Paulo Bento-a naute chuan Denmark beihna na tak karah point thum hlu tak an hawn thei hram a ni.

He inkhel hmuhnawm takah hian Portugal lam chuan Pepe leh Postiga te goal hmanga hma an hruai hnuah Denmark in Bendtner-a goal hnih hmangin an rawn pawtthla leh a, Denmark an phur tawh hle a. Hnehna chan tuma an beih laiin substitute Silvestre Varela chuan hun tawp dawnah chakna goal Portugal tan mawi takin a rawn thun a ni.

Heti hian Portugal tan quarter-final luhna chance a inhawn zauh belh a, chaklo zawk Denmark tan pawh hian kawng a la inhawng zel tho bawk a ni.

Team Line-up

Denmark: Stephan Andersen, Lars Jacobsen, Simon Kjaer, Daniel Agger, Simon Poulsen, Christian Eriksen, Niki Zimling (Jakob Poulsen, 16), Michael Krohn-Dehli (Lasse Schöne, 90), William Kvist, Dennis Rommedahl (Tobias Mikkelsen, 60), Nicklas Bendtner

Portugal: Rui Patricio, Bruno Alves, João Pereira, Pepe, Fábio Coentrão, Nani (Rolando, 89), Miguel Veloso, Raul Meireles (Silvestre Varela, 84), João Moutinho, Cristiano Ronaldo, Helder Postiga (Nélson Oliveira, 64)

Inkhel a tan ta.

Denmark lamin bul an tan tha zawk a, a tir lamah corner hmu nualin Portugal lam an nawr viau a, mahse Portugal lam zawk hian chance mumal tak rawn nei hmasa zawkin Miguel Veloso pet chu keeper Andersen chuan a lo dansak a ni.

Denmark tan chanchin lawmawm loh a thleng a, minute 15 naah midfielder Zimling chu inhliam vanga lakchhuah a ngai a, a aiah Jakob Poulsen a rawn lut a ni.

Portugal lam an rawn kheltha chho zel a, Cristiano Ronaldo bawk a rawn langsar leh a, mahse ani pawhin a half-chance neihte leh free-kick pet te hlauhawm takah a chhuah theilo vek a ni.

Tichuan Portugal lamin nawr chhunzawm zelin minute 24 naah Moutinho corner rawn pet chu Pepe chuan tha zet maiin Denmark goal ah a tauhlut a, Portugal in hma an hruai ta a ni.

Portugal lam an phur zual zel a, an hlauhawm tulh tulh a ni ber. Nawr chhunzawm zelin minute 37 naah an thawhrah an seng leh ta. Nani chuan dinglam kilah ball la pheiin box chhungah a hniamin ball a “square” phei a, Postiga chuan chiang takin a lo thun leh a ni.

Mahse minute li hnu lekah Denmark lam chuan an rawn chhanglet nghal a, William Kvist Jorgensen-a ball pek phei chu Krohn-Dehli chuan far post lam atangin six yard box chhungah a tauh phei a, hei hi Nicklas bendtner chuan goal ruakah a lo tauhlut a ni.

Half-time hmain Portugal tan Nani bawk a rawn lang leh a, a hmaa an tih ang deuh chiahin rawn tih leh a tum a, mahse tun tumah chuan Postiga chu Kjaer chuan a lo veng hneh tawh a ni. Goal dang luhbelh loin 1st half a tawp.

2nd Half an tan.

Cristiano Ronaldo bawk a rawn langsar leh nghal a, through ball tha zet maia an pek chu box chhungah a la a, mahse a sir kila pet a tum chu Danish keeper Andersen tan dan a harsa lemlo a ni. Hemi hnu hian Portugal lam an hlauhawm chhunzawm zel a, Postiga pawhin chance a nei hman thelh a, mahse Agger-a’n a lo dang hman a ni.

Denmark lam an vanduai lehzel a, an experienced winger Rommedahl chu hliam vanga lakchhuah ngaiin Tobias Mikkelsen chuan a rawn thlak a ni.

Mahse hemi hnu hian Danes lam hi an rawn langsar veleh tial tial a, William Kvist Jorgensen chuan box pawn atangin tha zeta rawn petin bar chungah a kal chiah chiah a, tin, Bendtner chuan boruakah ball nalh zet maiin a la a, mahse a finishing in a technique a pha ta chiahlo a ni.

