Barclays Premier League (BPL) 2011/12 a zo a, Champions League kan en zo leh a, Euro 2012 a zo leh a. European football, a bik takin English football tuichilh tlattu Mizo mipuite kan khua a har. Euro 2012 ah inhnangfakna kan zawng a, Mizoram Premier League playoff boruak a alh hluai a, I-Day Invitation tournament leh Olympics football in min chiah zui a, kan en a, kan sawi a, kan chhiar bawk. Hetih chhung zawng hian kan rilruin nghah a nei a, thildang zawng hi chu kan duh ber kan nghah chhunga ‘khawhar hnemtu’ mai a ni. Tunah chuan a hun a thleng ṭep tawh a, Barclays Premier League 2012/13 kan nghakchhuak dawn ta e. A kamkeuna pawh Pathianni zan mai a ni ta.
FA COMMUNITY SHIELD
August 12, 2012 6:00 pm (IST)
StarSports
Season thar khuhhawnna
Sap media ho chuan ‘Clash of Cash’ te an ti a, ‘Battle of the Blues’ te an ti thul. Premier League 2011/12 champion Manchester City leh FA Cup 2012 champion Chelsea ten English football season thar an hawng dawn a, season hmasa-a English club che ṭha ber pahnihte season thara inkhel hmasa berah an innuai nghal dawn.
England ah Chelsea leh Man City aia squad nei ṭha an awm lo. Transfer market-a huai ber pahnih an ni a, star player ngah ber an ni bawk a, Pathianni zanah superstar rual an inlan dawn e. Manager pahnihten an team ‘ṭha’ an khelhtir dawn tih an puang ve ve tawh a, chak tumin an khel dawn. Hei lo liama season thar hawnna inkhel a awm dawn chuang em ni?
Villa Park ah tehdaih
Community Shield hi London-a Wembley Stadium-ah khelh ṭhin a ni a, tunkumah erawh London ah Olympics nghah a nih avangin Birmingham khawpuia Aston Villa home gound, Villa Park ah khelh ṭhin a ni ang. Villa Park hi a hma chuan FA Cup semi final khelh ṭhinna a ni tih kan hre deuh fur awm e.
Chelsea: Hazard leh midangte
Field chhunga player tharte che vel hmuh hi season thar nghahhlelhawm chhan ber pakhat a ni. Champions League leh FA Cup a champion kawp thei khawpa ṭha Chelsea hian an neihsa an duhtawk lo a, nipui bazara player thar ‘langsar’ lalut nasa berte zing ami an ni. Eden Hazard, Marko Marin leh Oscar te ho hi Europe club lian dangte nen an inchuh hrep hnua an leite an ni a, a bik takin Lille thiampuipa ni ṭhin Eden Hazard hmuh chakin Chelsea fans te chil a pût tawh ti ila kan tisual tam awm lo e.
Marko Marin hi a chawn thâ a nat avangin Community Shield-ah a inlan ve thei dawn lo a, Marin tih loh hi chu Chelsea in inhliam an nei lo. Player thar Oscar hi Olympics football final-ah Brazil tân a khelh a ngaih avangin Pathianni zanah a khel hman lo bawk ang. Juan Mata leh Daniel Sturridge te hian Olympics ram aiawhin a khel ve ve a, hei vang hian chawlhtir an ni maithei bawk.
John Terry, David Luiz, Ashley Cole, Mikel, Ramires, Fernando Torres, Frank Lampard te ho hi Hazard tel lova Europe champions ni thei ngat kha an ni a, Roberto di Matteo nau te hi an chhe dawn lo. Inkhel pawimawh leh langsara an innghahna pakhat Didier Drogba chhuah hnua inelna an hmachhawn hmasa ber a ni dawn a, Torres hian Drogba ai a awh zo tak tak dawn a nih chuan Community Shield hi bulṭan nan a hman chi khawp ang le.
Manchester City: Superstar rual team chu
Chelsea in player thar an neihṭhat zia kan ziak a, Manchester City player neihsate ṭhatzia hi kan hmuhhmaih ang tih a hlauhawm. Transfer bazarah kumdang ang lo takin an reh hle a, tun thlengin player langsar lakluh an la nei lo. Hetichung hian player malkhaiah ngau ngau chuan he team aia ṭha hi England ah an awm chuang lo.
