Copa del Rey round of 32 a Barcelona leh Hospitalet an intum tur thu tihchhuah a nih khan Barcelona hi chak chiang tura rin zawk an ni. Mahse an han inkhel ta a, first leg chu Hospitalet home-ah khelin Barcelona hian goal 1 chiah an thun a. Barcelona coach Pep Guardiola pawhin Hospitalet chu team ṭha tak an nih thu leh, Camp Nou-ah pawh zah tak chunga an lo mikhual tur thu a sawi nghe nghe a nih kha. Camp Nou-ah an han inkhel ta ngei a, Guardiola naute hian an mikhualte hi si kua ngawt an lo phurh!!!

Inkhel an ṭan phat aṭangin Barcelona hi an chak zawk dawn tih a chiang nghal a ni deuh ber mai. Minute 11 ah Pedro chuan goal hmasa ber a thun a. Iniesta chuan minute 19 ah thun lehin, Alcantara chuan minute 23 ah a thun leh a. Xavi chuan minute 36 ah Xavi chuan goal 4 na thunin, minute 43 ah substitute Tello chuan a thun leh a, first half a tâwp meuh chuan 5-0 a ni der mai. Mahse darkar chanve vel an khelh hnuah Iniesta chu inhliam vangin a chhuak a, Barcelona lawm a kim bik lo.

Professional level-ah inhlahthlem a awm lem lo bawk a, second half-ah pawh Barcelona hian an mikhualte an dim lo hle. Minute 49 ah Isaac Cuenca chuan a pet goal a, Alcantara (55′), Tello (65′) leh Cuenca (81′) ten thunbelhin, hun a tawp meuh chuan Barcelona hi 9-0 ngawtin an chak ta a ni. First leg-a an lo chak tawhna nen belhkhawmin 10-0 a chakin round of 16 an lutchiang hle.

England-ah chuan Krismas leh kumthar lai hi inkhel tam hunlai a ni a, mahse Spain-ah chuan an chawl hlauh thung. Barcelona pawh hi January ni 8 ah Espanyol (La Liga) nen an inkhel leh chauh dawn a, kar hnih vel chawl tura ngaih Iniesta pawh a khelh theih beisei a ni. Club World Cup champion hlim Barcelona tân thu lawmawm tak a ni ngei ang.