Club dang chung leng City


Manchester City-in league match 17 chhung a zawnin an khingpui an hneh ta a, kum 2017 (calendar year) chhungin goal 101 an khung tling ta bawk. English football-ah pawh Pep Guardiola duh dan el pha leh ngam an awm lo.

Zanin Premier League inkhelah City-in an mual Eithad Stadium-ah Bournemouth 4-0 in an hneh. Pep-a hote tan hian Sergio Aguero (27′, 79′) chuan goal hnih a khung bakah Raheem Sterling (53′) leh substitute Danilo (85′) ten goal khat ve ve an khung bawk.

Cherries-in Manchester United goal khata an hneh loh hnuah Liverpool lakah 4-0 in an tlawm a, hemi zawh hian Chelsea 2-1 a hneh loin League Cup atangin an tla. Bournemouth kalkawng a hau tak a, Etihad Stadium-ah City ber kher an tum leh bawk avangin match li a zawnin an chak lo.

Manchester City erawh league-ah vawi 17 an chak zawn tawh a, eng chin nge an kal dawn tih pawh hriatthiam a har a, an hmabak hi Newcastle United, Crystal Palace leh Waford te an ni a, an record hi an sawhnghet sauh sauh a rinawm.

Krismas em pawh kan la thleng lo nachungin Manchester City hian point 55 an hmu tawh. Anmahni bertu Manchester United hian zanin hian Leicester City an hmachhawn dawn a, tun dinhmuna an inthlauhna erawh point 14 lai a ni a, Jose Mourinho hote an chesual a nih chuan Pep-a ropuina hi Premier League tihmuhnawm lotu a ni thei hial ang.

City-in kumin chhung goal 100 an khung tling a, Aguero pawhin Eithad Stadium-ah goal 101 a khung tling ve chiah bawk. Pep-a hnuaiah Argentine striker hi rinrawl ber a ni lo a, hei vang hian chhuak tura sawi hial a ni.

Inkhelh banah Aguero chuan, “Eithad Stadium-a goal 101 ka khung tling thei hi ka lawm a, goal khung zel ka duh a ni. Kan team hi chuan striker an zawng a, chuvang chuan ka tihtheih chhun chu goal khung a ni,” tiin a khelhpuite vanga goal khung thei a nih thu a sawi.

Manchester City chuan kum 1982 hnu lama English football league sang bera kumkhat (Calender Year) chhunga goal 100 thun tling hmasa ber an ni a. Liverpool chuan kum 1982 khan kum khat chhungin goal 106 an lo thun tawh a, hei hi Manchester City chuan an khum theih a rinawm ta hle.