Tun tournament-a Champion tura rinkai ber zing ami Germany chuan Group of Death-ah a awm mahse an tumpui an hneh fai vek avangin Group winner an ni chiang hle a. An group match hnuhnung berah Euro 92 final-a an hneh tawhloh Denmark chu Lukas Podolski leh Lars Bender-te goal hmangin 2-1 in an hneh. He chakna avang hian Germany chu group winner ni chungin Quarterfinal an lut a, Denmark erawh an tla thung. Quarterfinal match pahnihna ni 22 June 2011, Zirtawpni zana (ni 23 June 2012, 12:15 am) khelh turah Group A Runner up Greece leh Group B Winner Germany hi an inkhel ang.

Inkhelh hma boruak
Denmark-in chak an mamawh a, an chak anih chuan an lut chiang a. An draw anih erawh chuan Netherlands-in Portugal an draw emaw an hneh emaw a ngai dawn a ni. Germany erawh vawihnih chak tawh annih avangin an dihmun a tha ang reng a, an chak emaw an draw emaw anih chuan group winner niin quarterfinal an lut thei dawn a. An chaklo pawn an la lut thei thova, Netherlands-in Portugal an hneh emaw an draw emaw anih chuan lut chiang a. Mahse Portugal an chak anih erawh chuan 3-2 emaw 4-3 emaw aia tam (one goal margin) emaw a an chakloh a ngai dawn a ni. Chutia nih chuan 2-1 emaw 1-0 emaw 2-0 emaw one goal margin aia tama an chakloh chuan tla ve thei tho an ni.

Denmark lamin winger/striker tlanchak Dennis Rommedahl inhliam vangin an chhawr thei lo mahse an midfielder pawimawh Niki Zimling an chhawr thei thung. Germany lamin suspend vangin Jerome Boateng an chhawr thei lova, a aiah Bayer Leverkusen defender (midfielder?) Lars Bender hman a ngaih phah ta a ni.

First Half-ah Germany an chungnung, goal erawh 1-1
Germany lamin inkhel tan tirh atangin inkhel an thunun nghal a, Sami Khedira leh Bastian Schweinsteiger te an inkawp fuh takzet a, Thomas Mueller right lamah a talna hle bawk. Germany chance neih hmasaber thelh tu erawh right lama tangkai tak Mueller a ni thung. Game thunun zawk Germany tan minute 19-ah Lukas Podolski-a’n goal hmahruaina goal a thun a. He inkhel hi Germany tana Podolski match 100 na niin, European player zinga hetiang dinhmun thleng thei naupang ber a ni. Denmark an la tlawm mai lova, minute 23-naah Lars Jacobsen-a corner pet chu Nicklas Bendtner chuan a lo head per a, chumi per chu Michael Krohn-Delhi chuan Manuel Neuer a man hman lovin a lo head lut. Krohn-Delhi hi Netherlands lama goal awmchhun thuntu Netherlands beiseina ti tlemtu leh Denmark beiseina neih tirtu kha a ni a, he goal hnih vang hian Euro 2012 hmang tha ber zinga chhiar tel loh theihloh a ni. He goal vang hian Denmark lamin beiseina thar leh inrintawkna rawn nei chho bawk mahse game thununtu chu Germany an la ni thova. Mahse first half-ah hian goal dang a luh belh lo.

Second Half-ah Goal khat!
Germany dinhmun a la tha bik lova, Denmark in goal khat an thun chuan tla thei reng an ni. Chuvang chuan goal an mamawh takzet a, inkhel lehlamah Portugal in hma an hruai hnu phei chuan an dinhmun chu dinhmun tha a chhiar ngam chu har tak a ni. Denmark lamin theihtawp an chhuah zel a, an defending tha tak chu Germany tan tawn tlang har tak a ni. Goal thun theilo Germany in Podolski aiah friendly match a form em em Andre Schurrle an rawn luhtir a, Mario Gomez aiah head master an rawn luh tir bawk. Joachim Low substitution siamin awmzia a nei a, Germany game pawh a tir ang maiin a nung leh a, goal pawh an thun nghe nghe. Goal thuntu erawh subsitute atanga rawn lut ni lovin Boateng suspend vanga first eleven chang Bender a ni thung a. He goal hi Germany chakna goal anih bakah Germany teama a dinhmun ti thatu anih theih a rinawm. Germany tan Lars Bender a goal thun a tawk a, a vawikhatna European Championship group stage-ah chak fai vekin Quarterfinal an lut a ni. Chumai bakah tuna Denmark hnehtu Germany team hi tun European Championship an first eleven naupang ber tum a ni a. An kum chawhrualin kum 25 leh ni 107 chauh a upa an ni.

Tournament hma atang tawha rinkai Germany an tha chho zel a, Quarterfinal-ah 2004 Champion Greece hi an hneh thei angem tih hi zawhna lian tak a ni ta. He Germany team tan chuan Captain Giorgos Karagounis tellona Greece hneh hi thil harsa tur niin a lang lo. Mahse an khelh tur hi football a ni miau si…

Match Statistics:
Denmark
Playing XI : 01 Andersen; 03 Kjaer, 04 Agger, 05 S Poulsen, 06 Jacobsen; 07 Kvist; 08 Eriksen; 19 J Poulsen (Mikkelsen – 82′ ), 21 Zimling (C Poulsen – 78′ ); 09 Krohn-Delhi; 11 Bendtner
Substitutes: 16 Lindegaard, 22 Schmeichel, 12 Bjelland, 18 Wass, 02 C Poulsen, 13 Okore, 14 Schone, 15 Silberbauer, 20 Kahlenberg, 10 Rommedahl, 17 Pedersen, 23 Mikkelsen

Germany
Playing XI : 01 Neuer; 05 Hummels, 14 Badstuber, 16 Lahm; 06 Khedira, 07 Schweinsteiger, 08 Ozil, 13 Mueller (Kroos – 84′ ), 15 Bender, 10 Podolski (Schurrle – 64′ ); 23 Gomez (Klose – 74′ )
Substitutes : 12 Wiese, 22 Zieler, 03 Schmelzer, 04 Howedes, 17 Mertesacker, 02 Gundogan, 09 Schurrle, 18 Kroos, 19 Gotze, 21 Reus, 11 Klose