Copa America Quarter Final match hnuhnung zawk pahnih te chu nizan khan khelh zawh a ni a, Brazil in Paraguay penalty shootout ah an hneh lo a, Brazil player pali rawn pen chhuak ten an pet goal lo vek!!! Chak tur a rinkai zawk Chile in Venezuala hnehlo in an tla bawk.

Brazil vs Paraguay :

Brazil tlak dan a na a, inkhel i en a Brazil fans i nih chuan thinrim tak in i mu ngei ang, Brazil i tan lem loh erawh chuan i nui ver ver thung ang!! La Plata khelmual a Quarter Final match 3- na inkhel ah Brazil leh Paraguay te hun pangngai ah goal awmlo in an inhneh tawk a, penalty shoot out hmang a chakzawk zawn na ah Brazil player tha Elano,Silva,Santos leh Fred ten goal an khung lo vek a, an chak loh pui ta a ni!! Game ah pawh Brazil hian an hneh hle a, an pet goal thei lo an tuar ta a ni, Pato in box chhung ah a lak luh Paraguay keeper Villar in vawi hnih a ke a alo pet chhuah te, Goal line ah Paraguay defender in a lo head chhuah te, save ropui tak tak hmang in Paraguay hi an vannei ta zawk a ni. An goal keeper Villar in a chhandam ti ila kan sawisual lovang. Villar hi nikum World Cup ah Spain nen an in tum tum a Xabi Alonso penalty lo save tawh tu ngat kha a ni.

Game boruak pawh a tang hle min 102′ na ah Lucas leh Alcaraz te chu intihbuai avangin hnawhchhuah ve ve an ni a, hei a tam player involve ah hian an ni pahnih chiah hnawhchhuah an ni mah mah!!! Brazil ho in an chance tamtak an hluah kha chu an ui ngei ang, mahse football ah chuan a pet goal tam tam chak a nih avangin a pet goal tlem zawk Brazil an tla ta a ni!!! Paraguay hi Capa America dan thar team 12 an tel theih hnu  kum 13 hnuah semi final an kai vawikhatna a ni.

Chile vs Venezuala :

Alexis Sanchez awmna Chile hi team chhia an nilo Venezuala chu hneh tur a ngaih an ni, mahse 2-1 in an hneh tlat lo!! Venezuala hian a vawikhatna atan Copa America semi final an kai ve ta. San Juan khelmual a inkhel ah Chile hian game an control tluan a, mahse an chak zo lo!! Oswaldo Vizcarrondo chuan min 34 na free kick atang a ball lokal chu nalh zet in Venezuala tan a head goal a, fist half a tawp chhunzawm nghal a. 2nd half ah Chile an rawn tang nghal a, an ball bawh a na thei hle, Cross bar ah vawi hnih chiang tawk tawk in an pet per dawp dawp a, gaol ber an khung thei lo.!! Humberto Suazo Chile no 9 chuan a min 69′ ah a pet goal a, Chile in an nawr chhunzawm nghal a, Goal line ah defender in vawi hnih an head chuah te chance tha tak tak an miss te chu a uihawm thei hle, min 80 ah Venezuala lam in Free kick an hmu a, Chile goal keeper a chesual a, a ball ben per lo kir leh chu Gabriel Cichero chuan a lo pet lut a, hei goal ho an chakpui ta ni.

Semi Final Fixture :

Paraguay vs Venezuala 21.07.2011 (6:15 am IST Neo Sport)