Spanish champion an ni a, European champion an ni leh a, tunah chuan World Champion an ni leh ta. Japan rama khelh zawh tak, Club World Cup final-ah Barcelona chuan Brazilian club Santos an hneh a, ‘official’ takin khawvela football club ṭha ber an nihzia an nemnghet. (Club World Cup hi khawmualpui hrang hranga club competition champion ten an inchuh ṭhin a ni tih kan hriat vek a rinawm).

Barcelona hi khawvela football club ṭha ber an ni tih hi rinhlelh rual a ni lova, an thiam ber tih nemnghet turin Club World Cup lâk kher pawh hi an mamawh lem lo. Mahse Barcelona an ni miau a, an banphaka awm chu an la zel a ni ber mai. Pep Guardiola hnuaiah hian champion theihna 16 ah vawi 13 tehmeuh an champion tawh!!!

Inkhel chanchin

Santos lamah hian tunlaia player ngaihven hlawh ber pawl Neymar a awm a. Ani bakah hian Brazil international Ganso, Henrique leh Brazilian player ṭha tak tak an ther fur mai. Barcelona lamin Club World Cup hi an khel ‘mai mai’ lo tih a lang a, beisei ang ngeiin Guardiola chuan a player neih ṭhat ber berte a luhtir.

Santos hi defender panga hmangin an rawn inrem a, a tirlamah Barcelona in ball an chang tam. Minute 17 ah an pet goal ta mai reng a, goal thuntu chu tudang ni lovin Lionel Messi bawk a ni. Penalty box bula Xavi pass ṭha tak chu Messi chuan lo changin, keeper pêt khumin mawi takin a khung a ni. Barcelona an phûr sawt a, minute 24 ah Xavi chuan a pêt goal leh a, minute 45 ah Cesc Fabregas chuan a thun bawk. First half a zawh meuh chuan champion tur a hriat der tawh.

Second half-ah Barcelona an inthlahdah deuh niin a lang. Santos hian ball an chang tam ve hret a, first half-a hnuh tur awm mang lo Ganso leh Neymar te pawh an lang tam ve deuh. Mahse minute 82′ ah Messi chuan Barcelona goal 4 na a thun leh a, kum 2011-a tournament an khelh zingah Copa del Rey tih loh chu an la fai vek a ni. Final-ah hian chak an phû a, champion hi an phû a, he team hi football history-a team ṭha an sawi chuan an sawi tel ve ziah tawh ang.

Big game-ah big player Messi

FIFA Ballon d’Or kawl mektu Lionel Messi leh a elpui Cristiano Ronaldo inan lohna chu, game pawimawha an inkhelhṭhat hleih ṭhin hi a ni awm e. Messi hi chu game a pui poh leh a khel ropui emaw tih mai tur a ni ṭhin. Barcelona in big game an khelhin a teammate ten amahah beiseina an nghat ṭhin a, an beisei ang ngeiin a chakpui thei deuh ziah mai. Game zawng zawnga khelh ṭhat theih chu a ni lova, mahse a tawpkhawkah chuan Messi hi chu Messi a lo ni leh nge nge ṭhin.

Fabregas leh Xavi an indîp lo

Barcelona in nipui bazara Cesc Fabregas an lei khan Xavi thlaktu tura an lei emaw kan lo ti a, a tirlamah chuan substitute bench lamah hun tam zawk a hman kan lo ring a nih kha. Mahse Barcelona coach Pep Guardiola rilru kan phâk loh vang a lo ni. Xavi, Iniesta leh Fabregas te hi an indîp awkawng lova, an pathuma an khelh hian Barcelona an ṭha em em zawk a ni. Hei hian Barcelona fans te lawmna a belhchhah ngei ang.

Mimal chawimawina leh lawmman 

Tournament chhunga che ṭha ber hnena an pek ṭhin, Golden Ball Award chu Barcelona player Lionel Messi hnenah hlan a ni (A ni lo tunge ni chuang ang).

Player of the tournament (Golden Ball): Lionel Messi (Barcelona)
Silver Ball: Xavi Hernandez (Barcelona)
Bronze Ball:  Neymar (Santos)

Goal ho en duh tan a hnuaiah hian a en theih e. Barcelona pet goal ho hi chu class hlawm rem rem tak a ni.