Nikum December thlaa All India Football Federation hruaitu thlanaah dan bawhchhiatna a awm ni a a lan avangin Delhi High Court chuan AIFF chu thla nga (5) chhungin inthlang tha turin a ti.
Sports lawyer leh activist lar Rahul Mehra chuan nikuma AIFF inthlanah hian National Sports Code bawhchhiatna a awm ni a a hriat avangin Delhi High Court-ah Public Interest Litigation (PIL) a thehlut a, he PIL ang hian Court chuan thla nga chhungin AIFF hi inthlang tha turin a ti a, AIFF Administrator atan Chief Election Commissioner hlui SY Quraishi a ruat bawk.
Hemi chungchangah hian AIFF chuan inthlanna chu High Court Judge hlui kaihhruaina hnuaiah thianghlim tak leh fel fai tak a kalpui a nih thu sawiin FIFA leh AFC duh dan pawh zawm a nih thu an sawi a. High Court order hi an dawn hunah dan angin an hmalak dan tur an rel tur thu an sawi bawk.
Praful Patel hi kum 2008 a acting President a nih hnuah kum 2009 atang khan AIFF President a ni a, tunah hian Asian Football Confederation (AFC) ah Sr.Vice President ni mekin FIFA Finance Committee-ah a tel bawk avangin huhang a ngah hle a, FIFA ‘good book’ a chuang pha zinga mi a nih avangin football khawvela thuneitu sang hawi lam hian AIFF hmalam hun a hril thui hle rin a ni.
+ There are no comments
Add yours