‘Tripura Times’ chanchinbu in he Rakhal Memorial Shield Final chungchang a preview naah chuan heti hian a ziak a, “The football lovers never expected a great final to enjoy but remained present at the D D stadium in good numbers in a hope to watch some lively football by the Mizos of Lal Bahadur”. He thu hian Mizo players te chungnung zia a ti lang chiang khop awm e. He inkhel hmuhnawm tak en tur hian ‘Dasharath Dev Stadium’ ah mipui an pungkhawm tam hle a, mipui pungkhawm te chu stadium chhunga an len vek loh avangin stadium pawn lamah pawh thawm a tha khop mai. Football ngaina tute tan chuan hmaih phal chi a nilo reng a ni.

Game tan phat atanga minutes 3 lek a ral tih ah 2011 Red Ribbon star, Lalbahadur captain ni bawk Denghmingthanga chuan goal chhinchhiahtlak tak a rawn thun a. He goal ropui tak hi goal lut chhun a ni ta a ni. He hnehna goal thun tur hian Denga hian a thawkrim hle a, an khingpui, ‘Ageye Chalo’ defender pathum te chu palzut pheiin ‘Mizopa goal diktak’ a thun ta a ni. Lalbahadur lam fans te thawm a tha hle a, fire works leh khuangte nen an ri mut mut mai a, chutah pawisa vawrh tawk an awm bawk, pui mep mep tak a ni.

Inkhel a hmuhnawm chho viaua ‘Ageye Chalo’ ho pawn an nawr na tan hle a, an inbei tawk kher mai. Minute 65 ah B.Zoramthara chu ‘Ageye Chalo’ penalty box chhunga an tihtluk avangin penalty a hlawhchhuaka, mahse Lalsiamthara chuan goal ah a chantir zo ta lo a ni. Huntawp thlengin goal dang a luhbelh lo a, Lalbahadur Vyamagar FC te chu Rakhal Memorial Shield champion an ni ta a ni.

He inkhel hi MLA leh ‘former President of Tripura Football Association’ Pabitra Kar, MLA Subal Bhowmik, te leh ‘Tripura Sports Council’ secretary, Kamal Saha ten an chhim ve a ni. Denghmingthanga chu ‘Man of the match’ a thlan a ni a, tin, ‘Ageye Chalo’ goal keeper Kishore Jamatia chu ‘best keeper’ atan thlan a ni bawk. Mizo nih a nuam leh pek ta !!!!