Nilaini zâna Copa del Rey quarter final second leg hmuhnawm takah Barcelona leh Real Madrid te chu Camp Nou-ah 2-2 in an inhnehtawk a, Barcelona hi Santiago Bernabeu ah 2-1 a an lo chak tawh avangin semi final an lût ta. He inkhelah hian Barcelona in Pedro leh Dani Alves te hmangin hma an hruai zet a, hei hi Ronaldo leh Benzema te hmangin Real Madrid in an sût leh a ni.

El Clasico dang ang thovin inkhel hmuhnawm tak kan hmu. Goal 4 a lût a, goal teuh kan hmu nual a, han innam deuh sak sak leh referee hual tuau tuau pawh an la sim lo. Red card pawh a awm leh ngei e.

Tutenge inkhel?

Barcelona:  Pinto; Alves, Pique, Puyol, Abidal; Xavi, Busquets, Iniesta (Pedro 30′); Messi, Fabregas (Alcantara 70′), Sanchez (Mascherano 78′)

Real Madrid: Casillas; Arbeloa, Ramos, Pepe, Coentrao; Diarra (Granero 52′), Xabi Alonso; Kaka (Callejon 61′), Ozil, Ronaldo; Higuain (Benzema 61′)

A tirah mikhual tlangval an pâwr

Camp Nou a ni a, he khelmual hi Barcelona mual hmanthiam a ni. Mikhual team tamtak an lo lenglût tawh ṭhin a, Camp Nou boruak leh Cules ho authawm nen, Barcelona team ropui tuar lovin an lo zamchhe tawh ṭhin.

Nilaini zânah erawh mikhual team hi Real Madrid an ni a, inkhel ṭantirah hian zam lo mai a ni lo, goal an nawr nghal pawp pawp mai. Inkhelh ṭan aṭanga minute 1 pawh tling lo ah Dani Alves ball pass chu Gonzalo Higuain chuan lo changin, goal ngei tawh tur niin a lang a. Mahse Higuain hian a pet out hlauh. Hemi hnu lawkah Higuain bawk hian a head goal teuh leh hle a ni. Oezil chuan goal kham (bar) a pet per dawp bawk. Real Madrid in bul an ṭan ṭha zawk a, nidang ang lo takin Barcelona defender te an che buai lek lek ṭhin.

First half-ah hian Barcelona midfielder Andreas Iniesta chu inhliam vangin thlak a ngai a. Inpet lui, tlu der leh na der hmuh tur a tam viau a, hei hian inkhel en a ti nuam lo lek lek ṭhin a ni. First leg-a Messi kut rap lui tu Pepe chu second leg-ah Messi hian a pêt (lui?) ve deuh sak a, Barcelona fans te rilru a nuam huai huaiin a rinawm.

Messi ropui-a a lo lang e

Real Madrid in bul ṭan ṭha mahse, first half tâwp khar ṭha zawk chu Barcelona an ni. Minute 43 ah Messi chuan Real Madrid defender engmawzat tlanpelin ball a la lût a, Madrid defender ten an bawr luai luai laiin chângtu nei lo Pedro a pe phei a, a ni hian awlsam angreng takin a lo pet goal. Hemi hnu lawk, first half injury time-ah Dani Alves chuan penalty box pawn aṭangin goal mouth chung sîrah goal mawi em em mai a thun a, first half a zawh meuh chuan Barcelona in 2-0 in hma an hruai a, aggregate phei chuan 4-1 a ni der mai.

Second half-ah Real Madrid comeback

Real Madrid tân semi final lût turin goal 3 thun ngei ngei a ngai tawh a, goal nawr chiah duhthlan tur an nei. Camp Nou-ah Barcelona in defensive game khelh an tum bik si lova, team ṭha pahnih an innawrtawn ta a, second half chu hmuhnawm tak a ni.

Barcelona hian nidang ang bawkin ball an chang tam zawk a, an goal nawr pawh a hmuhnawm. Field lehlamah Real Madrid hmatawng tlanchakte an hlauhawm ṭhin hle bawk. Minute 53 ah Sergio Ramos chuan Barcelona goal chhungah a head lut a, mahse Dani Alves a pawthhluk avangin goal hi pawm a ni lo. Minute 68 a ni a, Oezil through ball dik zet chu Ronaldo chuan lo changin, keeper Pinto a bum zet hnuah a pet goal. Mikhual lam hi an phur sauh a, minute 72 ah Benzema chuan mawi taka Puyol a bum hnuin a pet goal leh a, an siphurh a sût zo.

Team pahnihte huntawp dawn thlengin an innawrtawn a, goal hlauhawm pawh an nei nual ve ve. Mahse goal dang luhbelh lovin an inṭhen a, Aggregate in Barcelona in 4-3 a chakin semi final an lut ta a ni. Tunhnaia El Clasico game 7 ah Real Madrid hian Barcelona an hneh zo tawh lo.

Huntawp dawnah Sergio Ramos chu yellow card pahnih a hmuh avangin hnawhchhuah a ni bawk.

Inkhel zawh titi

* Barcelona in ball an chang tam zawk leh ngei mai a, mahse second half-ah ball pass sual an ngah ve hle mai. Iniesta awm loh a lang deuh a, Real Madrid player te tlan tam leh taimak vanga an tihsual a awm nual bawk. Fabregas khelh ṭhat loh ṭum tak a ni bawk.

* Real Madrid striker Gonzalo Higuain a ‘nil’ hle mai. A tira chance ṭha tak tak a neihte goal-ah a chantir loh avangin a inrintawkna a hloh deuh pawh a ni ange.

* Carlos Puyol hi defender ṭha tak a ni tih kan hria a, mahse tlemin a ṭuan a muang ve ta deuh niin a lang. A bik takin Benzema rawn luh hnuah a kum tamna a langsar ta deuh. Barcelona left back Abidal-a’ n Mesut Oezil a chhuah zauh zauh bawk. Abidal awmna lam aṭang hian Madrid in an nawr tam hle.

* Lionel Messi mawlh mai hi. Ball a chan ve chuan Madrid defender te an phu dual a ni ber mai. Duhtawka ball a’n tlanpui ṭhin hmu theia kan awm hi kan vannei a ni e. Madrid defender ten Messi an ven uluk lutukna lamah Pedro leh Alexis Sanchez ten hmunawl an nei leh duai ṭhin.

* Mesut Oezil a langsar a, ball awmze nei tak tak a siamchhuak hnem hle.