Club lu tihaitu international break #FootballKaida

ZoFooty #FootballKaida

Club lu tihaitu international break
International break an tih chu ram inkhelh hun a ni a, tun ṭuma international break-in sawi zui a hlawh chhan chu Covid-19 vanga nghawng a ngah vang a ni.

Premier League club zingah pawh tun ṭum international break tuar an tam dawn a, club hrang hrang harsatna han bihchiang hmasa ila.

QUARANTINE
Mizoten Mizo ṭawng ang maia kan bel tawh ‘Quarantine’ hi sap ho buaina pawh a lo ni tho a, Covid-19 hian football-ah pawh nghawng lian tak a nei.

UK sorkar chuan dan khauh tak a siam red list-a zinte chu ni 10 chhung an in inkhung hran a ṭul a, hei hian footballer ram tana khel turte pawh an huam vek.

FIFA leh FA hruaituten theihtawp chhuahin hma la mah se UK sorkar an inhnuk hniam duh lo. Premier League club an inlungrual a, red list-a khel tur player-te chhuah an remti lo a, chutihrualin club ṭhenkhatin an chhuahtir ve tho bawk.

HREMNA/A NGHAWNG
Ram tana khel tura koh, kal ta lo te chu hrem theih an ni a. An ramin FIFA hnena an kal duh loh thu an thlen chuan international break zawh aṭanga ni nga chhung club tan an khel thei lo.

Tun ṭuma hremna hian September 10-14 chhung a awh dawn. Chutihrualin ram tana khel tura kalte pawh ni 10 chhung an in quarantine dawn avangin club chuan hremna hmachhawn a, kal loh tir hi a ṭha zawk hrim hrim.

Player quarantine-te hi chu ni 10 chhung an inkhung hrang dawn a ni ringawt lo a, training an neih dawn loh avangin quarantine hun an hman zawh hian inkhel turin an inpeih kher lo ang.

October leh November thlaah international break a awm leh dawn a, Covid-19 in kiam lam a pan loh a nih chuan tun ṭuma buaina bawk hi club leh player-te tawn leh tur a ni ang.

TOTTENHAM
Table chung bera awm Tottenham Hotspur hi a tuar a nasa ber a ni thei hial ang. Spurs hian ram tana khel turin Cristiano Romero ,
Giovani Lo Celso leh Davinson Sanchez te an chhuah a, South American player-te hi te hi tunkar tawpa Crystal Palace an hmachhawn hunah an khel thei dawn lo.

Player pawimawh ber zinga mi Son Heung-Min chuan South Korea tana a khelhnaah a chawn a ti na a, rawlthar duhawm Oliver Skipp pawh England U21 tana khelhnaa a ṭhalah a hliam a tuar bawk.

Netherlands-in Turkey 6-1 a an sawp ṭumin Steven Bergwijn-a’n inkhel bul a ṭa a, second half-ah bench-a a ke a tum bur lai thlalak a darh nasa hle. Ryan Sessegnon pawh a inhliam ani erawh bul a ṭan phak loh avangin Eagles nen a khel thei lo a nih pawhin Spurs-in an tuar hran lo ang.

Tottenham hian an match hnuhnung berah Watford 1-0 in an hneh a, hemi ṭuma goal awmchhun khungtu Son-a chhiar telin bul ṭantu player pali chu Eagles hmachhawn lo thei dinhmunah an ding.

LIVERPOOL
Liverpool-in Brazilian player-te chhawr theih an la inbeisei a, Leeds United an hmachhawn dawn avangin keeper Alisson mamawhna a sang lehzual ang. Reds tan hian Alisson bakah Fabinho leh Roberto Firmino te an chhawr thei dawn lo.

Transfer laia defender Ibrahima Konaté chiah laluttu Reds hi an squad a pan avangin football pundit ṭhahnem takin Manchester City leh Chelsea te huangah an dah lo. Leeds nena an khel tur hi Jurgen Klopp leh a hote tan fiahna ṭha tak a ni thei ang.

MANCHESTER CITY
Manchester City-in Gabriel Jesus leh Ederson te an chhawr thei dawn bik lo a, Covid-19 vanga an second keeper Zack Steffen chu a in quarantine mek bawk. Hemi a nih avang hian kum 36 mi Scott Carson chauh keeper chhawr tur a awm tihna a ni.

Fantasy Premier League-ah phei chuan Carson-a hming hi dah tel a ni lo. Tun hnai bika Man City player zinga khel ṭha bera chhal ngam Jesus awm lo tur hi Pep Guardiola-a’n pawi a ti dawn a, an khingpui tur hi Community Shield-a an hneh loh Leicester City an ni a, kim ṭhap pawhin point hloh theihna tur a ni tlat.

CHELSEA
Chelsea defender Thiago Silva pawh khel thei lo zingah a tel, chutihrualin Blues erawh an squad a chhah avangin Brazilian defender awm loh hi chhuanlam siamna tham niin a lang lo.

Thomas Tuchel-a hote vanneihna erawh an khingpui hi Aston Villa an ni dawn. Villa hian keeper pawimawh Emiliano Martínez leh midfielder ṭha Emiliano Buendía te quarantine vanga an chhawr theih dawn loh avangin Blues aiin an tuar zawk ang.

MANCHESTER UNITED
Manchester United-in midfield lai luahlumtu Fred an chan dawn a, Ole Gunnar Solskjaer-a hote hian tun Inrinni zan hian Newcastle United an hmachhawn dawn.

Mak ang reng tak erawh Man United ṭantu zingah Fred-a awm loh pawi ti lo an ṭhahnem a, hlim deuh deuh pawh an awm. Chubakah Man United ṭantute hian Fred leh player dang an ngaihtuah hman lo a, Cristiano Ronaldo inkhelh hun nghakin tun kar tawp a nghakhlel hle.

Comment lamah han sawi belh ula.