President’s Cup hi Chennai-a Mizote football-a kan in elna a ni a, February ni 6, 2010 leh February ni 13, 2010 khan khatih hunlaia Chennai Mizo Welfare Association Sports Secretary, Tv. Lalzarzova kaihhruaina hnuaiah neih tan a ni. President’s Cup a nih ang hian CMWA-a kan President Pu P.C. Lallawmsanga I.P.S. in cup hi a tum a ni. A vawi khatnaah hian team nga (5) – Chepauk Mizo F.C., MCC-I, MCC-II, Choolaimedu Mizo F.C. leh Dy-loh-Dy te awmin league-a khelh a ni a, MCC-II an champion a ni.

A vawihnihna September ni 25, 2010 leh October ni 2, 2010-ah neih a ni leh a, hetah hian Lorraine F.C. team thar an rawn tel belh a, team ruk (6) awm tawhin, pool hniha in then a ni a, league + knockout a khelh niin MCC-II tho an champion leh a ni.

September ni 24, 2011 leh October ni 1, 2011, khan a vawithumna atan neih leh a ni a. A vawithumna an her chhuah meuh chuan, tournament a phuisui bakah, team tinte paw’n fans an nei tha hlawm hle. Kum danga awm ngai lo, Fairplay Award leh Best Fans cup siam belh a ni a. Chumai bakah, tournament kan khelh theihna chhan ber, CMWA President P.C. Lallawmsanga I.P.S. (kum 50 chuang tawh) chu Chepauk F.C. tan a rawn khel ve a, hei hian fans ho pawh a ti phur hle a tih theih awm e. Kuminah hian team ruk (6) tho, Chepauk Mizo F.C. MCC-I, MCC-II, Choolaimedu Mizo F.C., Dy-loh-Dy leh Lorraine F.C. te an tel leh a, league + knock out thova khelh leh a ni a, Champion tura rin kai ber, defending champion lai MCC-II chuan Choolaimedu Mizo F.C. chu semi final-ah 1-0 in an hneh zo ta lova, semi final pakhat zawkah Chepauk Mizo F.C. in 2-1 in MCC-I an hneh bawk a. Final-ah Choolaimedu Mizo F.C. nen an in su ta a ni, Chepauk lam hian Choolaimedu-te hi group stage-ah an lo hneh tawh avang leh fans an neih that em avangin champion an in ring hle a. Match tan tirh atangin an in khel tawk hle a ni. Chepauk lamin an nawr deuh zawk a, goal bar pet per dawt dawt mah se, goal an thun thei bik lo. An in draw mai dawn emaw tih hnuin, Choolaimedu Mizo F.C. captain Joel-a chuan, Chepauk defender leh goalkeeper in ring thul nang fuhin, cool zetin a pet goal ta, Choolaimedu Mizo F.C. an champion pui ta a ni.

– H. Lalchawimawia
Sports and Cultural Secretary
Chennai Mizo Welfare Associaion (CMWA)

President’s Cup 2011 thlalak en duh tan pics.zofooty.com ah en theihin a awm e.