Vawiin tlai dar 6:30 hian Shillong Lajong leh Churchill Brothers ten 124th Durand Cup Semi final, Ambedkar Stadium, New Delhi ah an khel dawn a. Heta chak zawk zawk hian Pune F.C. 2-0 a hnehtu leh Champion lai ni bawk Prayag United Final ah an tum ang.

Shillong Lajong in Semi Final thleng tura Sikkim United an hneh tumin an Star Player Ramluaha chuan Red Card a hmu a, chuvangin Chruchill Brothers nena an inkhelh hunah pawh hian a tel ve lovang.

Shillong Lajong Midfielder Ramluaha’n Semi Final hi a khel chak takzet tih ZoFooty a hrilh a, Final an thleng thei annih chuan a khelh theih tur thu leh theih tawp a chhuah tur thu a sawi tel bawk.

Zofooty chuan Ramluaha kawmna kan nei thei hlauh a. A hun chep tak kara kawmna hun min pek theih avangin Ramluaha chungah lawmthu kan sawi tak meuh meuh a ni.

ZF: Federation Cup Semi Final-a Salgoacar in hneh loh khan engtinnge in Coach in a tih che u?
Ramluaha: Nia, kan chaklo kha chu hreawm kan ti khawp mai, game ah pawh kan hneh zawk asin le. Mahse kan Coach Reddy pawh kan performance ah a lawm khawp mai. Coaching ka neih tawh zawng zawng ah chuan ah chuan ka hriat chinah game that ber tum ala niang a ti hial.

ZF: I-Day Invitation Tournament, Aizawl a in rawn khelh khan tuna in performance hi a pui che u em?
Ramluaha: Aizawl a kan rawn kal khan tam takah min pui khawp mai.

ZF: Durand Cup ah pawh in chetha leh zel a, I-League team leh team dang (Air Force etc) te hi danglamna a a awm in i hria em?
Ramluaha: I-League Team chu danglam tehreng mai. Engkimah a danglam. Hu hang pawh a in nat helih khawp mai. I-League team kan hmachhawn dawn hi chuan keimahni ah pawh kan serious bik thin.

ZF: Semi Final ah I-League team tha Churchill Brothers in tum dawn a, in hneh theih i ring em? Tunge i position ah khel dawn?
Ramluaha: Eeee, kan hneh thei tehreng mai. Mahse Churchill Brothers hi team tha tak an ni a, hneh pawh a harsa khawp ang. Mahse kan tan ho a, 100% kan pek phawt chuan kan hneh thei, tih ka chiang khawp mai.
Keimah aia khel tur chu ka la hre lova, tu pawh khel se tha tak a an khelh ka duh tak meuh a ni.

ZF: Final ah Salgoacar leh Pune F.C. hnehtu Prayag in an lo nghak che u a. Team tha zawk a ngaih Pune F.C leh Salgoacar te an chak tawh si lova, In vannei ah i ngai em?
Ramluaha: Salgoacar leh Pune te hi team tha tak chu ni mahse Prayag hi team tha tak a ni tih ka chiang. Federation Cup a East Bengal an hnehnloh tum te khan pahnih in red card an hmu a, hmu lo ta se chuan an chak ka ring chiang khawp mai. Team tha tak a ni, mahse hneh theihloh chu anni lo.
Salgoacar leh Pune F.C. te an tlak vang ringawt a, lawm tur pawh niin ka hre lo. Theihtawp kan chhuah chuan Pathian zarah kan hneh thei tih chu ka ring tlat a ni.

ZF: Kawmna hun tha tak minpek avangin kan lawm e.
Ramluaha: Keipawh ka lawm e.