DUNCAN EDWARDS NGHILH LOH NAN

Dudley khaw naupang chu:
Duncan Edwards hi kum 1935 October ni 1 khan Gladstone leh Sarah Anne Edwards te fa hmasa ber ni turin a lo piang a. Nau hmeichhia Carol Anne neiin vanduaithlak takin a nau erawh nausen a nih laiin a boral hlauh thung. A naupan tet ata football khel chhoin kum 14 a nih chuan England School XI-ah a tel pha der tawh! A hnuah phei chuan captain atan ruat a ni ta hial a. Hetihlai hian club tamtak mit a la tawh hle , a thiamna chuan an mit it zawng hlah ngai lo Manchester United scout Jack O’Brien a beng pawh a lo thleng ve thuai a. Wolverhampton Wanderers, Aston Villa leh West Bromich Albion te’n lakluh tuma an hel ve reng avangin amah duhsaktu England School Team manager Joe Mercer chuan Man United manager Sir Matt Busby hnenah Edwards chu lei turin a ngen ta hial a, tichuan a ropuina lamtluang zawh turin June ni 2, 1952 khan ‘ameteur contract’ a ziak ta.

Football zinkawng:
Man United a zawm rual rualin youth team player pawimawh ber pawl a ni nghal a, kum 1953 FA Youth Cup hmasa ber champion team ah a tel ve nghe nghe. Tichuan kum 1952 April ni 4 khan kum 16 leh ni 185 a upa niin Cardiff City a hmachhawn a, English top flight football a khel naupang ber record siamtu a ni ta reng mai. Hei mai hi duhtawk lo in kum 1955 April ni 2 khan kum 18 leh ni 183 a upa niin England senior team tan Scotland lakah a khel a, Indopui II-na hnu lama English player naupang ber a nih bakah he record phei hi chu kum 43 zet hnuah kum 1998 khan Michael Owen’n a rawn khum ta chauh a ni.

An ram danin a phut angin sipaiah te a han tang leh lawp lawp a, kum 1957 khan League Title la in FA Cup Final an lut bawk a, mahse Aston Villa 1-2 a hneh lo in League leh Cup an ‘double’ thei ta lo. A vanglai a hmang chho dawn mek a,”Busby Babes” player pawimawh niin England team a Billy Wright thlaka captain armband hreng tura hual tu pawh a nei ta nuk mai.

Kum 1958 February ni 1 a lo herchhuah chuan England leilunga a inkhelh tawp ber tur a ni tih hre miah lo in Arsenal a hmachhawn a, 5-4 a chakin an goal hmasa ber a thun nghe nghe. A hnu February ni 2 ah Red Star Belgrade nen European Cup semi-final luh inchuhin an inkhel a, 3-3 a inhnehtawkin Man United tana a game hnuhnung ber chu a khel ta.

Kum 5 chhung lek professional football khel mahse United tan game 177 ah goal 21 thunin England tan game 18 ah goal 5 a thun bawk. FA Youth Cup vawi 3 a chawi a, English League ah vawi 2 champion in European Cup semi-final a lut bawk. Tin,a naupanna tumahin an ngainep lohzia tichiangtu atan kum 2002 khan English Football Hall of Fame ah lawmluh a ni.

Vanduaina leh thihna:
Khatia Munich Airport a British European Airways Flight 609 a chetsual khan England fachuam Duncan Edwards hi a boral ve nghal mai lo a, hliam na tak tuarin Munich khawpuia damdawi in lar Rechts der Isar Hospital panpui a ni. Damdawi ina a awm lai hian amah enkawltu doctor leh nurse te’n a huaisenna an fak hle a, hetihlaia United Asst.Manager Jimmy Murphy a bulah pawh dam taka inkhelh a chak tawhzia a sawi thin a ni awm e.

A kal a chhiat avangin kal lem vuahsak a ni a, zawi zawia tha tura beisei a nih laiin February ni 21 tlai lam dar 2:15 ah chuan Busby Babes lunghlu, England fapa rangkachak chuan a fans te kohna aiin van kohna a chhang ta zawk a, vanrama a thiante zawm turin a leithuam a hlip ta! A boral lai hian nupui hual kum 22 mi Molly Leach a nei nia sawi a ni. Ni 5 hnuah an khua Dudley a mipui 5,000 chuang pungkhawm hmaah vui a ni a, a ruang hi Queens Cross Cemetary-a a farnu Carol Anne kiangah zalh a ni a, a thlanlungah chuan ti hian ziak a ni: “A day of memory, Sad to recall; Without farewell, He left us all.”

Miten tunge a ni an tih? 
A boral hnu hian an khua Dudley leh a chhehvelah amah chawimawina hrang hrang hmuh tur a tam hle a. A lim siam a nih bakah khawchhung kawngpui thenkhat chu ama hming chawia sak a ni.Kum 1996-a England in Euro a thlen khan Football Legend tih thupui hmanga British stamp siamah a thlalak a chuang ve nghe nghe. English football legend Sir Bobby Charlton chuan “Ka footballer hmuh tawha tha ka tih ber” a tih bakah “A pheikhawk hrui suih tlak pawh ka ni lo” ti hialin a sawi a.

England manager hlui Terry Venables pawhin “La dam ngat se chu kum 1966 World Cup Trophy kha Bobby Moore ni lo in Edward hian a chawi ngei ang” tiin a sawi ve bawk. A ‘versatality’ tha lutuk te, a tharum ngah leh a thahrui feina a larpui hle a, Sir Stanley Matthews phei chuan “Tuipuia lung lian tak ding ang a ni” tiin a sawi. United a amah enkawl thintu Jimmy Murphy pawhin “Mohammad Ali’n khawvel hmaa ropuibera a nih thu a sawi hian ka nuih a ti za thin, a ropui ber chu Duncan Edwards hi a ni si a” tiin a sawi.

England captain ropui Bobby Moore chuan “Amah ang hi an piang leh thei tawh lo” ti hialin a sawi ve bawk. Ziakmi hrang hrang Iain McCarthy, Geoff Warburton, Derek Dougan, Hugh Jamieson, Frank Taylor, Geoff Warburton leh mi dang te’n a chanchin hi ziakin lehkhabuah an chhuah a. Amah ngei pawh hian ‘Tackle Soccer This Way’ tih lehkhabu a ziak ve a ni. Khelmual pawn lamah chuan Edwards hi nghakuai chiah leh thlalak nuam ti tak, zu in ngai lo niin sawi a ni.

(He article hi February ni 21, 2012-a ziah a ni.)