Tlarhmaah world class striker tih theih pathum an nei a, a thlawp turin David Silva an nei a, midfield ah Yaya Toure a awm bawk. Tlarhnungah captain Vincent Kompany a awm a, Joe Hart aia keeper ṭha hi Premier League ah an awm bik lo. First XI zing ami thlak ngai awm se, amah tluka ṭha lut tur an awm thei zel a, hei hi Manchester City leh an elpuite inan lohna langsar ber pakhat a ni.
Midfielder Gareth Barry leh defender Micah Richards te chu inhliam vangin an khel thei dawn lo chiang tawh a, Vincent Kompany pawhin hliam tenau nei mahse a fit hman tura ngaih a ni. Balotelli leh David Silva te hi training an zawm tlai deuh avangin a tir aṭangin an khel lo maithei a, midang zawng chu hamrik rik ruala inpeih at thei tura ngaih an ni.
Manager te thukhawchang
May thlaa Premier League champion an nih hnua an ‘competitive game’ hmasa ber tur a ni a, Man City manager Roberto Mancini chuan, “Season tâwpah Premier League champion nih phah thei dawn ila chu Chelsea hneh loh hi ka pawiti lo ang a, mahse chak kan tum ngei hi a pawimawh a ni. He cup hi hunrei tak chhung kan la tawh lo a, chuvangin chak chunga season thar bulṭan hi a pawimawh hle a ni.
“Chelsea hi team ṭha tak an ni a, Champions League a an champion hnuah player ṭha tak tak pali panga vel an lei belh leh tawh a, khelh a awlsam dawn lo tih kan hria. Game harsa tak a ni ang.” tiin a sawi.
Chelsea manager ‘nghet’ Roberto di Matteo chuan, “Team ṭha tak, chak thei ngei tur ka luhtir ang. Kan player te hi hun hrang hranga pre-season training zawm an nih avangin fitness ah pawh an inkhuangrual lo hle a, a ṭhente phei chu tunkarah Olympics aṭangin an rawn lêt chauh a, chuvangin chumi position ah tunge ṭha ber dawn tih hre tur chuan hun a la duh hret dawn a ni. He team-ah hian first XI chang tura inelna a nasa a, thianghlim taka player te an inel theih nan kawng zau takin ka hawng reng a ni.” a ti.
Roberto di Matteo thusawi han chhiar mai chuan Chelsea hi an la inpeih lo deuh niin a lang a, chutihrualin first XI chang thei tura a player te a fuih thiamzia kan hmu thei bawk.
Indona ka hmuh châk te:
Football hi team game a ni a, team pumpui hi a pawimawh. Chutihrualin football team-ah chuan player ṭha fal bik an awm zel a, Chelsea leh Manchester City te intum tur pawh hi player ṭha ngah ve ve an nih avangin superstar leh superstar inveng tur an awm nawk mai. Field chhunga player inveng tur ka hmuh chak ber pathum ka rawn thlangchhuak a, a bak chu comments lamah kan sawizui dawn nia.
1. Sergio Aguero vs John Terry
Hei hi ka hmuh châk ber a ni. May thlaa Manchester City in Premier League an champion na goal khungtu Aguero hi Rooney leh van Persie te nen ‘class’ khata khungho tur khawpin a che ṭha a, a goal bawh na tak, a tlanchak leh cherang lutuk te avang hian amah ringawt pawha hmuhnawm tham a ni. Terry hi mi tamtakin a tlachhia an tih hnua ropui taka rawn comeback thei ziah a ni a, defender rang ber chu ni lo mahse a chak leh huaisen vang te, game a man em avang leh boruaka a ṭhat vangin khawvela defender ṭha ber pakhat a la ni reng. Hemite pahniha a che ṭha zawk zawk hian inkhel result a tidanglam pha hial ang.
2. Fernando Torres vs Vincent Kompany
Torres tluka striker sawisel hlawh hi an awm kher lo ang. Chelsea a zawm hnuah beisei a phak loh avangin chhia tinreng phurhtir a ni a, mahse game ṭhenkhata a ‘class’ a pholan apiangin sawiseltute ka hupin a awm ṭhin. Season hmasa tâwplamah a che ṭha a, season tharah hian ṭha taka bulṭan a duh ang a, chumi ti thei tur chuan Vincent Kompany paltlang a ngai ang. Kompany tel lo chuan Manchester City tlarhnung hi a defence ‘naran’ a ni a, a tel chuan ‘world class’ defence a ni thung an ti ṭhin. Premier League-a centre back ṭha ber chu a ni lo maithei a, mahse a ni aia ṭha panga sawi tur nise, huai taka sawi tur an vang pharh ang.
