Barcelona an lang hmasa ber a, Manchester United an rawn lang leh a, tunah chuan Manchester City in Arsenal player lei an tum leh tawh.
Captain Cesc Fabregas hi chu aman chhuah a duh a, Barcelona hian a man an chhiar zat a an dawr a nih ngat chuan Arsenal pawhin an hralh phal dawn niin a lang. Hetih lai hian midfielder Denilson pawhin chhuah a duh a, Villareal leh Sao Paulo ten an lei duh bawk a, season thaah Arsenal kawr a hak a rinawm tawh loh.

Gael Clichy
English Premier League club hausa Manchester City chuan Arsenal French defender Gael Clichy chu an lei ngei dawn niin a lang a, Arsenal in a man an chhiar zat £7 million chu an pawm tawh. Kum 25 mi Clichy hian kum 2003 khan Arsenal a zawm a, tuna Arsenal player zingah chuan a senior ber a ni.A chhuah chhan hi thuchiang tak awm hrih lo mahse Arsenal manager Wenger hian Kieran Gibbs hi chher a duh a, first team-ah chance a ngah zawk nan Clichy hi a chhuahtir phal nia rin a ni. City ah hian kum 4 chhung contract a ziah rin a ni.

Sami Nasri
Arsenal in Samir Nasri contract thar ziahpui an tum a, karkhata £90,000 hlawh turin an thlem. French midfielder Nasri hian £110,000 tal a duh a, an inrem hleithei lo. Kum 24 mi Nasri hian lei duhtu a tlachham lo a, Manchester United leh Manchester City ten £20 million laiin lei an ngam a, City phei chuan karkhatah £180,000 an pe phal hial. Thuthar berah phei chuan Chelsea pawh an sawitel leh tawh. Season hmasa a Arsenal player tha ber (?) hi season thar ah hian a club ngaiah a la khel zel angem? Nge hlawh tam zawk leh champion beiseiin club tharah a hmel kan hmu ang?
Pe rawh u
Ngaihdan han zep tel ta lawk ila, Nasri hlawh beisei zat hi a tlem hauh lo. Chutichungin club pakhatah ‘star’ player a ni ve a, club lian danga an star player te hlawh a hre ve ngei anga, thiam dan inang rau rau ah hlawh tlem bik nih chu a nuam hauh lo ang. A hlawh ngen zat hi awmang lo lutuk pawh a ni lo a, Arsenal hian pe mai ta se an thatpui zawk angem?

Nikum khan Wayne Rooney kha a chhuak hman teuh hle a, United in hlawh tam tawkin contract an ziahpui a nih kha. EPL season tawp lama an player pawimawh ber a ni chho a, Champions League final an luh nana a thawhhlawk zia pawh kan hmu vek awm e.

Nasri thatzia kan hria a, Arsene Wenger phei chuan a hrechiang viau ang. Nikuma Fabregas inhliam chhungin a duhna ber a laiah a khel thei a, a khelhthat zia chu Premier League en thin chuan kan hmu awm e. Fabregas hi chhuak ta pawh ni se Nasri hi a aiawh thei tur khawpa tha a ni. A hlawh chu lo tam deuh pawh ni se, a khelhthat a, a champion pui theih dawn chuan a pawi dawn em ni? Fabregas a chhuah a, Nasri a chhuak bawk a nih chuan an hmunawl hnawhkhattu tur an zawnbuai ve iau a ngai ngei ang le. Engnge in ngaih ve dan?