Football hi uluk takin Zofooty member-te hi chuan kan en thin awm e. Football-ah hian khawi lai position hi nge pawimawh ber ang tih te, Attacking nge defensive hi pawimawh zawk ang tih te kan ngaihtuah fo thin in a rinawm.

Football team-ah hian khawi position pawh a in balance a pawimawh khawpin ka hria. Attacking (offensive) chak viau mahsela defensive lam an that loh chuan lawm a kim thei thin lo. Goal thun hnem mahsela goal an chhuah hnem tho chuan a lawmawm tawk thin lo. Chak ni an hmu hleithei bik thin tlat lo a ni. A laia ding hovin inkhel an thunun theih loh chuan pet goal tur a vang thin khawp mai. Kan u C.Zawma chuan “Duhtawka Nipeng-a ten ball an han vawrh luh tawh hi chu Klinssmann-a te pawh hian pet goal chu nuam an ti ve ngawt ang” a ti. Ni, a laia awmten inkhel an thunun a, an duhtawk a ball an siam theih chuan keiniho tan chuan goal thun chu a nuam alawm.

Manchester United hi han enchiang chhin teh ang. Chelsea-ah emaw Man City ah emaw players-te hi lut ta vek sela, Rooney bak hi khel pha an awm ang em? An awm ka ring meuh lo. Mahse engatinge an tlakhniam theih reng reng loh? An team balance hi a tha riau alawm. Ni lo’m ni? Attacking chauh tha, defensive nawi tak nilovin khawi lai hmunah pawh inringtawk thei team hi an hlawhtling nge nge thin a ni.

Kristian nunah pawh hian hei bawk hi a pawimawh thin in ka hria. Thenkhat chuan attacking lam kan beih nasat lutuk avangin defensive lam kan hlamchhiah a, kan opponent Setana hi a ball a fing ropui mai bawk si a. Kan lamah a goal leh thin. Kan u pakhat chuan KS ho hi a vei em em mai a, an tan theihtawp chhuahin hna pawh a thawk reng a ni. Mahse defensive lama a chakna hnar tur Biak In a hlamchhiah a, tawngtai thlengin a hlamchhiah zui niin ka hria. Chumi avang chuan a vei em em KS lakah chuan reiloteah a chesual ta mai a ni.

A lehlamah ve thung chuan defenseive tlur mai an awm leh bawk a. Mizo Kristiante zingah hi chuan defensive Kristian hi kan tam ber awm e. Pathian thu in TI SUH a tih chu mahni inveng fimkhur em em in tih loh hram kan tum a, TI RAWH a tih erawh chu kan ti hleithei thin lo chu a nih hi. Kristian nun chu raldo nun a nih tehreng nen keini chuan ral va do lovin, ralin min beih hun kan nghak a, kan tlawm loh theih dan ringawt ngaihtuah berah kan nei niin ka hre thin. Kan goal venghim tha mah ila kan pet goal si loh chuan point 3 kan hmu thin lo, point 2 paihin point 1 chauh kan hlawhchhuak hram thin zawk a ni.

Chuvang chuan kan tum ber tur chu goal thun a ni tur a ni a, chumi rual chuan kan goal kan venhim theih dan tur kan ngaihtuah tel bawk tur a ni. Thlarau boten Lal Isua an lo neih theih nan theihtawp kan chhuah ang a, min hneh tum ran tu Setana hmanruate chu paih bo turin theihtawp kan chhuah thin tur a ni. Tichuan a tawpah ropuina ramah khian kan Lalpan lawm takin min lo lawm dawn a ni. AMEN.