3. Yaya Toure vs Mikel
Season hmasa tawplama Manchester City player pawimawh ber Yaya Toure hi midfield-a Man City innghahna tur a ni ang. A khelhṭhat niah chuan danbeh theih loh tluk a ni a, amah chauh pawha midfield pum thunun thei a nih zia chu Manchester United player ten an hrechiang khawp ang. Mikel hi Chelsea-a khel pha mang lo, di Matteo hnuaia harhtharna chang a ni a, Champions League final-a Chelsea midfielder khel ṭha ber a ni hial ang. Anni pahnih hi a tir aṭangin an khel ve ve a nih chuan midfield battle hmuhnawm tak kan beisei thei dawn e.
A tawp nan neuh neuh:
* Manchester City leh Chelsea te hi a pumpuiah vawi 143 an intum tawh a, Chelsea hi vawi 61 (42.66%) chak tawhin, Manchester City hi vawi 46 (32.17%) an chak tawh a. Vawi 36 (25.17%) an inhnehtawk tawh bawk a ni.
* An intum tawhna ah Chelsea hian goal 208 thun tawhin, game khatah goal 1.45 zel thun ang an ni a, Manchester City hian goal 180 thun tawhin, inkhelh apianga goal 1.26 thun ang an ni.
* Chelsea hian kum 1955, 2000, 2005 leh 2009 ah te Community Shield hi an lo chawi tawh a, Manchester City hi kum 1937, 1968 leh 1972 ah te an lo champion tawh bawk a ni.
cialis from canada
cialis black
Generic viagra usa
Real viagra online
A va hmuhnawm awm (loh) ve.
Carlos Tevez (59′) leh Samir Nasri (65′) ten Man City tân an thunbelh a, Manchester City 3 – 1 Chelsea a ni mek e. Minute 66 an khel tawh.
TV ah an live lo tih chu kan hre ṭheuh tawhin ka ring. Internet a chhe char2 a, hei a rawn ṭha ve leh e. Score update kan lo tum dawn nia,
Yaya’n a ti goal ve tlat mai. 1-1 a in an in draw mek. Ivanovic an 1st half h red card a hmu khanglang chu avan pawi ve le.
Olympic hi ninawm, k en thei lo leh ta…. Chanchin min hrilh thei in awm m w…..
40 minute hnu ah Torres an a thun a, chelsea in 1-0 in hma an hruai e.
Ka ning lutuk! A hmunah kan en ve thei mang silo a, min pawngsual ani ringawt a lawm mawle. Inkhel focus tur hrim2 satellite hi ka siamchhuak mai dawn mawni zawk le.sala
Ha3..in pahnih a in por ve theih lai… Lo por ve hrih teu..
OLUMPIC HI KA HNE TAWH VENG2 HLE MAI
Olympic an lo hmuchhuak kher2 hi ka dem lek2 tawh. Live a kan enna a dal zo niin ka hre hria.hehe
Live na awm chuan min han hrilh ve teh u, en chakawm lutuk hui..ha.
Huiha! Khawi channel ah nge live na a awm le? Ka zawngkual nasa tawh lutuk…!
Correction: Tun thleng chuan StarSports ah Community SHield hmel reng reng a lang lo tlat. Nizan khan schedule ah a awm reng si a. ESPN ah dar 10 ah a indah leh daih tawh a, live a enna tur channel ka hre mai bik lo tlat.
@bluesolias: dishtv k pot a, india starsports schedule ah a awm e.
An pekna tur channel hi a chiang em o?..india *sports nge khwchhak zawk ?..entheihloh ka hlauteh mainia 🙂
Zanin ni der tawh mai a.. Ngaihnawm hle mai macha..
ka en chak hle mai ..mahse dar 6 a lo ni trit a nih hi!!
Player an nei tha dun lutuk hian inkhel en a tichakawm. Hazard hi Nigel de Jong nen an incheck hmel a (a laia a khelh chuan), hmuhnawm khawp ang.
Post chu chhiar manhla hle mai, a ngaihnawm e..
CHELSEA chu chak ngei tur ah ngai ang, Hazard en a chakom toh khop mai…
Post tha kher mai….. En a chakawm tawh khawp mai….
En a nuam dawn lutuk tlat. Chelsea kan chak ngei ka ring bawk e.