Premier League a manager hlawhtling kan sawi chuan Sir Alex Ferguson leh Arsene Wenger te hi rilru ah chuan a rawn lang nghal mai a. An ni hi kum 10 chuang manager ni thei leh hlawhtling te an ni a. An zingah hian tuna Everton manager David Moyes, March ni 14, 2002 atanga he hna chelhtu hi sawitel ziah a ngai tawh ang.2002 khan kum 38 chauh la ni mahse, Preston North End a enkawl that em avangin division hniam lama tla thla thei dinhmun a awm Everton chhanhim turin Moyes hi rawih a ni a. Tun thlengin Everton hi club lian zawk leh tha zawk nia lang te tana huphurhawm in kum 10 chhung chu a enkawl ve dawn ta.

April ni 25, 1963 ah David Moyes hi Bearsden, Scotland ah a lo piang a. 1980 atanga 1993 thleng Scotland leh England ah te a khelh kual hnuin coaching lam a luhchilh ve ta a ni. Manager hlawhtling tam tak te angin a khelh lai chuan defender a ni thin a. A football nun a a ngaihsan te zingah a pa David Moyes Snr. a sawilang hmasaber a. A pa hian Drumchapel Amateurs Under 16 a enkawl thin a, hetihlai hian a nu hian an inkhelh kawr te a lo sukfaisak thin niin a sawi. Scottish club hlun Rangers enkawl thintu Walter Smith, England manager lo ni tawh Terry Venables leh tuna Manchester United manager Sir Alex Ferguson te hi a ngaisang hle bawk. Everton a enkawl hnua player thiam a tih te chu Thierry Henry, Alan Shearer, Dennis Bergkamp, Roy Keane, Steven Gerrard, Gianfranco Zola, Paul Scholes, Patrick Vieira, Cesc Fabregas, Ryan Giggs leh Wayne Rooney te an ni. Player a lei fuh a sawi te chu Nigel Martyn (Leeds Utd atangin), Mikel Arteta (Real Sociedad atangin), Phil Nevilleleh Tim Howard (Manchester United atangin), Joleon Lescott (Wolves atangin), Phil Jagielka (Sheffield United atangin), Steven Pienaar (Borussia Dortmund atangin), Leighton Baines (Wigan atangin), Maruoune Fellaini (Standard Liege atangin).

David Moyes hian football bakah sakawr intlansiak lam leh golf a tui hle a. Benfica stadium ‘Stadium of light’ hi a khelmual nuam tih ber a ni daih thung. A unaupa Kenny Moyes hi Liverpool midfielder Charlie Adam in agent angin a hmang mek bawk.