Infiamna leh hmasawnna aia buaina in thla a zar thinna ram Iraq atanga Asia khawmualpuia a ber nih hi thil awl a ni lo, mahse Iraqi footballer Ahmed Radhi hi kum 1988 Asian Footballer of the Year a ni tlat ! Chutiang chawimawina sang lo dawng tawh chu kum 56 mi niin Covid – 19 vangin tukin khan a boral.
Radhi hi Iraqi footballer zinga ropui ber pawl niin kum 1982 – 1997 chhung khan Iraq tan game 121 khelin goal 62 a thun a, Iraqi zinga FIFA World Cup – a goal thun thei awmchhun niin 1986 khan Belgium lakah goal a thun.
1982 Asian Games – ah an ram hi gold medal lakpuiin Gulf Cup (2), Arab Games leh Arab Cup te a chawipui bawk. Kum 1988 a Asian Footballer of the Year a thlan a nih hi vawiin thlengin Iraqi zingah he chawimawina dawng thei awmchhun a la ni.
Football – a chawlhsan hnuah management lamah lut zawkin Iraq U-17 team a enkawl hman a, politics lamah a zuang lut lehin kum 2014 khan MP – ah thlan tlin a ni a, an rama football inrelbawlna lamah theihtawp a chhuah zui a ni.
Kar hmasa June ni 16 khan Covid -19 a kai tih hriatchhuah a ni a, Baghdad khawpuia Al Nuaman General Hospital – ah admit niin chhuahtir a nih zet hnuah June ni 19 khan admit nawn leh a ni a, a boral zui ta a ni.
