(Vawiin hi Eric Cantona piancham a ni a, a piancham pual hian kum 1997 August ni 18 – a Manchester United manager Alex Ferguson-a’n lehkha a thawn hi kan rawn dah chhuak e. Cantona hi 1996/97 season khan United captain a ni a, season tawp dawnah kum 30 mi lek niin football – a chawlhsan thu a puang a ni. He lehkhathawn hi Sir Alex-a lehkhabu ‘LEADING’ atanga lehlin a ni.)
Eric duhtak,
Kan inbiak lohna pawh thla engemawzat a lo ni ta a, ka zah che leh ka ngaihhlut em che avangin lehkha han thawn che hi tulin ka hria a ni.
Training kan han tan leh chu dan pangngaiin I lo inlan leh mai turah ka ngai thin a, mahse thil thleng tawh lo tur ka beisei a ni tih erawh ka hre lawi si. Mottram – a kan inhmuh khan I mitmeng atangin Manchester United – a I hun hman chu a tawp tawh tih ka hrethiam reng. Mah reng reng se, hetiang thutlukna lian tham I siam dawn a nih chuan chawlh han la te te la, ka thurawn leh I pa thurawn han la ngei bawk la a tha tur.
I taksa invawng a, fit tak a awm reng turin ka duh che a ni. Kum 32 ka nih a inkhelh chawlhsan a management ka luhchilh khan training leh ka player te fitness ka ngaih pawimawh lutuk na lamah keimah ngei kha ka lo inthlahdah hman a, kum 6 liam hnua ka taksa ti fit leh tura han beih chu hremhmun tenau hi a ni ringawt ! Chuvangin invawng reng ang che.
Kan che vel leh kan result te pawh I lo la thlithlai ve rengin ka ring a. I hriat angin kan la che tha ve rih viau a, nangmah thlak turin Teddy Sheringham kan lak hian insiamrem a la mamawh deuh a, Tottenham tana a khelh ang chuan a la khel chhuak zo lo deuh a ni. Kan club angah hi chuan game tin kan khelh hi Cup final ang vek a nih avang hian player thenkhat te pawh hian hemi kawngah hian zir tur an la neiin ka hria.
Pre-season tour ah pawh kan che chhe hran lo a, khawchhak lama kan zin phei chu beisei phak bak a ni a, Inter Milan nena kan inkhel phei chu boruak a tha hle. Charity Shield – ah khan penalty shootout – ah Chelsea hneh hram mah I la inkhel pumpui thlir chuan chak kan phu zawk chuan ka hria.
Season tawp dawn a kan sawi dun ang khan top class striker hi kan mamawh ber chu a la ni reng a, chubakah, kan chet that ve lai ber a club dang te lei hmaa player tha han lei ve hmasak theih te hi a chakawm a, amaherawhchu kan sum dinhmun leh kan hlawh pek dan te enin hei hi chu kan club harsatna ber a la nih rih a rinawm. Kum la naupang deuh ni ila chu ka khawvel thlir dan te pawh hi ka thlak thei mahna, European Cup ka la chawi lo a, ka la chawi hnai mai lo ni tein ka hre thin ! Mahse heng harsatna te hi indaltir ka tum lo a, ka player neih te ah hian rinna ka nghat a, ka lungawi em em a ni. Cantona dang lo chhuah leh hun tur ka thlir a ni ber e. Ka duhthusam a nih chu !
Ka duh tawk dawn hnai ang a, engtik emaw ah inhmu lehin hlim takin kan la inkawm leh ang tih ka beisei. Kan hma lawk a club in zanriah a buatsaih turah khan sawmna I lo hmuh ka beisei a, I lo tel ngei pawh ka beisei. Mahse ka tan a thil pawimawh ber – Manchester United tan player tha I ni tih hi hrilh nawn leh che ka duh a ni. Ka tan a I thil tih zawng zawngah khan lawmthu ka sawi a, engtikah mah ka theihnghilh tawh dawn lo a, I theihnghilh theih ka ring bik lo.
He club – ah hian I tan hmun a awm reng a, media tel miah lo a thian ang chauh a thingpui in dun I duh a nih pawhin chu tluka hlu chu ka tan a awm lo ang. Eric, min mamawh a nih phawt chuan ka awmna tur I hria e. Tunah chuan ka player ni tawh lo mahla, thian I nei tih I hre dawn nia.
Duhsakna nen, Lalpan malsawm che rawh se.
I rintlak,
Alex Ferguson CBE
MANAGER
(Pic : Lehkhathawn chu)