Portugal tan chakna tichiang thei turin Ronaldo chuan chance tha zet mai a nei leh a, mahse ani hian one-on-one ah bawk a thun thei lo leh a ni. Hemi hnu lawk hian Denmark lam chuan Portugal chu an goal thunloh rah an sengtir nghal a, Jakobsen-a’n Portuguese defender te vawrh khumin Bendtner chuan minute 80 naah a goal hnihna a tauhlut leh ta a ni.

Mahse hemi hnu lawk minute 87 naah Portugal an vanduai leh dawn emaw tih tawh lamah Silvestre Varela chuan Fabio Coentrao-a cross chu nalh zet maiin a lo half-volley a, Portugal a chhanhim ta a ni.

Match Stats:

Portugal tan Quarter-Final kawng a inhawn belh!

Heti hian Portugal hian khelh hnihah point thum an hmu a, Denmark nen hian an inrual chiah a, an dinhmun a inang chiah a ni.  Game thumna ah result tha an neih chuan an luh theihna chance a la awm ve ve a ni.

Zanin inkhel hmasa zawk hi a hmuhnawmin neutral football fans tan pawh mit a tlai hle mai a. Khawvel football a tunhma atanga winger chhawrthiam leh neitha thin ram pahnihte an ni bawk a, an innawr a hlauhawm thei thin viau a ni.

Denmark lam an tlarhnung a phui tha tawk lo a, Agger leh Kjaer te hi eng level ah pawh football khawvel a “quality center-backs” te an ni a, zaninah erawh khel pangngai viau tho mahse tihsual zeuh leh nghehloh riau lai an nei tlat a, tin, fullback Simon Poulsen kha Nani lakah khan a che hleitheilo a ni ber. Mahse hemi tihlohah chuan midang chu an kheltha viau mai a, a bikin alaiah William Kvist Jorgensen a kheltha hle a ni. Euro 2012 a rawlthar chetha tura beisei Christian Eriksen erawh a duh angin a langsar lo ngei ang. Substitute Jakob Poulsen pawh a rawn tangkai hle a, tin, winger pahnih, Michael Krohn-Daehli leh Dennis Rommehdahl te an rawn kheltha leh hle bawk. Bendtner khan Portugal laka a khelh hnuhnung vawi nga a a goal rukna a thun a , fak a phu thlawt bawk a ni.

Portugal lam pawh an kheltha thawkhat viau a, mahse right-back ah Joao Pereira hi a goal nawr na viau mahse a defending hi a “limited” riau a, hei hi tournament kal zelah an tawrh phah thei ang em? Midang chu an kheltha hlawm viau a, a bikin Nani, Moutinho leh Veloso te an kheltha thlawt a, Pepe pawh goal thunin kheltha viau mahse a vawikhat tihsual erawh a pawi a, Bendtner khan goal a thun phah a ni. Striker tunhnaia sawisel hlawh Postiga pawh a rawn kheltha viau a, a goal thun hrim hrim bakah box chhunga a tlanluh te leh a “off-the-ball movement” hrim hrim a tha a, a teammate ten an chhawr hle a ni. Ronaldo erawh a khelhdanah a lungawi lo chiang khawp ang. Chance tha zet mai vawihnih a hlah a, tin a khel hrim hrim hlauhawm tur angin han lang thin mahse a “end-product” a awm thin lo a ni. Mahse hetah tak hian Portugal vannei zan a ni, lehlam kila pakhat a khelhchhiat tumin a lehlam ah game thlak danglam hlawk thei Nani a che tlat a ni. Substitute Varela kha game boruak sang tawhah goal tha tak leh pawimawh tak a rawn thun thei kha a fakawm a ni.

“Group of Death” an tih Group B ah hian team tin ten chance an la nei vek a, tin, engpawh la thleng thei vek a ni a, Quarter-Final in pet thleng turin an tha tawk vek bawk a, hemite hi Euro 2012 a group hmuhnawm berte zinga mi chu an ni ngei a ni.

Pic Source: guardian.co.uk

Stats Source: soccernet.espn.go.com