Lalhmangaihzuala, Lalhmunsiama.

Ramhlun North FC: Liansangpuia, Lalramthamuana, Lalmalsawma, Lalmuanawma, Zosangliana Sailo, C. Ramdinmawia, David Lalrinchhana, Lalruatkima Dosel, Isaac Lalruatpuia, B. Malsawmzuala, Oneyama Francis Okechuku.
Subs: Ephraim Laltlankima, H. Lalduhawma, Lalruatfela, John Lalduhawma, Lalchhanchhuaha Fanai, Jerry F Zonunsanga, Lalchhuanpuia, Vanlalthlamuana.

Posted in Mizoram, Tualchhung and tagged , , .

Leave a Reply

Or