City – ah Aguero hun a liam em ?

Kum 2012 – a QPR laka Premier League chanchina goal pawimawh ber tih ngam thuntu Sergio Aguero contract chu tun season zawh hian a tawp dawn a, City – ah hian a cham chhunzawm dawn nge, club dang a pan dawn tih chu mitin zawhna a ni.

Argentine striker hian kumin June thla hian kum 33 a tling dawn a, City manager Pep Guardiola chuan an club tana a thil lo tih tawh te avangin zah taka enkawl a phu a ni tiin a sawi thin. Aguero hian City tan goal 254 thunin he club chanchina goal thun tam ber a ni a, Premier League bikah goal 180 thun tawhin goal thun tam lamah palina a ni phak a, English mi ni lo zinga goal thun tam ber a nih bakah hattrick siam tam ber (12) a ni bawk.

Hei erawh sawi tel a ngai, Aguero hian tun season – ah goal hnih chiah a la thun a, Premier League – ah phei chuan nikum January ni 21 – a Sheffield United laka goal a thun hnuah a la pet goal leh lo. Nikum June thla khan Burnley an hmachhawn tumin na takin a khup a tina a, beisei angin a dam chak lo. Covid contact a neih avangin khung hran ngaiin a awm a, aman a han kai zui leh bawk nen ! A dam that hnuah pawh ‘City player pawimawh’ a ni pha meuh tawh lo a, a hming lian mahse goal pawimawh thuntu dang an lo awm tawh.

Nikum February ni 19 atang khan minute 90 chhung khelh tluan a nei tawh lo a, heti chung hian Aguero kha a ni miau a, PSG, Barcelona, Juventus leh Inter Milan te’n an la hel reng tho. A awm loh chhungin Pep hian player hman thiam thar engemawzat a nei niin a lang a, ‘hei hi Aguero thlaktu chu a ni’ han tih tur awm chat lo mahse Argentine striker hi a chep riau tawh !

Pathianni zan hian a lansarhna thin Manchester derby khelh a ni dawn a, Kun Aguero hi a inlan emaw inlan lo emaw, season tharah hian eng club kawr pawh ha mahse, Premier League chanchina a sulhnu erawh nawhreh theih a ni tawh lo ang.