Costa goal-in Chelsea vawrh

Chelsea-in Diego Costa goal hmanga Middlesbrough 1-0 a hnehin Premier League hmahruaitu an ni.

Pathianni zana Riverside Stadium a inkhelah mualneitu Boro-in goal venhim tumin theihtawp chhuah mah se Costa an dang thei lo. Spain international striker Costa hian tun season Premier League-ah goal 10 a khung tawh bakah assists vawi thum a nei tawh.

Antonio Conte kaihhruai Chelsea ropuina tak erawh Premier League match ruk a zawnin an chak a, goal an chhuah lo. August 2010 hnua Blues-in hetiang record duhawm an neih leh theih hmasak ber a ni.

Striker Goal
Middlesbrough-in team tha zawk an hmachhawn tih hriain tlarhnungah player an dah hnem a, Chelsea-in ball an changin Boro player tam zawkin ball leh goal inkarah an awm hman zel avangin Blues tan hna a awlsam lo.

Boro-in counter attack hmangin goal khung an tum a, Gaston Ramirez thawkrim mah se a hmawr bawk dawnah Uruguayan midfielder a class tawk thin lo.

Chelsea-in inkhel an thunun a, Premier League match 150 khelhnaah Eden Hazard chu player hmuhnawm a ni. Minute 29-naah Belgian winger Hazard-a ball fing chu Victor Moses-a’n um lutin Chelsea wing back cross chu Pedro-a’n hnai tak atangin goal zawnah pet mah se Boro keeper Victor Valdes-a’n mak takin a dang hman. Veteran keeper Valdes-a’n a tawnhriat neih that a pho lang a, Boro tan Barcelona keeper hlui hi player pawimawh a ni.

Minute 41-naah player tha bik danglamna a lang a, Hazard-a corner petin Boro defender hnung a per hnua ball kang chu Costa-a’n a pet goal. Spain international striker vengtu Boro defender pathum ten ball awmna an hre lo a, Costa erawhin ball awmna a hre bik – hei tak hi striker class bik a nihna chiah a ni.

Courtois tan hna
First half goal khat chiah a lut a, Boro-in Chelsea goal zawnah an pet lo. Blues manager Antonio Costa-a’n keeper Thibaut Courtois tan halftime ah hna a siam a, Belgian keeper hian dressing room-ah hun rei hmang loin khelmualah ball khawihtir a ni.

A goal belh lo
Chelsea-in second half-ah pawh bul an tan tha nghal a, keeper Valdes leh Calum Chambers zarah Boro an him hram.
Blues tlarhmaah Costa che vel a hmuhnawm a, Spain international striker hian Pedro leh Moses tan ball tha a siam ve ve. Barcelona winger hlui Pedro-a’n crossbar pet per nan a hmang a, Wigan player hlui Moses-a’n keeper chiah a hmachhawn hnuah a pet over bawk.

Boro-in goal venhim chiah an tum tawk bik lo a, siphurh sut an tum tih an khelh danah a lang. Aitor Karanka naute an huaisenna avanga ngaisangtu an awm a nih chuan a mak lo, mah se an finishing erawh chhuan tlak a awm lo.
Mualneitu lam tan Ramirez leh Adama Traore ten goal khung theihna tura an hun tha neih chu goal zawnah an pet loh avangin keeper Courtois tan buaina tham tling lo.

Boro boss Karanka-a’n khel tha lo chunga Alvaro Negredo thlak a phal loh chhan a lang zui a, Spanish striker hian a ke vei lamin box chhungah mawi takin a la a, Valencia striker hlui hian a ke vei lam tho a pet nghalin Chelsea keeper Courtois-a’n a dang tha hle.

Chelsea-in goal khat lekin point thum a hlawhchhuah thei tih an hria a, goal khung aiin goal venhim an ngai pawimawh zawk. Hun tawp lamah Boro-in ball an chang tam mah se awmze neia Chelsea tlarhnung inrem an su pawp zo lo.

A chung berah
Chelsea-in match 12 khelhah vawi hnih chak tawh lo mah se point 28 an hmuh avangin table chung berah an awm a, Inrinni zana Liverpool-in an khingpui Southampton laka goal an khung thei lo an vanneih pui. Blues-in European competition an khelh ve loh avangin November 26 zana an hmachhawn tur Tottenham Hotpurs aiin hahdamna hun an nei tha zawk dawn a, chutihrualin an khingpui tur Spurs hi hneh loh la tawng lo an nih avangin khelhpui an harsa khawp ang.

Middlesbrough erawhin point 11 chiah an la hmu a, table-ah 15-naah an awmin 18-naa awm Hull City nena an inthlauhna chu point khat chiah a ni.

Eng nge an sawi?
Chelsea defender Gary Cahill chuan, “Team chhungah inrintawkna a awm a, hei vang hian kan kheltha a ni. Result tha a pawimawh ber a, hei hi kan neih tel bawk avangin a lawmawm hle. Training-naah kan thawkrim a, result kan neih avang hian nuam ti takin kan khel thei. Chutihrualin krismas em pawh kan la thleng lo a, ngaihtha mai tur kan la ni lo,” tiin an dinhmun sawhngheh zel a duh thu a sawi.

Middlesbrough defender Ben Gibson chuan, “Hun tawp thlengin beiseina neiin kan khel a, point kan sual chhuak lo erawh pawh ka ti. Set piece atangin goal kan chhuah a, pawi kan ti hle. Chutihrualin kan khelh dan thlir chuan lawmna tur tam tak a awmin ka hria,” tiin point hmu tlaka an khelh that thu a sawi.

Middlesbrough manager Aitor Karanka chuan, “Kan player-te rilru put hmangah ka lawm. Premier League a n ih miau avangin a harsa dawn tih kan hria a, vawi khat tihsual vangin hremin kan awm. Diego Costa hi khawvel striker tha ber zinga mi a ni a, inkhelh hmain ven a tul thu pawh sawi thlap. Amaherawhchu ani ang player tha hi chu dan an harsa a ni. Tun dinhmunah chuan kan khelh that tlat avangin table-a kan awmnaah ka buai lo a,” tiin tihsual pakhat vanga an chak loh thu a sawi.

Chelsea boss Antonio Conte chuan, “Ka player-te chhuang a, kan hna ngai erawh kan chhunzawm reng a tul. Ka player-te bulah international break zawhah result tha kan nei chhunzawm tur a ni tiin ka hrilh a, inkhel harsa takah kan theihna zawng zawng nen kan khelh chhuak thei a ni. Premier League hi a la zo lo a, amaherawhchu a vawi khatna atan hmahruaitu kan nih avangin ka lawm hle a ni. Tunah chuan ka player-te bulah rim leh zuala thawk turin ka hrilh ang,” tiin an khelh dana a lungawi thu a sawi.

Tute nge inlan?
Chelsea (3-4-3): Courtois; Azpilicueta, David Luiz, Cahill (c); Moses (Ivanovic 89), Kante, Matic, Alonso; Pedro (Chalobah 80), Diego Costa, Hazard (Oscar 90+2).
Unused subs : Begovic, Terry, Fabregas, Batshuayi.

Middlesbrough (4-5-1): Valdes; Barragan, Chambers, Gibson (c), Fabio (Downing 71); Traore, Forshaw (Leadbitter 89), Clayton (Fischer 73), De Roon, Ramirez; Negredo.
Unused subs : Guzan, Espinosa, Fischer, Nsue, Rhodes.