Chhura duh loh Naa’n nei na’ng e !

Estimated read time 2 min read

Indian Super League atana club hrang hrangte inbuatsaihna a kal mek zel a, ISL danah club tinte hian season liam taa an chhawr Indian player kum 21 aia upa pahnih theuh an la chelh zui thei a, midang zawng erawh tun thla tawp a neih tur player lilamna (draft) ah an tel a ngai dawn thung.

Player lilam hunah hian mi 260 vel zet phochhuah an nih a rinawm a, heng zinga 150 vel hi ISL club te’n an inchuh a rinawm. Champion lai Atletico de Kolkata chuan Debjit Majumder leh Prabir Das te an hum zui a, Chennaiyin FC in Jeje Lalpekhlua leh Karanjit Singh. Mumbai City FC in ISL cheng nuai 120 in goalkeeper Amrinder Singh leh Sehnaj Singh te an inrempui tawh a, an thenawm FC Goa in Mandar Rao Dessai leh Laxmikant Kattimani te an hum zui a, ISL club thar Bengaluru FC in Sunil Chhetri leh Udanta Singh te aia thlan zawk an nei lo. Northeast United in goalkeeper TP Rehenesh leh Rowllin Borges te an thlang a, Kerala Blasters in CK Vineeth leh defender palian Sandesh Jhingan te chelhin FC Pune City in goalkeeper duhawm Vishal Kaith bak inremna an la siam pui lo thung.

Hetihlai hian India ram khawpui Delhi-a innghat Delhi Dynamos erawhin an player tumah hum an tum loh thu an puang thung. Real Madrid midfielder hlui Miguel Angel Portugal-a enkawl tur Delhi Dynamos fans te’n club thutlukna hi an hrethiam lo hle a, CEO Ashish Shah erawh chuan,”Ngun taka kan ngaihtuah hnuah tumah chelh zui loa lilamna hmun atanga lei hi kan ti tlu ta a ni. Kan squad-a player tam zawk hi lilamna hmun atanga lei thin an ni a, team tha tak din theih kan inbeisei,” tiin a sawi thung.

Nikum semi-finalist Delhi Dynamos hian player tha tak tak an kawl nual a, chung zingah chuan FPAI Indian Player of the Year nilai Anas Edathodika te, USA a lo tal hrep tawh midfielder talent nei tha Kean Lewis te, nikuma an defender pawimawh Souvik Chakraborty te chuan club thar an nei ngei dawn niin a lang.

I-League Defender of the Year Anas phei hi chu tunlaia India defender tha ber ang hial a ngaih a ni a, player lilam huna club hrang hrangte inchuh nat ber pawl a nih a rinawm.

C Tlanthianghlima

Football tui ve tak

You May Also Like

More From Author

3Comments

Add yours

+ Leave a Comment